ⴰⴷ ⵢⴻⵜⵜⵓⵎⴹⴻⵍ ⴷⴻⴼⴼⵉⵔ ⵏ ⵜⵥⴰⵍⵍⵉⵜ ⵏ ⵜⴹⵓⵀⴻⵔ ⵏ ⵡⴰⵙⵙ-ⴰ ⵏ ⵍⵃⴻⴷ ⴷⴻⴳ ⵜⵎⴻⵇⴱⴻⵔⵜ ⵏ ⵍⵄⴰⵍⵢⴰ ⴷⵉ ⵍⴷⵣⴰⵢⴻⵔ ⵜⴰⵎⴰⵏⴻⵖⵜ, ⵍⴵⴻⵜⵜⴰ ⵏ ⵍⵎⴻⵔⵃⵓⵎ ⴰⵎⴵⴰⵀⴻⴷ ⴷ ⵓⴷⵉⵒⵍⵓⵎⴰⵙⵉ ⴰⵇⴱⵓⵔ ⵏⵓⵔⴻⴷⵉⵏ ⴵⵓⴷⵉ, ⵉ ⴷ-ⵢⴻⵡⵡⵉ ⵕⴻⴱⴱⵉ ⵉⴹⴻⵍⵍⵉ ⵏ ⵙⵙⴻⴱⵜ ⵖⴻⴼ ⵍⴻⵄⵎⴻⵔ ⵢⴻⵡⵡⴹⴻⵏ 92 ⵏ ⵢⵉⵙⴻⴳⴳⴰⵙⴻⵏ, ⴰⴽⴽⴻⵏ ⵉ ⵜ-ⵉⴷ-ⵜⴱⴻⵔⵔⴻⵃ ⵜⵏⴻⵖⵍⴰⴼⵜ ⵏ ⵢⵉⵎⴵⵓⵀⴰⴷ ⴷ ⵡⵉⴷ ⵢⴻⵙⵄⴰⵏ ⵍⵃⴻⵇⵇ.
ⵢⴻⴽⵛⴻⵎ ⵍⵎⴻⵔⵃⵓⵎ ⵣⵉⴽ ⵖⴻⵔ ⵢⵉⴷⵓⵔⴰⵔ ⵏ ⵜⴻⴳⵔⴰⵡⵍⴰ ⵏ ⵓⵙⵍⴻⵍⵍⵉ, ⵢⴻⵔⵏⴰ ⵢⴻⴽⴽⵉ ⴷⴻⴳ ⵓⵙⴻⴱⴷⴻⴷ ⵏ ⵓⴷⵉⵒⵍⵓⵎⴰⵙⵉ ⴰⵣⵣⴰⵢⵔⵉ. ⵢⴻⵍⵍⴰ ⵍⵎⴻⵔⵃⵓⵎ ⴷ ⴰⵎⵙⵓⵇⴻⵍ ⵓⵣⵣⵉⴳ ⵏ ⵓⵣⴰⵎⵓⵍ ⵏ ⵓⵎⴻⵏⵏⵓⵖ ⴷ ⵓⵙⵍⴻⵍⵍⵉ, ⴰⵙⴻⵍⵡⴰⵢ ⵍⵎⴻⵔⵃⵓⵎ ⵏⵉⵍⵙⵓⵏ ⵎⴰⵏⴷⵉⵍⴰ ⵎⵉ ⴰⴽⴽⴻⵏ ⵉ ⴷ-ⵢⵓⵙⴰ ⵖⴻⵔ ⵢⵉⴳⵔⴰⵏ ⵏ ⵍⵄⴻⵙⴽⴻⵔ ⵏ ⵓⵙⵍⴻⵍⵍⵉ ⴰⵖⴻⵍⵏⴰⵡ (ALN), ⴰⵢⴻⵏ ⵉ ⵜ-ⵢⴻⵔⵔⴰⵏ ⴷ ⵉⵏⵉⴳⵉ ⴰⵎⴻⵇⵇⵔⴰⵏ ⵖⴻⴼ ⵜⴻⵎⵍⵉⵍⵉⵜ ⴳⴰⵔ ⵓⵙⵇⴰⵎⵓ ⴰⵖⴻⵍⵏⴰⵡ ⵏ ⵜⴻⴼⵔⵉⵇⵜ (ANC) ⴷ ⵜⵉⵔⵏⵉ ⵏ ⵓⵙⵍⴻⵍⵍⵉ ⴰⵖⴻⵍⵏⴰⵡ (FLN).
ⴷⴻⴼⴼⵉⵔ ⵏ ⵜⵉⵎⵓⵏⴻⵏⵜ, ⵉⴽⴻⵎⵎⴻⵍ ⵍⵎⴻⵔⵃⵓⵎ ⴰⴱⵔⵉⴷ-ⵉⵙ ⴷ ⴰⵎⴻⵇⵇⵔⴰⵏ ⴷⴻⴳ ⵓⴷⵉⵒⵍⵓⵎⴰⵙⵉ ⵉ ⵜ-ⵢⴻⵡⵡⵉⵏ ⵖⴻⵔ ⵡⴰⵟⴰⵙ ⵏ ⵜⵎⴰⵏⴰⵖⵉⵏ ⵏ ⵜⴻⴼⵔⵉⵇⵜ, ⵉⵎⵉ ⵢⴻⵍⵍⴰ ⴷ ⴰⵄⴻⴳⴳⴰⵍ ⴰⵅⴻⴷⴷⴰⵎ ⵉ ⵡⴻⵄⵉⵡⴻⵏ ⵏ ⵍⴷⵣⴰⵢⴻⵔ ⵉ ⴷⴷⵓⴽⴰⵍ ⵏ ⵓⵙⵍⴻⵍⵍⵉ ⴷⵉ ⵜⴻⴼⵔⵉⵇⵜ, ⴰⴽⴽⴻⵏ ⴷⴰⵖⴻⵏ ⵢⴻⵟⵟⴻⴼ ⴰⵎⴹⵉⵇ ⵏ ⵓⵎⴰⵣⵔⴰⵢ ⴰⵎⴰⵜⵓ ⴰⵄⵉⵡⴰⵏ ⵏ ⵜⵓⴷⴷⵙⴰ ⵏ ⵜⴷⵓⴽⵍⵉ ⵜⴰⴼⵔⵉⵇⵉⵜ. ⵢⴻⵜⵜⵡⴰⴼⵔⴰⵏ ⴷ ⴰⵙⴻⵍⵡⴰⵢ ⵏ ⵜⴷⵓⴽⴽⵍⵉ ⵜⴰⴳⵔⴰⵖⵍⴰⵏⵜ ⵏ ⵢⵉⵎⴻⴷⴷⵓⴽⴽⴰⵍ ⵏ ⵜⴻⴳⵔⴰⵡⵍⴰ ⵏ ⵓⵙⵍⴻⵍⵍⵉ ⵏ ⵍⴷⵣⴰⵢⴻⵔ ⴷⴻⴳ ⵓⵙⴻⴳⴳⴰⵙ ⵏ 2024.
ⵣⴷⴰⵜ ⵏ ⵍⵇⴻⵔⵃ-ⴰ ⴰⵎⴻⵇⵇⵔⴰⵏ, ⵢⴻⴼⴽⴰ-ⴷ ⵓⵏⴻⵖⵍⴰⴼ ⵏ ⵢⵉⵎⴵⵓⵀⴰⴷ ⴷ ⵡⵉⴷ ⵢⴻⵙⵄⴰⵏ ⵍⵃⴻⵇⵇ, ⵄⴰⴱⴷⴻⵍⵎⴰⵍⴻⴽ ⵜⴰⵛⵔⵉⴼⵜ, ⵍⵜⴰⵄⵣⵉⵢⴰ-ⵙ ⵍⵇⴰⵢⴻⵏ ⴷ ⵡⴰⵡⴰⵍⴻⵏ ⵏ ⵍⴻⵃⵏⴰⵏⴰ ⵉ ⵢⵉⵎⴰⵏ ⵏ ⵜⵡⴰⵛⵓⵍⵜ ⵏ ⵍⵎⴻⵔⵃⵓⵎ ⴷ ⵜⵡⴰⵛⵓⵍⵜ ⵏ ⵜⴻⴳⵔⴰⵡⵍⴰ, ⵉⵙⵙⵓⵜⵓⵔ ⴷⴻⴳ ⵕⴻⴱⴱⵉ ⴰⵎⴻⵇⵇⵔⴰⵏ ⴰⴷ ⴷ-ⵢⴻⵙⵙⴻⵔⵙ ⵕⵕⴻⵃⵎⴰ-ⵙ ⵡⴻⵙⵙⵉⵄⴻⵏ ⵖⴻⴼ ⵍⵎⴻⵔⵃⵓⵎ, ⵢⴻⵔⵏⴰ ⴰⴷ ⴷ-ⵢⴻⴼⴽ ⵚⵚⴱⴻⵕ ⴰⵎⴻⵇⵇⵔⴰⵏ ⵉ ⵜⵡⴰⵛⵓⵍⵜ-ⵉⵙ ⴷ ⵡⵉⴷ-ⵉⵙ.
ⴰⵔⵏⵓ ⵖⴻⵔ
