ⴰⴷⵉⵙ ⴰⴱⴰⴱⴰ (ⵉⵜⵢⵓⴱⵢⴰ) – ⵜⴻⵜⵜⴽⴻⵎⵎⴻⵍ ⴰⵙⵙ-ⴰ ⵏ ⵍⵃⴻⴷ ⴷⴻⴳ ⵜⴰⵎⴰⵏⴻⵖⵜ ⵏ ⵉⵜⵢⵓⴱⵢⴰ, ⴰⴷⵉⵙ ⴰⴱⴰⴱⴰ, ⵍⴻⵇⴷⵉⵛ ⵏ ⵜⵙⵓⵜⵍⵜ ⵜⴰⵎⴰⴳⴷⴰⵢⵜ ⵜⵉⵙ 39 ⵏ ⵜⵉⵎⵍⵉⵍⵉⵜ ⵏ ⵢⵉⵎⵙⴻⵍⵡⴰⵢⴻⵏ ⵏ ⵜⵎⵓⵔⴰ ⴷ ⵜⵏⴻⴱⴱⴰⴹⵉⵏ ⵏ ⵜⴰⴷⵓⴽⴽⵍⵉ ⵜⴰⴼⵔⵉⵇⵉⵜ. ⵜⵉⵎⵍⵉⵍⵉⵜ-ⴰⴳⵉ ⵜⴻⴹⵔⴰ-ⴷ ⴷⴻⴳ ⵢⵉⵡⴻⵜ ⵏ ⵜⵣⴻⵇⵇⴰ ⵢⴻⵇⵇⵏⴻⵏ, ⵙ ⵓⵃⴰⴷⴰⵔ ⵏ ⵓⵎⴻⵣⵡⴰⵔⵓ ⵏ ⵢⵉⴻⵇⵍⵉⴼⴻⵏ, ⵎⴰⵙⵙ ⵙⵉⴼⵉ ⵖⵔⵉⴱ, ⵉ ⵢⴻⵍⵍⴰⵏ ⴷ ⴰⵎⴻⵎⵎⴻⵜⵜⵉⵍ ⵏ ⵓⵙⴻⵍⵡⴰⵢ ⵏ ⵜⴻⴳⴷⵓⴷⴰ, ⵎⴰⵙⵙ ⵄⴻⴱⴷⵓⵍⵎⴻⵊⵉⴷ ⵜⴻⴱⴱⵓⵏ.
ⴷⴻⴳ ⵡⴰⵙⵙ-ⴰⴳⵉ ⵡⵉⵙ ⵙⵉⵏ ⵢⴻⵔⵏⴰ ⴷ ⴰⵏⴻⴳⴳⴰⵔⵓ ⵏ ⵜⵎⵍⵉⵍⵉⵜ ⵉ ⴷ-ⵢⴻⵍⵍⴰⵏ ⵙ ⵡⴰⵏⴰⵎⵓ: "ⴰⴹⵎⴰⵏ ⵏ ⵡⴰⵎⴰⵏ ⴷ ⵡⴰⵏⴰⴳⵔⴰⵡⴻⵏ ⵏ ⵓⵙⵉⵣⴷⴻⴳ ⵢⴻⵍⵀⴰⵏ ⵉ ⵡⴰⴽⴽⴻⵏ ⴰⴷ ⵏⴰⵡⴻⴹ ⵖⴻⵔ ⵢⵉⵙⵡⵉⵢⴻⵏ ⵏ ⵓⵡⴰⵀⵉⵍ 2063", ⴰⴷ ⴷ-ⵙⵙⴻⵔⵙⴻⵏ ⴰⵟⴰⵙ ⵏ ⵢⵉⵙⴻⴼⵔⴻⵯⵏ . ⴳⴰⵔ-ⴰⵙⴻⵏ, ⴰⵙⴻⴼⵔⴻⵯ ⴰⵙⴻⴳⴳⴰⵙⴰⵏ ⵏ ⵓⵎⵙⴻⵍⵡⴰⵢ ⵏ ⵜⵙⴻⵇⵇⴰⵎⵓⵜ ⵜⴰⴼⵔⵉⵇⵉⵜ, ⵎⴰⵃⵎⵓⴷ ⵄⵍⵉ ⵢⵓⵙⴻⴼ, ⴷ ⵡⴰⵢⴻⵏ ⵢⴻⵔⵣⴰⵏ ⴰⵡⴰⵀⵉⵍ 2063, ⴰⵏⴻⴳⵎⵓ ⵏ ⵜⴼⵍⴰⵃⵜ ⴷ ⵍⴻⵇⴷⵉⵛ ⵏ ⵍⴱⴰⵏⴽ ⴰⴼⵔⵉⵇⵉ.
ⴰⵎ ⵢⴻⴽⴽⴰ ⵍⵇⴰⴷ, ⴰⵙⵇⴰⵎⵓ ⴰⴷ ⵢⴰⴷⵉ ⵢⵉⵡⴻⵏ ⵓⵙⴻⴼⵔⴻⵯ ⵢⴻⵔⵣⴰⵏ ⵡⴰⵢⴻⵏ ⵉ ⴷ-ⵢⴻⵊⵊⴰ ⵡⴰⵃⴻⵜⵜⴻⵍⵉ ⵢⴻⵜⵜⵓⵙⴻⵎⵎⴰⵏ ⴷ ⵜⴰⵡⴰⵖⵉⵜ ⵎⴳⴰⵍ ⵜⵉⴼⴳⴰⵏⵉⵜ. ⴰⴷ ⵙⵙⵉⵡⵍⴻⵏ ⴷⴰⵖⴻⵏ ⵖⴻⴼ ⵍⴱⴰⵟⴻⵍ ⵢⴻⴹⵔⴰ-ⴷ ⴷⴻⴳ ⵓⵣⵎⴻⵣ ⵏ ⵓⴽⴽⴻⵔ ⵏ ⵢⵉⵎⴷⴰⵏⴻⵏ ⴷ ⵡⴰⵃⴻⵜⵜⴻⵍ ⵉ ⵢⴻⵍⵍⴰⵏ ⴷ ⴰⵏⴳⵓⴹ ⵏ ⵢⵉⵖⴻⵔⴼⴰⵏ ⵎⴳⴰⵍ ⵢⵉⴼⵔⵉⵇⵉⵢⴻⵏ.
ⵜⴰⵙⴻⵇⵇⴰⵎⵓⵜ ⵜⴰⴼⵔⵉⵇⵉⵜ ⴰⴷ ⴷ-ⵜⴻⴼⴽ ⴷⴰⵖⴻⵏ ⴰⵙⴻⴼⵔⴻⵯ-ⵉⵙ ⵖⴻⴼ ⵍⵃⴰⵍⴰ ⵏ ⴼⴰⵍⴰⵙⵟⵉⵏ ⵢⴻⵜⵜⵡⴰⵃⴻⵜⵜⵍⴻⵏ. ⴷⴻⴳ ⵜⴰⴳⴳⴰⵔⴰ, ⴰⵙⴻⵍⵡⴰⵢ ⴰⵎⴰⵢⵏⵓ ⵏ ⵜⴰⴷⵓⴽⴽⵍⵉ ⵜⴰⴼⵔⵉⵇⵉⵜ, ⴰⵙⴻⵍⵡⴰⵢ ⵏ ⴱⵓⵔⵓⵏⴷⵉ, ⵎⴰⵙⵙ ⵉⴼⴰⵔⵉⵙⵜ ⵏⴷⴰⵢⵉⵛⵉⵎⵉⵢⵉ, ⴰⴷ ⴷ-ⵢⴻⵖⵔⴻ ⴰⵡⴰⵍ ⴰⵏⴻⴳⴳⴰⵔⵓ ⵏ ⵜⵎⵍⵉⵍⵉⵜ.
ⴷⴻⴳ ⵜⵉⴳⵏⵉⵜ-ⴰⴳⵉ ⵉⵊⴻⵀⴷⴻⵏ ⵏ ⵓⵎⴻⵣⵔⵓⵢ ⵏ ⵜⵎⴻⵏⵣⵓⵜ-ⵏⵏⴻⵖ, ⵍⵣⵣⴰⵢⴻⵔ ⵜⴻⵙⵙⴻⵊⴷⴻⴷ ⴱⴻⵍⵍⵉ ⵜⴻⵇⵇⴻⵏ ⵖⴻⵔ ⵜⵉⴼⵔⴰⵜⵉⵏ ⵏ ⵜⵍⴻⵡⵡⵉⵜ (ⵙⵙⵍⴰⵎ) ⴷ ⵓⵎⵢⴰⵡⴰⵙ ⴳⴰⵔ ⵢⵉⴼⵔⵉⵇⵉⵢⴻⵏ ⵉ ⵡⴰⴽⴽⴻⵏ ⴰⴷ ⴼⵔⵓⵏ ⵉⵖⵉⵍⵉⴼⴻⵏ ⵏ ⵜⴼⵔⵉⵇⵜ ⵡⴰⵃⴷ-ⵙⴻⵏ. ⵍⵣⵣⴰⵢⴻⵔ ⴰⴷ ⵜⴻⴽⵎⵎⴻⵍ ⴰⴷ ⵜⴻⴼⴽ ⵜⴰⵣⵎⴻⵔⵜ-ⵉⵙ ⵉ ⵡⴰⴽⴽⴻⵏ ⴰⴷ ⴷ-ⵢⵉⵍⵉ ⵍⴰⵎⴰⵏ ⴷ ⵓⵃⴰⴷⴰⵔ ⵏ ⵢⵉⵖⴻⵔⴼⴰⵏ.
ⵜⵓⴽⴽⵉ-ⴰⴳⵉ ⵏ ⵍⵣⵣⴰⵢⴻⵔ ⵜⴻⵙⴽⴰⵏⴰⵢ-ⴷ ⵍⴻⴱⵖⵉ ⵏ ⵓⵙⴻⵍⵡⴰⵢ ⵄⴻⴱⴷⵓⵍⵎⴻⵊⵉⴷ ⵜⴻⴱⴱⵓⵏ ⵉ ⵡⴰⴽⴽⴻⵏ ⴰⴷ ⵊⵊⴻⵀⴷⴻⵏ ⵢⵉⴱⵔⵉⴷⴻⵏ ⵏ ⵓⵎⵢⴻⵍⵍⴻⵍ ⴷ ⵜⵎⴻⵏⵏⵓⵜ ⴳⴰⵔ ⵜⵎⵓⵔⴰ ⵏ ⵜⴼⵔⵉⵇⵜ, ⵉ ⵡⴰⴽⴽⴻⵏ ⴰⴷ ⵢⵉⵍⵉ ⵓⵏⴻⴳⵎⵓ ⵓⵔⴰⵙⵡⴰⵢ ⴷ ⵍⴰⵎⴰⵏ ⴷⴻⴳ ⵎⴰⵕⵕⴰ ⵜⵎⴻⵏⵣⵓⵜ.
ⴰⵔⵏⵓ ⵖⴻⵔ
