ⴰⵙⵙ-ⴰ ⵏ ⵍⵃⴻⴷⴷ ⵉ ⵜⴻⴱⴷⴰ ⵜⵉⴳⴰⵡⵜ ⵏ ⵜⵎⴻⵔⵏⵉⵡⵜ ⵏ ⵜⴱⴻⴷⵢⴰⵔⵢⵉⵏ (lists) ⵏ ⵡⵉⴷ ⴰⵔⴰ ⵢⴻⴼⵔⴻⵏ, ⵉⵡⴰⴽⴽⴻⵏ ⴰⴷ ⴱⴻⴳⴳⵙⴻⵏ ⵉ ⵜⴻⴼⵔⴰⵏⵉⵏ ⵏ ⵍⵒⴰⵔⵍⴰⵎⴰⵏ (legislative) ⵉ ⴷ-ⵢⴻⵍⵍⴰⵏ ⴰⵙⵙ ⵏ 2 ⵢⵓⵍⵢⵓ ⵉ ⴷ-ⵉⵜⴻⴷⴷⵓⵏ. ⵜⵉⴳⴰⵡⵜ-ⴰⴳⵉ ⴰⴷ ⵜⴷⵓⵎ ⴰⵔⵎⵉ ⴷ ⴰⵙⵙ ⵏ ⵍⵃⴻⴷⴷ 26 ⵏ ⵢⴻⴱⵔⵉⵔ.
ⵜⴰⵙⴻⵍⵡⵉⵜ ⵜⴰⵖⴻⵍⵏⴰⵡⵜ ⵏ ⵜⴻⴼⵔⴰⵏⵉⵏ (ANIE) ⵜⴻⵙⵙⴰⵡⴻⵍ ⵉ ⵢⵉⵎⴻⵣⴷⴰⵖ ⵓⵔ ⵏⴻⵣⴷⵉⴱ (ⵓⵔ ⵏⵙⴻⵊⵊⵉⵍ) ⴷⴻⴳ ⵢⵓⵎⵓⵖⴻⵏ ⵏ ⵜⴻⴼⵔⴰⵏⵉⵏ, ⵏⴻⵖ ⵡⵉⴷ ⴰⵔⴰ ⴷ-ⵢⴰⵡⵡⵉⵏ 18 ⵏ ⵢⵉⵙⴻⴳⴳⴰⵙⴻⵏ ⴰⵙⵙ ⵏ ⵏⵠⵓⵜⵉ, ⴰⴷ ⵔⵣⵓⵏ ⵖⴻⵔ ⵍⴱⴰⵍⴰⴷⵉⵢⴰⵜ ⵏⵙⴻⵏ ⵉⵡⴰⴽⴽⴻⵏ ⴰⴷ ⴷ-ⴼⴽⴻⵏ ⵉⵙⵎⴰⵡⴻⵏ ⵏⵙⴻⵏ. ⴰⴽⴽⴻⵏ ⴷⴰⵖⴻⵏ, ⵡⵉⴷ ⵉ ⵉⴱⴻⴷⴷⵍⴻⵏ ⵜⵉⵏⴻⵣⴷⵓⵖⵉⵏ ⵏⵙⴻⵏ (adresse) ⵉⵍⴰⵇ ⴰⴷ ⴱⴻⴷⴷⵍⴻⵏ ⵉⵙⵎⴰⵡⴻⵏ ⵏⵙⴻⵏ ⵖⴻⵔ ⵍⴱⴰⵍⴰⴷⵉⵢⴰ ⵜⴰⵊⴹⵉⵜ. ⵉⵍⴰⵇ ⴽⴰⵏ ⴰⴷ ⴰⵡⵉⵏ ⵍⴽⴰⵖⴻⴹ ⵏ ⵍⵡⵉⴷⴰⵜ (ID) ⴷ ⵍⴽⴰⵖⴻⴹ ⵏ ⵜⵏⴻⵣⴷⵓⵖⵜ (résidence), ⴳⴰⵔ 9:00 ⵏ ⵚⵚⴱⴻⵃ ⴰⵔⵎⵉ ⴷ 4:00 ⵏ ⵜⵎⴻⴷⴷⵉⵜ.
ⵡⵉⴷ ⵉ ⴱⵖⴰⵏ ⴰⴷ ⵡⴰⵍⵉⵏ ⵎⴰ ⵍⵍⴰⵏ ⴷⴻⴳ ⵓⵎⵓⵖ ⵏⴻⵖ ⴱⵖⴰⵏ ⴰⴷ ⴷ-ⴰⵡⵉⵏ ⵍⴽⴰⵖⴻⴹ ⵏ ⵓⵙⴻⵊⵊⴻⵍ, ⵣⴻⵎⵔⴻⵏ ⴰⴷ ⵔⵣⵓⵏ ⵖⴻⵔ ⵓⵙⵎⴻⵍ ⵏ ⵉⵏⵜⴻⵔⵏⴻⵜ ⵏ ⵜⵙⴻⵍⵡⵉⵜ: https://services.ina-elections.dz. ⵎⴰ ⴷ ⵉⵖⵔⵉⴱⴻⵏ ⵢⴻⵣⴷⵉⵖⴻⵏ ⴷⵉ ⴱⴻⵔⵔⴰ, ⵉⵍⴰⵇ ⴰⴷ ⵔⵣⵓⵏ ⵖⴻⵔ ⵍⵇⵓⵏⵚⵓⵍⵉⵢⴰⵜ ⵉⵡⴰⴽⴽⴻⵏ ⴰⴷ ⵅⴻⴷⵎⴻⵏ ⴰⵢⴰⴳⵉ.
ⵎⵉ ⵜⴼⵓⴽ ⵜⴻⵙⵎⵉⵍⵜ-ⴰⴳⵉ ⵏ ⵓⵙⴻⵊⵊⴻⵍ, ⵡⵉⴷ ⵉ ⴱⵖⴰⵏ ⴰⴷ ⴷ-ⴼⴽⴻⵏ ⵉⵎⴰⵏ ⵏⵙⴻⵏ ⵉ ⵜⴻⴼⵔⴰⵏⵉⵏ (partis ⵏⴻⵖ les indépendants) ⴰⴷ ⴱⴷⴰⵏ ⴰⴷ ⵊⴻⵎⵄⴻⵏ ⵔⵛⵢⴰⵜ (signatures). ⵍⵃⴻⵎⵍⴰ ⵏ ⵜⴻⴼⵔⴰⵏⵉⵏ ⴰⴷ ⵜⴻⴱⴷⵓ 23 ⵡⵓⵙⵙⴰⵏ ⵓⵇⴱⴻⵍ ⴰⵙⵙ ⵏ ⵏⵠⵓⵜⵉ, ⴰⴷ ⵜⴼⵓⴽ 3 ⵡⵓⵙⵙⴰⵏ ⵓⵇⴱⴻⵍ ⵜⴰⴳⴰⵔⴰ.
ⵜⵓⵔⴰ, ⵙ ⵓⴱⴻⴷⴷⴻⵍ ⵏ ⵍⵇⴰⵏⵓⵏ ⵏ ⵜⴻⴼⵔⴰⵏⵉⵏ ⴷ ⴷⴷⵓⵙⵜⵓⵔ, ⵜⴰⵙⴻⵍⵡⵉⵜ ⵜⴰⵖⴻⵍⵏⴰⵡⵜ ⵏ ⵜⴻⴼⵔⴰⵏⵉⵏ (ANIE) ⴷ ⵏⴻⵜⵜⴰⵜ ⵉ ⴷ-ⵉⵣⴻⵍⵎⴻⵏ ⵖⴻⴼ ⴽⵓⵍⵍⴻⵛ: ⵙⴻⴳ ⵓⵀⴻⴳⴳⵉ, ⴰⵙⴻⵍⵃⵓ ⴷ ⵓⴹⴻⴱⴱⴻⵔ ⵏ ⵜⴻⴼⵔⴰⵏⵉⵏ, ⵎⴰ ⴷ ⵍⴱⴰⵍⴰⴷⵉⵢⴰ ⴰⴷ ⴷ-ⵜⴻⴼⴽ ⴽⴰⵏ ⵍⵎⴰⵜⵉⵔⵢⴻⵍ ⴷ ⵍⵇⴰⵄⴰ ⵉ ⴷ-ⵉⵍⴰⵇⴻⵏ.
ⴰⵔⵏⵓ ⵖⴻⵔ
