ⵉⵙⴻⴷⴷⴰ ⴷⴷⵓⴽⵜⵓⵔ ⵃⵎⴻⴷ ⵍⴱⴰⵚⵉⵍⵉ, ⵙⴻⴳ ⵜⵎⴻⵣⴳⵉⴷⴰ ⵏ ⵍ'ⴻⵣⵀⴻⵕ ⵛⵛⴰⵔⵉⴼ ⴷⴻⴳ ⵎⴰⵚⴻⵕ, ⵜⴰⵎⴻⴷⴷⵉⵜ ⵏ ⵢⵉⴹⴻⵍⵍⵉ ⵍⵃⴻⴷ ⴷⴻⴳ ⵡⴻⵀⵔⴰⵏ, ⵢⵉⵡⴻⵏ ⵏ ⵓⵙⴰⵔⴰⴳ ⵖⴻⴼ ⵜⵜⵔⴻⴱⴳⴰ ⵜⴰⵚⵓⴼⵉⵜ ⵖⴻⵔ ⵜⵡⴰⵛⵓⵍⵜ ⵏ ⵏⵏⴱⵉ (ⴰⴰⵍ ⵍⴱⵉⵜ) ⵉⵄⵣⵉⵣⴻⵏ, ⴰⵢⴰ ⴷⴻⴳ ⵓⵇⴰⵍⴻⴱ ⵏ ⵡⴰⵙⵙ ⵡⵉⵙ ⵓⴽⴽⵓⵥ (4) ⵏ ⵍⴻⵇⴷⵉⵛⴰⵜ ⵏ ⵜⴻⵎⵍⵉⵍⵉⵜ ⵜⵉⵙ 18 ⵏ ⵓⵎⴰⵣⵔⴰⵔ ⵏ ⵜⴻⵎⵙⵉⵔⵉⵏ ⵜⵉⵎⵃⴻⵎⵎⴰⴷⵉⵢⵉⵏ ⵏ ⵣⵣⴰⵡⵢⴰ ⵜⴰⴱⴻⵍⵇⴰⵢⴷⵉⵜ ⵜⴰⵀⴻⴱⵔⵉⵜ.
ⵢⴻⵏⵏⴰ-ⴷ ⴷⴷⵓⴽⵜⵓⵔ ⵍⴱⴰⵚⵉⵍⵉ ⴱⴻⵍⵍⵉ "ⵉⵎⴻⵇⵔⴰⵏⴻⵏ-ⵏⵏⴻⵖ ⴰⴰⵍ ⵍⴱⵉⵜ ⴼⴽⴰⵏ ⴰⵣⴰⵍ ⵉ ⵡⴰⵢⴻⵏ ⴰⴽⴽ ⵉⵅⴻⴷⴷⵎⴻⵏ ⵢⴻⵔⵏⴰ ⵉⵙⵙⴻⴼⵜⴰⵢⴻⵏ ⵜⵜⵔⴻⴱⴳⴰ ⵜⴰⵚⵓⴼⵉⵜ ⵙ ⵓⵥⴰⵔ ⴷ ⵓⴼⵙⴰⵢ", ⵉⵙⵙⴻⴱⴳⴻⵏ-ⴷ ⴱⴻⵍⵍⵉ ⴼⴽⴰⵏ-ⴰⵙ ⵉ ⵜⵜⵔⴻⴱⴳⴰ ⵜⴰⵚⵓⴼⵉⵜ ⵉⵏⴰⴳⵔⴰⵡⴻⵏ ⵉⵡⵓⵎⵉ ⵙⴻⵎⵎⴰⵏ 'ⵟⵟⴰⵔⵉⵇⴰ' (ⴰⴱⵔⵉⴷ), ⵢⴻⵔⵏⴰ ⵙⴻⵔⵙⴻⵏ-ⴰⵙ ⵜⵉⴳⴻⵊⴷⴰ ⵉ ⵟⵟⴰⵔⵉⵇⴰ-ⵢⴰ.
ⵉⵡⴻⴽⴽⴻⴷ-ⴷ ⴱⴻⵍⵍⵉ ⴰⴽⴽ ⵟⵟⵓⵔⵓⵇ ⵜⵉⵚⵓⴼⵉⵢⵉⵏ ⵙ ⵙⴹⵉⵙ (6) ⵢⵉⴷ-ⵙⴻⵏⵜ, ⵖⴻⴼ ⵍⵎⴻⵖⵕⴻⴷ-ⵏⵙⴻⵏⵜ, ⴰⵎ ⵜⵇⴰⴷⵉⵔⵉⵜ, ⵔⵔⵉⴼⴰⵄⵉⵜ, ⵛⵛⴰⴷⴷⵉⵍⵉⵜ, ⵍⵅⴻⵍⵡⴰⵜⵉⵜ, ⵏⵏⴰⵇⵛⴰⴱⴻⵏⴷⵉⵜ ⴷ ⵜⵜⵉⴵⴰⵏⵉⵜ, ⴷ ⴰⴰⵍ ⵍⴱⵉⵜ ⵉ ⵜⴻⵏⵜ-ⵉⴷ-ⵢⴻⵙⵙⴻⵔⵙⴻⵏ.
ⵉⵙⴻⴱⴳⴻⵏ-ⴷ ⵓⵎⵙⴰⵔⴰⴳ-ⴰ, ⵙⵉ ⵜⴰⵎⴰ ⵏⵏⵉⴹⴻⵏ, ⴱⴻⵍⵍⵉ ⵉⵎⴻⵇⵔⴰⵏⴻⵏ ⵏ ⴰⴰⵍ ⵍⴱⵉⵜ ⵙⵄⴰⵏ ⴰⵣⴰⵍ ⴷ ⴰⵎⴻⵇⵔⴰⵏ ⴷⴻⴳ ⵜⵓⵙⵙⵏⴰ ⵏ ⵍⵃⴰⴷⵉⵜ, ⵉⵎⵉ ⴰⵀⵍ ⵙⵙⵓⵏⵏⴰ ⵜⵜⴻⴽⴽⴰⵏ ⵖⴻⴼ ⵜⵔⵉⵔⵉⵢⵉⵏ-ⵏⵙⴻⵏ (ⵔⵔⵉⵡⴰⵢⴰⵜ-ⵏⵙⴻⵏ), ⵢⴻⴱⴷⴻⵔ-ⴷ ⵙ ⵜⴻⴳⵏⵉⵜ-ⴰ ⵍⴻⵃⴰⴷⵉⵜ ⵉ ⴷ-ⵜⵜⵡⴰⵡⵡⵉⵏⵜ ⵙ ⵜⵙⴻⴷⴷⵉ ⵖⴻⴼ ⵄⵍⵉ ⴱⴻⵏ ⴰⴱⵉ ⵟⴰⵍⴻⴱ ⴷ ⵎⴰⵙⵙⴰ ⴼⴰⵟⵉⵎⴰ ⵣⵣⴻⵀⵔⴰ, ⵉⵔⴹⴰ ⵕⴻⴱⴱⵉ ⴼⴻⵍⵍ-ⴰⵙⴻⵏ.
ⵢⴻⵍⵍⴰ-ⴷ ⴷⴻⴳ ⵡⴰⵙⵙ ⵡⵉⵙ ⴽⵔⴰⴹ (3) ⵏ ⵓⵎⴰⵣⵔⴰⵔ ⵏ ⵜⴻⵎⵙⵉⵔⵉⵏ ⵜⵉⵎⵃⴻⵎⵎⴰⴷⵉⵢⵉⵏ ⵉ ⴷ-ⵢⴻⵡⵡⵉⵏ ⴰⵙⴻⴳⴳⴰⵙ-ⴰ ⵖⴻⴼ ⵡⵓⴷⴻⵎ ⵏ "ⵍⴻⵊⵀⵓⴷ ⵏ ⵢⵉⵎⴻⵇⵔⴰⵏⴻⵏ ⵏ ⵜⵚⵓⴼⵉⵜ ⴷⴻⴳ ⵓⵇⴷⴻⵛ ⵏ ⵍⵇⵓⵔ'ⴰⵏ ⵍⴽⴰⵔⵉⵎ ⴷ ⵜⵓⵙⵙⵏⵉⵡⵉⵏ ⵏ ⵛⵛⴰⵔⵉⵄⴰ ⵜⵉⵏⴻⵙⵍⴻⵎⵜ", ⴰⵙⴻⵏⵄⴻⵜ ⵏ ⵙⵉⵏ ⵏ ⵢⵉⵙⴰⵔⴰⴳⴻⵏ ⵖⴻⴼ ⵉⵍⵓⴳⴰⵏ ⵏ ⵢⵉⵎⴻⵇⵔⴰⵏⴻⵏ ⵉⵙⵓⴼⵉⵢⴻⵏ ⵙⴻⴳ ⵜⴻⴽⵜⴰⴱⵜ ⵏ "ⴰⵍⴰⵏⵡⴰⵕ ⵍⵇⵓⴷⵙⵉⵢⴰ" ⵏ ⵍⵉⵎⴰⵎ ⵙⵉⴷⵉ ⵄⴻⴱⴷⴻⵍⵡⴻⵀⴰⴱ ⵛⵛⵄⴻⵕⴰⵏⵉ, ⵉ ⴷ-ⵢⴻⴼⴽⴰ ⴷⴷⵓⴽⵜⵓⵔ ⵉⵍⵢⴰⵙ ⵄⴻⵎⵔⵓⵛ ⵏ ⵍⴻⵣⵣⴰⵢⴻⵔ, ⴷ ⵓⵇⴷⴻⵛ ⵏ ⵢⵉⵎⴻⵇⵔⴰⵏⴻⵏ ⵏ ⵜⵚⵓⴼⵉⵜ ⵉ ⵍⴼⵉⵇⵀ ⴰⵎⴰⵍⴽⵉ ⵏ ⴷⴷⵓⴽⵜⵓⵔ ⵎⵓⵙⴰ ⵙⵎⴰⵄⵉⵍ ⵏ ⵍⴻⵣⵣⴰⵢⴻⵔ.
ⵜⵜⵡⴰⴱⴻⵔⵏⴻⵎⵊⴻⵏ-ⴷ ⴰⵙⵙ-ⴰ ⵏ ⵍⴻⵜⵏⴰⵢⴻⵏ, ⵎⴱⴰⵄⴷ ⵏ ⵜⵥⴰⵍⵍⵉⵜ ⵏ ⵍⵄⴰⵚⴻⵕ ⴷ ⵜⵜⵔⴰⵡⵉⵃ, ⵜⵍⴰⵜⴰ (3) ⵏ ⵢⵉⵙⴰⵔⴰⴳⴻⵏ ⵖⴻⴼ "ⵍⴻⵊⵀⵓⴷ ⵏ ⵢⵉⵎⴻⵇⵔⴰⵏⴻⵏ ⵏ ⵜⵚⵓⴼⵉⵜ ⴷⴻⴳ ⵓⵇⴷⴻⵛ ⵏ ⵍⴼⵉⵇⵀ ⴰⵃⴻⵏⴱⴰⵍⵉ" ⵏ ⵓⵙⴻⵍⵎⴰⴷ ⵄⴻⴱⴷⴻⵍⵇⴰⴷⴻⵔ ⵃⴰⵢⴷⴰ ⵙⴻⴳ ⵍⴻⵣⵣⴰⵢⴻⵔ, ⴷ "ⵜⵜⴰⴼⵙⵉⵔ ⴷ ⵜⴻⵖⵔⵉⵡⵉⵏ ⴷⴻⴳ ⵜⴻⴽⵜⴰⴱⵉⵏ ⵏ ⵢⵉⵎⴻⵇⵔⴰⵏⴻⵏ ⵏ ⵜⵚⵓⴼⵉⵜ" ⵏ ⴷⴷⵓⴽⵜⵓⵔ ⴱⵔⴰⵀⵉⵎ ⵍⵀⵓⴷⵀⵓⴷ ⵙⴻⴳ ⵎⴰⵚⴻⵕ, ⴷ "ⵍⵉⵎⴰⵎ ⵍⵃⴰⴼⵉⴹ ⵎⵓⵃⵢⵉ ⴷⴷⵉⵏ ⵏⵏⴰⵡⴰⵡⵉ ⵉⵔⴹⴰ ⵕⴻⴱⴱⵉ ⴼⴻⵍⵍ-ⴰⵙ ⴰⵎⵓⵙⵏⴰⵡ ⴰⵙⴻⴷⴷⴰⵏ ⴷ ⵓⵚⵓⴼⵉ ⴰⵃⴻⵇⵇⵉ" ⵏ ⵛⵛⵉⵅ ⵎⵓⵃⴻⵎⵎⴻⴷ ⵍⴼⴻⵃⵃⴰⵎ ⵙⴻⴳ ⵙⵓⵔⵢⴰ.
ⵢⴻⵜⵜⴽⴻⵎⵎⵉⵍ ⵓⵎⴰⵣⵔⴰⵔ ⵏ ⵜⴻⵎⵙⵉⵔⵉⵏ ⵜⵉⵎⵃⴻⵎⵎⴰⴷⵉⵢⵉⵏ ⵉ ⴷ-ⵜⵀⴻⴳⴳⴰ ⵣⵣⴰⵡⵢⴰ ⵜⴰⴱⴻⵍⵇⴰⵢⴷⵉⵜ ⵜⴰⵀⴻⴱⵔⵉⵜ ⵢⴰⵍ ⴰⵙⴻⴳⴳⴰⵙ ⴷⴻⴳ ⵡⴻⵅⵅⴰⵎ-ⵉⵙ ⵢⴻⵍⵍⴰⵏ ⴷⴻⴳ ⵜⵖⵉⵡⴰⵏⵜ ⵏ ⵙⵉⴷⵉ ⵎⴻⵄⵔⵓⴼ (ⴰⴳⵎⵓⴹ ⵏ ⵡⴻⵀⵔⴰⵏ) ⴰⵍⴰⵎⵎⴰ ⴷ 7 ⴷⴻⴳ ⵎⴻⵖⵔⴻⵙ-ⴰ, ⵙ ⵓⵜⵜⴻⴽⴽⵉ ⵏ ⵜⴻⴳⵔⴰⵡⵜ ⵏ ⵢⵉⵎⵓⵙⵏⴰⵡⴻⵏ ⴷ ⵍⴼⵓⵇⴰⵀⴰ ⵙⴻⴳ ⵍⴻⵣⵣⴰⵢⴻⵔ ⴷ ⵓⵎⴰⴹⴰⵍ ⴰⵏⴻⵙⵍⴻⵎ ⴰⵎ ⵎⴰⵚⴻⵕ, ⵍⵓⴱⵏⴰⵏ, ⵜⵓⵔⴽⵢⴰ, ⵍⵄⵉⵔⴰⵇ, ⵜⵓⵏⴻⵙ, ⵙⵓⵔⵢⴰ ⴷ ⵙⵙⵓⴷⴰⵏ.
