ⵢⴻⵙⵙⴻⵍⵃⴰ ⵓⵏⴻⵖⵍⴰⴼ ⵏ ⴷⴰⵅⴻⵍ, ⵜⵉⴳⵔⴰⵡⵉⵏ ⵜⵉⴷⵉⴳⴰⵏⵉⵏ ⴷ ⵓⵙⵉⴽⴻⵍ, ⵎⴰⵙⵙ ⵙⵄⵉⴷ ⵙⴻⵄⵢⵓⴷ, ⵢⵉⵡⴻⵜ ⵏ ⵜⴼⵓⴳⵍⴰ ⵏ ⵜⴻⵊⵎⵉⵍⵜ ⵉ ⵜⵍⴰⵡⵉⵏ ⵏ ⵍⴰⵎⴰⵏ ⴰⵖⴻⵍⵏⴰⵡ ⴰⴽⴽⴻⴷ ⵜⵍⴰⵡⵉⵏ ⵜⵉⵎⵣⵡⵓⵔⴰ ⴷⴻⴳ ⵢⴰⵍ ⴰⵃⵔⵉⵛ, ⵉ ⵓⵙⵎⴻⴽⵜⵉ ⵏ ⵡⴰⵙⵙ ⴰⴳⵔⴰⵖⵍⴰⵏ ⵏ ⵜⵎⴻⵟⵟⵓⵜ, ⵉ ⴷ-ⵢⴻⵎⵎⵓⴳⵔⴻⵏ 8 ⵎⴻⵖⵔⴻⵙ ⵏ ⵢⴰⵍ ⴰⵙⴻⴳⴳⴰⵙ.
ⴷⴻⴳ ⵜⴼⵓⴳⵍⴰ-ⴰ ⵉ ⴷ-ⵢⴻⵍⵍⴰⵏ ⴷⴻⴳ ⵓⵖⴻⵔⴱⴰⵣ ⵓⵏⵏⵉⴳ ⵏ ⵜⵖⴰⵍⵍⵉⵜ "ⵄⴰⵍⵉ ⵜⵓⵏⵙⵉ", ⵜⴰⵎⴻⴷⴷⵉⵜ ⵏ ⵡⴰⵙⵙ ⵏ ⵙⴻⴱⵜ ⴷⴻⴳ ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ, ⵜⵜⵡⴰⵙⴻⵇⴷⴻⵔⵏⵜ ⵜⵍⴰⵡⵉⵏ ⵉ ⴷ-ⵢⴻⵙⴱⴻⴳⴳⵏⴻⵏ ⵜⵉⵡⴻⵣⵖⵉ-ⵏⵙⴻⵏⵜ ⴷⴻⴳ ⵓⵎⴻⵛⵡⴰⵔ-ⵏⵙⴻⵏⵜ ⴰⵙⴰⴷⵓⵔⴰⵏ, ⴳⴰⵔ-ⴰⵙⴻⵏⵜ ⵜⵉⵎⵊⴰⵀⴷⵉⵏ, ⵜⵉⵏⴻⵖⵍⴰⴼⵉⵏ, ⵜⵉⵎⴰⵙⴰⵢⵉⵏ ⵜⵉⵎⵇⵔⴰⵏⵉⵏ ⴷ ⵜⵉⵅⴻⴷⴷⴰⵎⵉⵏ ⴷⴻⴳ ⵡⴰⵎⵎⴰⵙ ⵏ ⵍⴰⵎⴰⵏ ⴰⵖⴻⵍⵏⴰⵡ ⴷ ⵢⵉⴳⵔⴰⵏ ⵉⵛⵓⵔⴽⴻⵏ ⴰⴽⴽⴻⴷ ⵜⵎⴰⵙⴰⵢⵉⵏ ⵙⴻⴳ ⵡⴰⵟⴰⵙ ⵏ ⵢⴻⵃⵔⵉⵛⴻⵏ ⵏⵏⵉⴹⴻⵏ, ⵖⴻⵔ ⵜⴰⵎⴰ ⵏ ⵜⵏⴻⵖⵎⴰⵙⵉⵏ.
ⵉⵡⴻⴽⴽⴻⴷ-ⴷ ⵎⴰⵙⵙ ⵙⴻⵄⵢⵓⴷ ⴷⴻⴳ ⵡⴰⵡⴰⵍ ⵉ ⴷ-ⵢⴻⵡⵡⵉ ⴷⴻⴳ ⵜⴻⴳⵏⵉⵜ-ⴰ ⴱⴻⵍⵍⵉ "8 ⵎⴻⵖⵔⴻⵙ ⵎⴰⵞⵞⵉ ⴷ ⴰⵣⴻⵎⵣ ⴽⴰⵏ ⴷⴻⴳ ⵜⴻⵙⵡⴰⵙⵜ, ⵎⴰⵛⴰ ⴷ ⵜⴰⴳⵏⵉⵜ ⵜⴰⴳⵔⴰⵖⵍⴰⵏⵜ ⵉ ⵓⵙⴻⵇⴷⴻⵔ ⵏ ⵜⵎⴻⵟⵟⵓⵜ ⴷ ⵓⵙⴼⵓⴳⴻⵍ ⵏ ⵓⵎⴻⵏⵏⵓⵖ-ⵉⵏⴻⵙ ⴰⴽⴽⴻⴷ ⵜⵜⴻⴽⴽⵉⵡⵉⵏ-ⵉⵏⴻⵙ ⴷⴻⴳ ⵢⴰⵍ ⴰⵃⵔⵉⵛ ⵏ ⵜⵓⴷⴻⵔⵜ".
ⵢⴻⵔⵏⴰ-ⴷ ⵢⴻⵏⵏⴰ ⴱⴻⵍⵍⵉ "ⵜⴰⵎⴻⵟⵟⵓⵜ ⵜⴰⵣⵣⴰⵢⵔⵉⵜ ⵜⵎⴰⵣⴰⵍ ⴷ ⴰⵎⴻⴷⵢⴰ ⵏ ⵜⴻⴱⵖⴻⵙⵜ ⴷ ⵉⵙⴻⴼⵍⴻⵏ, ⵉⵎⵉ ⵜⵓⵔⴰ ⵙ ⵓⴷⴻⵎ ⵢⴻⵍⵀⴰⵏ ⴷⴻⴳ ⵓⵎⴻⵣⵔⵓⵢ ⵏ ⵜⵍⴻⵍⵍⵉ ⴷ ⵍⴻⴱⵏⵉ ⵏ ⵓⵡⴰⵏⴻⴽ, ⵜⴻⵙⵙⴻⴽⵍⴻⵙ ⵉⵙⵎⴰⵡⴻⵏ ⵏ ⵜⵍⴰⵡⵉⵏ ⵜⵉⵎⵣⵡⵓⵔⴰ ⵉ ⴷ-ⵢⴻⵅⴻⴷⵎⴻⵏ ⵛⵛⴰⵏ ⵏ ⵍⴻⵣⵣⴰⵢⴻⵔ, ⵙⵙⴻⴵⵃⴻⵏⵜ ⴰⵣⴰⵍ ⵏ ⵜⴰⵢⵔⵉ ⵏ ⵜⵎⵓⵔⵜ".
ⵉⵙⵙⴻⵏⵄⴻⵜ-ⴷ ⴷⴰⵖⴻⵏ ⵓⵏⴻⵖⵍⴰⴼ "ⴰⵎⵍⵉⵍ ⴰⵎⴻⵏⵣⵓ ⵉ ⵜⴻⵜⵜⴻⴷⴷⴻⵎ ⵜⵎⴻⵟⵟⵓⵜ ⵜⴰⵣⵣⴰⵢⵔⵉⵜ ⴰⵙⵙ-ⴰ ⴷⴻⴳ ⵍⴻⴱⵏⵉ ⴷ ⵜⴰⵏⴻⴼⵍⵉⵜ, ⵉⵎⵉ ⵜⴻⵙⵙⴻⵏⵄⴻⵜ-ⴷ ⵜⵉⵍⵉⵏ-ⵉⵏⴻⵙ ⵉⵛⴻⴱⵃⴻⵏ ⴷⴻⴳ ⵡⴰⵟⴰⵙ ⵏ ⵢⴻⵃⵔⵉⵛⴻⵏ, ⵓⵍⴰ ⴷⴻⴳ ⵜⵙⵓⴷⴷⵉⵡⵉⵏ ⵜⵉⵏⵣⴰⵎⵉⵏ, ⵖⴻⵔ ⵓⵇⴻⵔⵔⵓ-ⵏⵙⴻⵏⵜ ⵍⴰⵎⴰⵏ ⴰⵖⴻⵍⵏⴰⵡ, ⵉ ⵢⴻⵙⵄⴰⵏ 20833 ⵏ ⵜⵍⴰⵡⵉⵏ ⵉⵅⴻⴷⴷⵎⴻⵏ ⵙ ⵜⵉⵔⵎⵉⵜ ⴷ ⵜⵎⵓⵙⵏⵉ ⴷⴻⴳ ⵡⴰⵟⴰⵙ ⵏ ⵢⴻⵃⵔⵉⵛⴻⵏ ⵏ ⵍⴰⵎⴰⵏ ⴷ ⵜⵎⴰⵙⴰⵢⵜ".
ⵢⴻⵔⵏⴰ-ⴷ ⴷⴻⴳ ⵡⴰⵡⴰⵍ-ⵉⵙ ⴱⴻⵍⵍⵉ "ⵜⴰⵎⴻⵟⵟⵓⵜ ⵜⴻⵙⵙⴰⵡⴻⴹ ⴰⴷ ⵜⴻⵟⵟⴻⴼ ⵉⵎⵓⴽⴰⵏ ⵏ ⵜⵎⴰⵙⴰⵢⵜ ⴷ ⵓⵇⴻⵔⵔⵓ, ⵜⵜⴻⴽⴽⴰ ⵙ ⵜⴻⵣⵎⴻⵔⵜ ⴷⴻⴳ ⵓⵃⴰⵔⴻⴱ ⵖⴻⴼ ⵍⴰⵎⴰⵏ ⴷ ⵓⵇⴷⴻⵛ ⵖⴻⴼ ⵜⵎⴻⵜⵜⵉ, ⵢⴻⵔⵏⴰ ⴰⵎⵍⵉⵍ-ⵉⵏⴻⵙ ⴰⴳⴻⵊⴷⴰⵏ ⴷⴻⴳ ⵍⴻⴱⵏⵉ ⵏ ⵜⵡⴰⵛⵓⵍⵜ ⴷ ⵓⵙⵙⴻⴵⵀⴻⴷ ⵏ ⵡⴰⵣⴰⵍⴻⵏ ⵉⵖⴻⵍⵏⴰⵡⴻⵏ".
ⵉⵙⵙⴻⴱⴳⴻⵏ-ⴷ ⵓⵏⴻⵖⵍⴰⴼ ⴱⴻⵍⵍⵉ "ⴰⵏⴻⵔⵏⵉ-ⴰ ⵉ ⴷ-ⵜⴻⵙⵙⴰⵡⴻⴹ ⵜⵎⴻⵟⵟⵓⵜ ⵜⴰⵣⵣⴰⵢⵔⵉⵜ ⴷ ⴰⵢⴻⵏ ⵉ ⴷ-ⵢⴻⵙⵙⴻⴱⴳⴰⵏⴻⵏ ⵜⴰⵎⵓⵖⵍⵉ ⵍⵇⴰⵢⴻⵏ ⴷ ⵜⴰⵍⵍⴰⵍⵜ ⵉ ⴷ-ⵢⴻⵜⵜⴰⴽ ⵓⵙⴻⵍⵡⴰⵢ ⵏ ⵜⴻⴳⴷⵓⴷⴰ, ⵎⴰⵙⵙ ⵄⴻⴱⴷⴻⵍⵎⴰⴵⵉⴷ ⵜⴻⴱⴱⵓⵏ, ⵉ ⵜⵎⴻⵟⵟⵓⵜ ⵜⴰⵣⵣⴰⵢⵔⵉⵜ, ⵙ ⵜⵓⵍⵍⵢⴰ ⵏ ⵜⴻⵡⵡⵓⵔⴰ ⵉ ⵜⴻⵣⵎⴻⵔⵜ ⵏ ⵜⵍⴰⵡⵉⵏ ⴰⴽⴽⴻⵏ ⴰⴷ ⵟⵟⴼⴻⵏⵜ ⵉⵎⵓⴽⴰⵏ ⵄⵍⴰⵢⴻⵏ ⴷ ⵓⵜⵜⴻⴽⴽⵉ ⵉⵍⵀⴰⵏ ⴷⴻⴳ ⵓⵙⴻⴽⴼⴻⵍ ⵏ ⵔⵔⴰⵢ ⴰⵖⴻⵍⵏⴰⵡ".
ⵙⴻⴳ ⵜⴰⵎⴰ-ⵙ, ⵢⴻⵏⵏⴰ-ⴷ ⴰⵏⴻⵎⵀⴰⵍ ⴰⵎⴰⵜⴰⵢ ⵏ ⵍⴰⵎⴰⵏ ⴰⵖⴻⵍⵏⴰⵡ, ⵄⴰⵍⵉ ⴱⴻⴷⴷⴰⵡⵉ, ⴷⴻⴳ ⵡⴰⵡⴰⵍ ⵉ ⴷ-ⵜⴻⵖⵔⴰ ⵙ ⵢⵉⵙⴻⵎ-ⵉⵙ ⵜⵎⴰⵙⴰⵢⵜ ⵏ ⵜⵖⴰⵍⵍⵉⵜ ⵙⵓⵀⵉⵍⴰ ⵃⴰⵎⴻⵍ, ⴱⴻⵍⵍⵉ "ⵜⴰⵎⴻⵟⵟⵓⵜ ⵜⴰⵣⵣⴰⵢⵔⵉⵜ ⵜⵎⴰⵣⴰⵍ ⴷ ⴰⵎⴻⴷⵢⴰ ⵏ ⵜⴻⴱⵖⴻⵙⵜ ⴷ ⵉⵙⴻⴼⵍⴻⵏ ⵉⵎⵉ ⵜⵓⵔⴰ ⵙ ⵓⴷⴻⵎ ⵢⴻⵍⵀⴰⵏ ⴷⴻⴳ ⵓⵎⴻⵣⵔⵓⵢ ⵉ ⵓⵃⴰⵔⴻⴱ ⵖⴻⴼ ⵜⵎⵓⵔⵜ ⴷ ⵜⵎⵓⵏⴻⵏⵜ-ⵉⵏⴻⵙ, ⵖⴻⵔ ⵜⴰⵎⴰ ⵏ ⵢⵉⵔⴳⴰⵣⴻⵏ ⵉ ⴷ-ⵢⴻⵅⴻⴷⵎⴻⵏ ⵛⵛⴰⵏ ⵏ ⵍⴻⵣⵣⴰⵢⴻⵔ", ⵢⴻⵔⵏⴰ ⵉⵡⴻⴽⴽⴻⴷ ⴱⴻⵍⵍⵉ ⴰⵢⴰⴳⵉ "ⵢⴻⵙⵙⴻⴱⴳⴰⵏ-ⴷ ⵍⵡⴻⵍⵀⴰ ⵏ ⵓⵙⴻⵍⵡⴰⵢ ⵏ ⵜⴻⴳⴷⵓⴷⴰ ⵉ ⵓⵙⴻⴱⵖⴻⵙ ⵏ ⵡⴻⵎⴽⴰⵏ ⵏ ⵜⵎⴻⵟⵟⵓⵜ ⴷ ⵓⵜⵜⴻⴽⴽⵉ-ⵉⵏⴻⵙ ⵉⵍⵀⴰⵏ ⴷⴻⴳ ⵍⴻⵇⴷⵉⵛ ⵖⴻⴼ ⵜⵎⵓⵔⵜ".
ⴰⵔⵏⵓ ⵖⴻⵔ
