ⵍⵣⵣⴰⵢⴻⵔ ⵜⴰⵎⴰⵏⴻⵖⵜ – ⵎⵎⵓⵜⴻⵏ 32 ⵏ ⵢⵉⵎⴷⴰⵏⴻⵏ ⵢⴻⵔⵏⴰ ⵊⴻⵔⵔⵃⴻⵏ 1056 ⵏⵏⵉⴹⴻⵏ ⴷⴻⴳ 938 ⵏ ⵓⴽⵙⴰⵔⴻⵏ ⵏ ⵓⴱⵔⵉⴷ ⵉ ⴷ-ⵢⴻⴹⵔⴰⵏ ⴷⴻⴳ ⵡⴰⵟⴰⵙ ⵏ ⵜⵎⴻⵏⵏⴰⴹⵉⵏ ⵏ ⵜⵎⵓⵔⵜ, ⴳⴰⵔ ⵡⴰⵙⵙ ⵏ 25 ⴷ 31 ⵢⴻⵏⵏⴰⵢⴻⵔ ⵉⵄⴻⴷⴷⴰⵏ. ⴰⵢⴰ ⵉ ⴷ-ⵢⴻⵏⵏⴰ ⵡⴰⵍⵖⵓ ⵏ ⵜⵏⴻⴱⴷⴰⴷⵜ ⵜⴰⵎⴰⵜⵓⵜ ⵏ ⵓⵃⴰⴷⴰⵔ ⴰⵎⴰⴷⴰⵏ ⴰⵙⵙ-ⴰ ⵏ ⵜⵜⵍⴰⵜⴰ.
ⵢⴻⵙⴼⴻⵔⵔⴻⵯ-ⴷ ⵡⴰⵍⵖⵓ-ⵏⵏⵉ ⴱⴻⵍⵍⵉ ⵜⴰⵎⵏⴰⵟ ⵏ ⴱⵓⵔⵊ ⴱⵓⵄⵔⵉⵔⵉⵊ ⵜⴻⵡⵡⵉ ⴰⵎⵓⵔ ⴰⵎⴻⵇⵇⵔⴰⵏ ⵏ ⵍⵎⵓⵜ, ⵉⵎⵉ ⴷⴻⴳ-ⵙ ⵎⵎⵓⵜⴻⵏ 4 ⵏ ⵢⵉⵎⴷⴰⵏⴻⵏ ⵢⴻⵔⵏⴰ ⵊⴻⵔⵔⵃⴻⵏ 45 ⵏⵏⵉⴹⴻⵏ ⴷⴻⴳ 28 ⵏ ⵓⴽⵙⴰⵔⴻⵏ ⵏ ⵓⴱⵔⵉⴷ.
ⵙⴻⴳ ⵍⵊⵉⵀⴰ ⵏⵏⵉⴹⴻⵏ, ⵢⵉⴳⵔⴰⵡⴻⵏ ⵏ ⵓⵃⴰⴷⴰⵔ ⴰⵎⴰⴷⴰⵏ ⴳⴳⴰⵏ 1062 ⵏ ⵍⴻⵇⴷⵉⵛⴻⵏ ⵉ ⵡⴰⴽⴽⴻⵏ ⴰⴷ ⵙⵙⴻⵏⵙⴻⵏ 618 ⵏ ⵜⵉⵎⵙⵉⵡⵉⵏ (ⵍⵄⴰⴼⵉⵜ). ⵜⵉⵎⵙⵉⵡⵉⵏ-ⴰⴳⵉ ⴹⵔⴰⵏⵜ-ⴷ ⴷⴻⴳ ⵢⵉⵅⴰⵎⵎⴻⵏ ⴷ ⵜⵎⴻⵔⵙⴻⵍⵉⵏ ⵏ ⵜⵎⴻⴳⵓⵔⵉ. ⵜⴰⵎⵏⴰⵟ ⵏ ⵍⵣⵣⴰⵢⴻⵔ ⵜⴰⵎⴰⵏⴻⵖⵜ ⵜⴻⵙⵄⴰ 92 ⵏ ⵜⵉⵎⵙⵉⵡⵉⵏ, ⵄⴻⵏⵏⴰⴱⴰ 44, ⵎⴰ ⴷ ⵡⴻⵀⵔⴰⵏ 40.
ⵖⴻⴼ ⵡⴰⵢⴻⵏ ⵢⴻⵔⵣⴰⵏ ⴰⵙⵎⴻⵎⵎⵉ ⵏ ⵓⴳⴰⵣ (ⴰⴽⵙⵉⴷ ⵏ ⵍⴽⴰⵔⴱⵓⵏ) ⵉ ⴷ-ⵉⵜⴻⴼⴼⵖⴻⵏ ⵙⴻⴳ ⵡⴰⵍⴰⵜⴻⵏ ⵏ ⵓⵃⵎⵓ ⴷ ⵢⵉⵙⵉⵏⵏⵉⵡⴻⵏ ⵏ ⵡⴰⵎⴰⵏ, ⵉⵅⴻⴷⴷⴰⵎⴻⵏ ⵏ ⵓⵃⴰⴷⴰⵔ ⴰⵎⴰⴷⴰⵏ ⴳⴳⴰⵏ 57 ⵏ ⵍⴻⵇⴷⵉⵛⴻⵏ. ⵙⴻⵍⵍⴽⴻⵏ 124 ⵏ ⵢⵉⵎⴷⴰⵏⴻⵏ ⵉ ⵢⴻⵜⵜⵓⵙⵎⴻⵎⵎⴻⵏ, ⵎⴻⵄⵏⴰ ⵎⵎⵓⵜⴻⵏ 9 ⵏⵏⵉⴹⴻⵏ: ⵙⵉⵏ ⴷⴻⴳ ⵍⵣⵣⴰⵢⴻⵔ, ⵙⵉⵏ ⴷⴻⴳ ⵙⵟⵉⴼ, ⵙⵉⵏ ⴷⴻⴳ ⵍⵊⴻⵍⴼⴰ, ⵢⵉⵡⴻⵏ ⴷⴻⴳ ⵍⴱⴰⵢⴻⴹ, ⵢⵉⵡⴻⵏ ⴷⴻⴳ ⵅⴻⵏⵛⵍⴰ ⴷ ⵢⵉⵡⴻⵏ ⴷⴻⴳ ⵎⵉⵍⴰ.
ⵜⴰⴳⴳⴰⵔⴰ, ⴰⵃⴰⴷⴰⵔ ⴰⵎⴰⴷⴰⵏ ⵢⴻⵙⵙⴻⴽⵜⴰ-ⴷ ⵉⵎⴻⵣⴷⴰⵖ ⴰⴽⴽⴻⵏ ⴰⴷ ⵃⴰⴷⵔⴻⵏ ⵉⵎⴰⵏ-ⵏⵙⴻⵏ ⵖⴻⴼ ⵓⴱⵔⵉⴷ ⵢⴻⵔⵏⴰ ⴰⴷ ⵄⴻⵙⵙⴻⵏ ⵡⴰⵍⴰⵜⴻⵏ ⵏ ⵓⵃⵎⵓ ⴷⴻⴳ ⵢⵉⵅⴰⵎⵎⴻⵏ-ⵏⵙⴻⵏ ⵉ ⵡⴰⴽⴽⴻⵏ ⴰⴷ ⵅⴹⵓⵏ ⵉ ⵢⵉⵎⵉⵞⵉⵢⴻⵏ (ⵍⴻⵅⵟⴻⵔ).
ⴰⵔⵏⵓ ⵖⴻⵔ
