ⵉⵙⵙⴻⵡⴻⵍ-ⴷ ⵓⵙⵇⴰⵎⵓ ⴰⵎⴻⵇⵔⴰⵏ ⵏ ⵍⵉⵙⵍⴰⵎ, ⴰⵙⵙ-ⴰ ⵏ ⵍⵃⴻⴷ ⴷⵉ ⵜⵡⵉⵍⴰⵢⵜ ⵏ ⵜⵉⵣⵉ ⵡⴻⵣⵣⵓ, ⵉ ⵢⵉⵡⴻⵜ ⵏ ⵜⵉⵎⵍⵉⵍⵉⵜ ⵏ ⵜⵎⵓⵙⵏⵉ ⵖⴻⴼ ⵍⵡⴻⵔⵜ ⵏ ⵜⵖⴻⵔⵎⴰ ⵏ ⵓⵙⴻⵍⵎⴰⴷ ⵎⵓⵍⵓⴷ ⵇⴰⵙⴻⵎ ⵏⴰⵢⵜ ⴱⴻⵍⵇⴰⵙⴻⵎ ⵙ ⵓⵣⵡⴻⵍ "ⵉⵙⵙⴻⵎ ⵏ ⵓⵙⴻⵍⵎⴰⴷ ⵎⵓⵍⵓⴷ ⵇⴰⵙⴻⵎ ⴷⴻⴳ ⵓⵅⴻⵎⵎⴻⵎ ⴷ ⵜⵙⴻⴽⵍⴰ ⵏ ⵍⴻⵣⵣⴰⵢⴻⵔ".
ⵜⵉⵎⵍⵉⵍⵉⵜ-ⴰ, ⵉ ⴷ-ⵢⴻⵍⵍⴰⵏ ⴷⵉ ⵜⵣⴻⵇⵇⴰ ⵏ ⵢⵉⴷⵍⴻⵙ ⵎⵓⵍⵓⴷ ⵎⴰⵄⵎⴻⵔⵉ ⵙ ⵜⵉⵍⵉⵜ ⵏ ⵍⵡⴰⵍⵉ ⵏ ⵜⵉⵣⵉ ⵡⴻⵣⵣⵓ, ⵎⴰⵙⵙ ⴰⴱⵓ ⴱⴰⴽⵔ ⵓⵙⵙⴻⴷⴷⵉⵇ ⴱⵓⵙⴻⵜⵜⴰ, ⵜⴻⴳⴳⴰ-ⴷ ⴰⵣⴰⵍ ⵉ ⵓⴱⵔⵉⴷ ⵏ ⵓⵙⴻⵍⵎⴰⴷ ⵏⴰⵢⵜ ⴱⴻⵍⵇⴰⵙⴻⵎ, ⵢⵉⵡⴻⵏ ⵖⴻⴼ ⵢⴻⵙⵙⴻⵏⵜⵉ ⵓⵅⴻⵎⵎⴻⵎ ⴰⵍⴻⵣⵣⴰⵢⵔⵉ ⴰⵎⴰⵢⵏⵓ, ⴰⴽⴽⴻⵏ ⴰⴷ ⴷ-ⵙⵙⵉⴼⵔⴻⵏ ⵜⵉⵣⴻⵎⵎⴰⵔ ⵏ ⵓⵙⴻⵏⴼⴰⵔ-ⵉⵙ ⵏ ⵜⵏⴻⴼⵍⵉⵜ.
ⴷⴻⴳ ⵡⴰⵡⴰⵍ-ⵉⵙ ⴷⴻⴳ ⵓⵍⴷⴰⵢ ⵏ ⵜⵎⵍⵉⵍⵉⵜ-ⴰ, ⴰⵙⴻⵍⵡⴰⵢ ⵏ ⵓⵙⵇⴰⵎⵓ ⴰⵎⴻⵇⵔⴰⵏ ⵏ ⵍⵉⵙⵍⴰⵎ, ⴰⴷⵓⴽⵜⵓⵔ ⵎⴰⴱⵔⵓⴽ ⵣⴻⵢⴷ ⵍⵅⴻⵢⵔ, ⵢⴻⵙⵙⴻⴼⵔⴻⵔ-ⴷ ⴱⴻⵍⵍⵉ ⴰⵙⵎⴻⴽⵜⵉ ⵏ ⵓⵅⴻⵎⵎⴻⵎ ⵏ ⵎⵓⵍⵓⴷ ⵇⴰⵙⴻⵎ ⴰⵙⵙ-ⴰ ⴷ ⴰⵙⵎⴻⴽⵜⵉ ⵏ ⵢⵉⵡⴻⵜ ⵏ ⵜⵏⵓⵔⴷⴰ (ⵜⵉⵏⵎⴻⵍ) ⵜⴰⴽⵎⵉⵍⵜ ⵉ ⵢⴻⵣⵎⴻⵔⵏ ⴰⴷ ⵜⴻⴳ ⴰⵙⴻⵏⴼⴰⵔ ⵏ ⵓⵙⴻⴳⵎⵉ ⴷ ⵢⵉⴷⵍⴻⵙ ⵉ ⵢⴻⵣⴷⵉⵏ ⴳⴰⵔ ⵍⴰⵚⴻⵍ ⴷ ⵓⵜⵡⴰⵏ (ⵜⴰⵎⴰⵢⵏⵓⵜ).
ⵍⴻⵛⵖⴰⵍ ⵏ ⵜⵎⵍⵉⵍⵉⵜ-ⴰ ⴷⴷⴰⵏ-ⴷ ⴷⴻⴳ ⵙⵏⴰⵜ ⵏ ⵜⵓⵔⴰ (ⵜⵉⵖⵉⵎⵉⵢⵉⵏ). ⴷⴻⴳ ⵜⵓⵔⴰ ⵜⴰⵎⴻⵣⵡⴰⵔⵓⵜ, ⵡⵉⴷ ⵉ ⴷ-ⵢⴻⴽⴽⴰⵏ ⵙⵙⴰⵡⵍⴻⵏ-ⴷ ⵖⴻⴼ ⵜⵓⴷⴻⵔⵜ ⴷ ⵜⵎⴻⵀⴻⵍⵜ ⵏ ⵓⵅⴻⵎⵎⴻⵎ ⵏ ⵎⵓⵍⵓⴷ ⵇⴰⵙⴻⵎ, ⵙ ⵜⴻⵢⵢⵓⵜ ⵏ ⵓⵙⴻⵍⵎⴰⴷ ⵎⵓⵃⴰⵎⴻⴷ ⵚⵚⴻⵖⵉⵔ ⴱⴻⵍⵍⴰⵄⵍⴰⵎ ⵖⴻⴼ ⵜⵎⵓⵙⵏⵉ ⵏ ⵓⵎⵅⴻⵎⵎⴻⵎ-ⴰ ⵢⴻⵔⵔⴰⵏ "ⴳⴰⵔ ⵓⵍⴷⴰⵢ ⴷ ⵓⵃⴰⴷⴻⵔ", ⴰⴽⴽⴻⴷ ⵡⴰⵡⴰⵍ ⵏ ⵓⴷⵓⴽⵜⵓⵔ ⵎⵓⵍⵓⴷ ⵄⵡⵉⵎⴻⵔ ⴷ ⵓⴷⵓⴽⵜⵓⵔ ⵙⴰⵄⵉⴷ ⴱⵓⵢⵣⵔⵉ ⵖⴻⴼ "ⵓⵏⵇⵉⴷ ⵏ ⵓⵅⴻⵎⵎⴻⵎ ⴷ ⵜⵓⴷⴻⵔⵜ ⵜⴰⵍⴻⵎⵎⴰⵙⵜ" ⵉⵡⴰⴽⴽⴻⵏ ⴰⴷ ⵜⴻⴱⵏⵓ ⵜⵎⵓⵖⵍⵉ ⵜⴰⵖⴻⵍⵏⴰⵡⵜ ⵢⴻⵣⴷⵉⵏ.
ⵎⴰ ⴷ ⵜⵓⵔⴰ ⵜⵉⵙ ⵙⵏⴰⵜ, ⵙⵙⴰⵡⵍⴻⵏ-ⴷ ⴷⴳⴻⵙ ⵖⴻⴼ ⵜⵎⵓⵖⵍⵉ ⵜⴰⵙⴻⴳⵎⴰⵏⵜ ⵏ ⵎⵓⵍⵓⴷ ⵇⴰⵙⴻⵎ, ⵙ ⵡⴰⵡⴰⵍ ⵏ ⵓⵙⴻⵍⵎⴰⴷ ⵙⴰⵄⵉⴷ ⵎⴰⵄⵓⵍ ⴷ ⵓⴷⵓⴽⵜⵓⵔ ⵅⴰⵍⵉⵍ ⵇⴰⴹⵉ ⴷ ⵓⴷⵓⴽⵜⵓⵔ ⵣⴰⴽⴰⵔⵢⴰ ⵖⵓⴱⵔⵉⵏⵉ ⵖⴻⴼ "ⵜⵎⵓⵙⵏⵉ ⵏ ⵓⵙⴻⵍⵎⴻⴷ ⴰⵚⵍⵉ ⴷ ⵓⴱⵏⵓ ⵏ ⵡⴰⵡⴰⵍ ⵏ ⵜⵖⴻⵔⵎⴰ".
ⴷⴻⴳ ⵜⴰⴳⴳⴰⵔⴰ, ⵡⵉⴷ ⵉ ⴷ-ⵢⴻⴽⴽⴰⵏ ⵏⵏⴰⵏ-ⴷ ⴱⴻⵍⵍⵉ ⴰⵅⴻⵎⵎⴻⵎ ⵏ ⵓⵙⴻⵍⵎⴰⴷ ⵎⵓⵍⵓⴷ ⵇⴰⵙⴻⵎ ⴷ ⵍⵡⴻⵔⵜ ⴰⵎⴻⵇⵔⴰⵏ ⵢⴻⵟⵟⴰⴼⴰⵔⴻⵏ ⴰⵙⵊⴻⵀⴻⴷ ⵏ ⵜⵎⵓⵙⵏⵉ ⵜⴰⴷⴻⵍⵙⴰⵏⵜ ⴷ ⵓⴱⵏⵓ ⵏ ⵜⵙⵓⵜⴰ ⵢⴻⴼⵔⵃⴻⵏ ⵙ ⵍⴰⵚⴻⵍ-ⵉⵙ, ⵢⴻⵣⵎⴻⵔⵏ ⴰⴷ ⵜⵇⴰⴱⴻⵍ ⵜⵉⵎⴻⵏⵜⴰⵍⵢⵉⵏ ⵏ ⵢⵉⵎⴰⵍ ⵙ ⵜⵎⵓⵖⵍⵉ ⵢⴻⴼⵔⴰⵏ.
ⵜⴼⵓⴽ ⵜⵎⵍⵉⵍⵉⵜ ⵙ ⵢⵉⵡⴻⵏ ⵓⵎⵓⵎⵓ ⵏ ⵜⵉⵏⵢⵉⵔⵉⵏ ⵉ ⴷ-ⵢⴻⵙⵙⴰⵡⴰⵍⴻⵏ ⵉⵡⴰⴽⴽⴻⵏ ⴰⴷ ⵏⵙⴻⵅⴷⴻⵎ ⵜⵉⵏⵓⵔⴷⴰ-ⴰ ⵜⴰⵎⵅⴻⵎⵎⴻⵎⵜ ⴷⴻⴳ ⵢⵉⴱⵔⵉⴷⴻⵏ ⵏ ⵢⵉⴷⵍⴻⵙ ⴷ ⵓⵙⴻⴳⵎⵉ ⴷ ⵓⵙⴻⵍⵎⴻⴷ ⵏ ⴷⴷⵉⵏ.
ⴰⵔⵏⵓ ⵖⴻⵔ
