ⵜⴰⵏⴻⵖⵍⴰⴼⵜ ⵏ ⵜⴻⵣⵎⴻⵔⵜ ⵜⴻⴳⴳ, ⴰⵙⵙ-ⴰ ⵏ ⴰⵔⵉⵎ ⴷⴻⴳ ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ, ⵢⵉⵡⴻⵜ ⵏ ⵜⵎⵉⵍⵍⵉⵜ ⵉ ⵡⴰⵙⵙ ⴰⵎⴰⴹⵍⴰⵏ ⵏ ⵓⵎⴻⵏⵏⵓⵖ ⵎⴳⴰⵍ ⵙⵙⴻⵔⵟⴰⵏ. ⵙⵔⴻⵙⵏ-ⴷ ⴰⵀⵉⵍ ⵏ ⵜⵓⵙⵙⵏⴰ ⵉⵡⴰⴽⴽⴻⵏ ⴰⴷ ⵙⴱⴻⵢⵢⵏⴻⵏ ⴰⵣⴰⵍ ⵏ ⵓⵃⵔⴰⵣ (prévention) ⴷ ⵓⴽⴰⵢⴰⴷ ⵣⵉⴽ (dépistage précoce) ⵉⵡⴰⴽⴽⴻⵏ ⴰⴷ ⵇⴰⴱⵍⴻⵏ ⴰⵟⴰⵏ-ⴰⴳⵉ ⵢⴻⵔⵏⴰ ⴰⴷ ⵙⵙⴻⵏⵇⴻⵙⴻⵏ ⵙⴻⴳ ⵡⵉⴷ ⵢⴻⵎⵎⵓⵜⴻⵏ ⴼⴻⵍⵍ-ⴰⵙ.
ⴷⴻⴳ ⵡⴰⵡⴰⵍ-ⵉⵙ ⵉ ⴷ-ⵢⴻⵖⵔⴰ ⴷⴻⴳ ⵢⵉⵙⴻⵎ-ⵉⵙ ⵓⵏⴻⵎⵎⴰⵀⴰⵍ ⵏ ⵓⵃⵔⴰⵣ ⴷ ⵓⵙⵏⴻⵔⵏⵉ ⵏ ⵜⴻⵣⵎⴻⵔⵜ, ⵎⴰⵙⵙ ⵊⴰⵎⴰⵍ ⴼⵓⵔⴰⵔ, ⴰⵏⴻⵖⵍⴰⴼ ⵏ ⵜⴻⵣⵎⴻⵔⵜ, ⵎⵓⵃⴰⵎⴻⴷ ⵚⴻⴷⴷⵉⵇ ⴰⵢⵜ ⵎⴻⵙⵄⵓⴷⴰⵏ, ⵉⵡⴻⴽⴽⴻⴷ-ⴷ ⴱⴻⵍⵍⵉ "ⴰⵎⴻⵏⵏⵓⵖ ⵎⴳⴰⵍ ⵙⵙⴻⵔⵟⴰⵏ ⴷ ⴰⵢⴻⵏ ⵢⴻⵣⵡⴰⵔⴰⵏ ⴷⴻⴳ ⵜⵎⵓⵔⵜ-ⵏⵏⴻⵖ". ⵢⴻⵔⵏⴰ-ⴷ ⴱⴻⵍⵍⵉ "ⴰⵟⴰⵏ-ⴰⴳⵉ ⴷ ⴰⵢⴻⵏ ⵉ ⴷ-ⵢⴻⵜⵜⴰⵡⵉⵏ ⴰⵟⴰⵙ ⵏ ⵍⴱⴰⴹⴻⵍ ⵉ ⵜⴻⵣⵎⴻⵔⵜ".
ⵢⴻⵏⵏⴰ-ⴷ ⴱⴻⵍⵍⵉ ⵜⴰⴱⵔⵉⵜ ⵏ ⵜⵎⵓⵔⵜ ⵉ ⵓⵃⵔⴰⵣ ⴷ ⵓⵎⴻⵏⵏⵓⵖ ⵎⴳⴰⵍ ⵙⵙⴻⵔⵟⴰⵏ ⵜⴻⴱⵏⴰ ⵖⴻⴼ ⴽⴽⵓⵥ (4) ⵏ ⵢⵉⵇⴰⵄⵉⴷⴻⵏ: ⴰⵃⵔⴰⵣ, ⴰⴽⴰⵢⴰⴷ ⵣⵉⴽ, ⵍⵡⵉⵍⴰⵢⴰ ⵏ ⴷⴷⵡⴰ ⴷ ⵓⵏⴰⴷⵉ ⵏ ⵜⵓⵙⵙⵏⴰ. ⵢⴻⵏⵏⴰ-ⴷ ⴱⴻⵍⵍⵉ ⵔⵔⴰⵏ ⵍⴱⴰⵍ-ⵏⵙⴻⵏ ⵖⴻⵔ ⵓⵙⴼⴰⵇⴻⵢ ⴷ ⵓⴱⴻⴷⴷⴻⵍ ⵏ ⵡⴰⵎⴻⴽ ⵉ ⵜⵜⵉⴷⵉⵔⴻⵏ ⵢⵉⵎⴷⴰⵏⴻⵏ ⵉⵡⴰⴽⴽⴻⵏ ⴰⴷ ⵙⵙⴻⵏⵇⴻⵙⴻⵏ ⵙⴻⴳ ⵡⴰⵢⴻⵏ ⵢⴻⵙⵙⴰⵡⴹⴻⵏ ⵖⴻⵔ ⵡⴰⵟⴰⵏ-ⴰⴳⵉ, ⵍⴰⴷⵖⴰ ⵙ ⵓⴽⴰⵢⴰⴷ ⵣⵉⴽ ⵏ ⵙⵙⴻⵔⵟⴰⵏ ⵏ ⵢⵉⴷⵎⴰⵔⴻⵏ ⴷ ⵡⵉⵏ ⵏ ⵜⴱⵓⵛⵉⵟ (col de l'utérus).
ⴷⴻⴳ ⵢⵉⵙⵡⵉⵢⴻⵏ ⵏ ⵜⴻⴱⵔⵉⵜ-ⴰⴳⵉ – ⵢⴻⵔⵏⴰ-ⴷ ⵡⴰⵏⴻⵖⵍⴰⴼ – ⵍⵍⴰⵏ: ⴰⵙⵙⴻⵊⵀⴻⴷ ⵏ ⵢⵉⵙⵓⴷⴰⵔ ⵏ ⵜⴻⵣⵎⴻⵔⵜ, ⴰⵙⴻⵊⵀⴻⴷ ⵏ ⴷⴷⵡⴰ ⴷ ⵢⵉⴼⴻⵛⴽⴰⵏ ⵉⵜⵔⴰⵔⴻⵏ, ⴷ ⵓⵙⵏⴻⴼⵍⵉ ⵏ ⵢⵉⵎⴷⴰⵏⴻⵏ ⵉⵇⴻⴷⴷⵛⴻⵏ, ⵢⴻⵔⵏⴰ ⴰⴷ ⵜⵜⴻⴽⴽⵉⵏ ⴷ ⵜⴻⵙⴷⴰⵡⵉⵢⵉⵏ ⴷⴻⴳ ⵓⵏⴰⴷⵉ ⵏ ⵜⵓⵙⵙⵏⴰ.
ⴰⵢⵜ ⵎⴻⵙⵄⵓⴷⴰⵏ ⵉⵡⴻⴽⴽⴻⴷ-ⴷ ⴱⴻⵍⵍⵉ "ⴰⵎⴻⵏⵏⵓⵖ ⵎⴳⴰⵍ ⵙⵙⴻⵔⵟⴰⵏ ⴷ ⵎⴰⵙⵓⵍⵉⵢⵢⴰ ⵏ ⵎⴻⴷⴷⴻⵏ ⴰⴽⴽ, ⵢⴻⵔⵏⴰ ⵉⵍⴰⵇ ⴰⴷ ⴷ-ⵢⵉⵍⵉ ⵓⵎⵢⴰⵡⴰⵙ ⴳⴰⵔ ⴰⴽⴽ ⵢⵉⴳⵉⵔⴻⵏ ⴷ ⵜⴷⵓⴽⵍⵉⵡⵉⵏ ⵏ ⵎⴻⴷⴷⴻⵏ".
ⵙⴻⴳ ⵜⴰⵎⴰ-ⵙ, ⴰⵎⴻⵙⵏⵉ ⵏ ⵜⵓⴷⴷⵙⴰ ⵜⴰⵎⴰⴹⵍⴰⵏⵜ ⵏ ⵜⴻⵣⵎⴻⵔⵜ (OMS) ⴷⴻⴳ ⵍⴻⵣⵣⴰⵢⴻⵔ, ⴼⴰⵏⵓⵢⴻⵍ ⵀⴰⴱⵉⵎⴰⵏⴰ, ⵢⴻⵏⵏⴰ-ⴷ ⴱⴻⵍⵍⵉ "ⵍⴻⵣⵣⴰⵢⴻⵔ ⵜⵓⵣⵣⴻⵍ ⵎⵍⵉⵃ ⴷⴻⴳ ⵓⵎⴻⵏⵏⵓⵖ ⵎⴳⴰⵍ ⵙⵙⴻⵔⵟⴰⵏ, ⵍⴰⴷⵖⴰ ⵙ ⵓⵙⴻⵎⵔⴻⵙ ⵏ ⵓⴳⴻⵣⵣⴻⵎ (vaccin) ⵎⴳⴰⵍ 'Hépatite', ⴷ ⵓⵃⵔⴰⵣ ⵏ ⵙⵙⴻⵔⵟⴰⵏ ⵏ ⵢⵉⴷⵎⴰⵔⴻⵏ, ⴷ ⵓⵙⵉⵜⵎⴻⵔ ⴷⴻⴳ ⵢⵉⵎⴽⴰⵏ ⵏ ⴷⴷⵡⴰ ⵏ ⵙⵙⴻⵔⵟⴰⵏ".
ⵢⴻⵏⵏⴰ-ⴷ ⴷⴰⵖⴻⵏ ⴱⴻⵍⵍⵉ ⴰⵢⴻⵏ ⵜⴻⵅⴷⴻⵎ ⵍⴻⵣⵣⴰⵢⴻⵔ ⴷⴻⴳ ⵓⵙⵉⵙⵎⴻⵍ ⵏ ⵢⵉⴼⴻⵛⴽⴰⵏ ⵉⵜⵔⴰⵔⴻⵏ ⴷ ⵓⵙⴻⴼⵔⴻⴽ ⵏ ⵢⵉⵙⵓⴷⴰⵔ ⵏ ⵜⴻⵣⵎⴻⵔⵜ, ⵢⴻⵙⵙⴻⴱⵢⴰⵏ-ⴷ ⴰⴱⵔⵉⴷ ⵢⴻⵍⵀⴰⵏ ⵉ ⵓⵃⵔⴰⵣ ⴷ ⵓⵀⴻⵢⵢⵉ ⵏ ⴷⴷⵡⴰ ⵏ ⵜⵖⴰⵔⴰ.
ⴰⵙⴻⵍⵡⴰⵢ ⵏ ⵜⵙⴻⵇⵇⴰⵎⵓⵜ ⵜⴰⵖⴻⵍⵏⴰⵡⵜ ⵏ ⵓⵃⵔⴰⵣ ⴷ ⵓⵎⴻⵏⵏⵓⵖ ⵎⴳⴰⵍ ⵙⵙⴻⵔⵟⴰⵏ, ⵄⴻⴷⴷⴰ ⴱⵓⵏⵊⴰⵔ, ⵢⴻⵏⵏⴰ-ⴷ ⴱⴻⵍⵍⵉ ⴰⵎⴻⵏⵏⵓⵖ-ⴰⴳⵉ ⵢⴻⴱⵏⴰ ⵖⴻⴼ ⵓⵃⵔⴰⵣ ⴷ ⵓⴽⴰⵢⴰⴷ ⵣⵉⴽ, ⵢⴻⵔⵏⴰ ⴰⵃⴱⴰⵙ ⵏ ⴷⴷⵓⵅⴰⵏ ⴷ ⵓⵎⴻⵏⵏⵓⵖ ⵎⴳⴰⵍ ⵜⵉⵣⵓⵢⴻⵔⵜ (obésité) ⴷ ⴰⵢⴻⵏ ⵢⴻⵙⵙⴻⴼⴽⴻⵏ ⵉ ⵓⵃⵔⴰⵣ ⵙⴻⴳ ⵙⵙⴻⵔⵟⴰⵏ.
