ⵍⵣⵣⴰⵢⴻⵔ ⵜⴰⵎⴰⵏⴻⵖⵜ – ⵢⴻⵙⵙⴻⵍⵡⴰⵢ ⵓⵎⵙⴻⵍⵡⴰⵢ ⵏ ⵡⴰⵙⵇⴰⵎⵓ ⵓⵏⵏⵉⴳ, ⵎⴰⵙⵙ ⵄⴻⵣⵣⵓⵣ ⵏⴰⵚⵔⵉ, ⴰⵙⵙ-ⴰ ⵏ ⵜⵜⵍⴰⵜⴰ ⴷⴻⴳ ⵡⴰⵙⵉⵔⴰ ⵏ ⵡⴰⵙⵇⴰⵎⵓ ⴷⴻⴳ ⵍⵣⵣⴰⵢⴻⵔ ⵜⴰⵎⴰⵏⴻⵖⵜ, ⵍⴻⵇⴷⵉⵛ ⵏ ⵓⵙⴻⴱⴷⴻⴷ ⵓⵏⵚⵉⴱ ⵏ ⵜⵔⴰⴱⵄⵉⵏ ⵏ ⵜⵎⴷⵓⴽⴽⵍⵉ ⴳⴰⵔ ⵡⴰⵙⵇⴰⵎⵓ ⵓⵏⵏⵉⴳ ⴷ ⵢⵉⴳⵔⴰⵡⴻⵏ ⵏ ⵢⵉⵎⴱⴻⵇⵇⴰⵙ ⵏ ⵡⴰⵟⴰⵙ ⵏ ⵜⵎⵓⵔⴰ ⵏ ⵜⴼⵔⵉⵇⵜ.
ⵜⵉⵎⵙⴰⵍ-ⴰⴳⵉ ⵢⴻⵔⵣⴰⵏ ⵜⵉⵎⵓⵔⴰ-ⴰⴳⵉ: ⴰⵙⵇⴰⵎⵓ ⵓⵏⵏⵉⴳ ⵏ ⵜⴳⴷⵓⴷⴰ ⵏ ⵣⵉⵎⴱⴰⴱⵡⵉ, ⴰⴳⵔⴰⵡ ⴰⵖⴻⵍⵏⴰⵡ ⵏ ⵜⵎⴻⵏⵏⴰⴹⵉⵏ ⵏ ⵢⴻⴼⴼⵓⵙ ⵏ ⵜⴼⵔⵉⵇⵜ, ⴰⵙⵇⴰⵎⵓ ⵓⵏⵏⵉⴳ ⵏ ⵜⴳⴷⵓⴷⴰ ⵏ ⵚⵓⵎⴰⵍ, ⴰⵙⵇⴰⵎⵓ ⵓⵏⵏⵉⴳ ⵏ ⵔⵡⴰⵏⴷⴰ, ⴰⴳⵔⴰⵡ ⴰⵖⴻⵍⵏⴰⵡ ⵏ ⵏⴰⵎⵉⴱⵢⴰ, ⴰⵙⵇⴰⵎⵓ ⵓⵏⵏⵉⴳ ⵏ ⵏⵉⵊⵉⵔⵢⴰ, ⴰⵙⵇⴰⵎⵓ ⵓⵏⵏⵉⴳ ⵏ ⵜⵛⴰⴷ ⴷ ⵡⴰⵙⵇⴰⵎⵓ ⵓⵏⵏⵉⴳ ⵏ ⴽⵉⵏⵢⴰ.
ⴷⴻⴳ ⵡⴰⵡⴰⵍ-ⵉⵙ, ⵎⴰⵙⵙ ⵄⴻⵣⵣⵓⵣ ⵏⴰⵚⵔⵉ ⵢⴻⵏⵏⴰ-ⴷ ⴱⴻⵍⵍⵉ ⴰⵙⴻⴱⴷⴻⴷ ⵏ ⵜⵔⴰⴱⵄⵉⵏ-ⴰⴳⵉ ⵏ ⵜⵎⴷⵓⴽⴽⵍⵉ ⵢⴻⵍⵍⴰ-ⴷ ⴷⴻⴳ ⵡⴰⵏⵏⴰⵔ ⵏ ⵓⵎⵢⴻⵍⵍⴻⵍ ⵏ ⵢⵉⵎⴱⴻⵇⵇⴰⵙ ⵉ ⵢⴻⴱⵏⵓⵏ ⵉⵙⵍⴰⵢⴻⵏ ⵉⵊⴻⵀⴷⴻⵏ ⴳⴰⵔ ⵢⵉⵖⴻⵔⴼⴰⵏ ⵙ ⵜⴰⵍⵍⴻⵍⵜ ⵏ ⵡⵉⴷ ⵉⵜⴻⵏ-ⵢⴻⵎⵎⴻⵜⵜⵉⵍⴻⵏ ⴷⴻⴳ ⵜⵎⴻⵔⵙⴻⵍⵉⵏ ⵏ ⵍⵇⴰⵏⵓⵏ.
ⵍⴻⵇⴷⵉⵛ-ⴰⴳⵉ ⵢⴻⵍⵍⴰ-ⴷ ⵙ ⵓⵃⴰⴷⴰⵔ ⵏ ⵜⵎⴰⵔⵉⵜ ⵏ ⵓⵡⴰⵏⴰⴽ ⵢⴻⵔⵣⴰⵏ ⵜⵉⵎⵙⴰⵍ ⵏ ⵜⴼⵔⵉⵇⵜ, ⵎⴰⵙⵙⴰ ⵙⴰⵍⵎⴰ ⴱⴻⵅⵜⴰ ⵎⴰⵏⵚⵓⵔⵉ, ⴷ ⵢⵉⵎⴻⵙⵍⴻⵢⴻⵏ ⵏ ⵡⴰⵙⵇⴰⵎⵓ ⵓⵏⵏⵉⴳ ⴷ ⵢⵉⵙⴼⵉⵔⴻⵏ ⵏ ⵜⵎⵓⵔⴰ ⵏ ⵜⴼⵔⵉⵇⵜ ⴷⴻⴳ ⵍⵣⵣⴰⵢⴻⵔ. ⵎⴰⵙⵙ ⵏⴰⵚⵔⵉ ⵢⴻⴼⴽⴰ ⴰⵣⴰⵍ ⵉⵊⴻⵀⴷⴻⵏ ⵉ ⵜⵎⴷⵓⴽⴽⵍⵉ ⴷ ⵓⵎⵢⴰⵡⴰⵙ ⵉ ⵇⵇⴻⵏⵏ ⵍⵣⵣⴰⵢⴻⵔ ⵖⴻⵔ ⵜⵎⵓⵔⴰ-ⴰⴳⵉ, ⴰⵢⴰ ⵙⴻⴳ ⵓⵎⴻⵣⵔⵓⵢ ⵉⵊⴻⵀⴷⴻⵏ ⵏ ⵓⵎⴻⵏⵏⵓⵖ ⵢⴻⴷⴷⵓⴽⴽⵍⴻⵏ ⵎⴳⴰⵍ ⴰⵃⴻⵜⵜⴻⵍ ⴷ ⵍⴱⴰⵟⴻⵍ, ⵉ ⵡⴰⴽⴽⴻⵏ ⴰⴷ ⵜⴻⵍⵍⵉ ⵜⴼⵔⵉⵇⵜ ⴷ ⵜⴰⴷⴻⵔⴼⵜ ⵢⴻⵔⵏⴰ ⴷ ⵜⴰⵎⴻⵏⵣⵓⵜ.
ⵢⴻⵙⵙⴻⴽⵜⴰ-ⴷ ⴷⴰⵖⴻⵏ ⴱⴻⵍⵍⵉ ⵜⵉⵎⴷⵓⴽⴽⵍⵉ ⴳⴰⵔ ⵍⵣⵣⴰⵢⴻⵔ ⴷ ⵜⴼⵔⵉⵇⵜ ⵜⴻⴱⵏⴰ ⵖⴻⴼ ⵜⵓⴽⴽⵉⵡⵉⵏ ⵏ ⵢⵉⵎⴳⴰⵔⵓⵜⴻⵏ ⵏ ⵣⵉⴽ ⴷ ⵓⵎⴻⵏⵏⵓⵖ ⵎⴳⴰⵍ ⴰⵙⴻⵃⵔⴻⵙ ⴷ ⵓⵙⵍⵓⵖⵎⵓ ⵏ ⵜⵎⴰⴳⵉⵜ. ⵢⴻⵏⵏⴰ-ⴷ ⴱⴻⵍⵍⵉ ⵡⴰⵙⵇⴰⵎⵓ ⵓⵏⵏⵉⴳ ⵢⴻⴱⵯⴰ ⴰⴷ ⵢⴻⵙⵊⴻⵀⴻⴷ ⴰⵎⵢⴻⵍⵍⴻⵍ ⴷ ⵢⵉⴳⵔⴰⵡⴻⵏ ⵏ ⵢⵉⵎⴱⴻⵇⵇⴰⵙ ⵏ ⵓⵎⴰⴹⴰⵍ ⴽⴰⵎⴻⵍ, ⵍⴰⴷⵯⴰ ⵡⵉⴷ ⵏ ⵜⴼⵔⵉⵇⵜ, ⵉ ⵡⴰⴽⴽⴻⵏ ⴰⴷ ⵃⴰⴷⵔⴻⵏ ⵢⵉⵖⴻⵔⴼⴰⵏ-ⵏⵙⴻⵏ ⵢⴻⵔⵏⴰ ⴰⴷ ⵇⴷⴻⵛⴻⵏ ⵉ ⵜⵎⵓⵔⴰ-ⵏⵙⴻⵏ.
ⵎⴰⵙⵙ ⵏⴰⵚⵔⵉ ⵢⴻⵏⵏⴰ-ⴷ ⴷⴰⵖⴻⵏ ⴱⴻⵍⵍⵉ ⵍⵣⵣⴰⵢⴻⵔ, ⵙ ⵏⵏⵡⴰⵢⴰ ⵏ ⵓⵙⴻⵍⵡⴰⵢ ⵏ ⵜⴻⴳⴷⵓⴷⴰ ⵎⴰⵙⵙ ⵄⴻⴱⴷⵓⵍⵎⴻⵊⵉⴷ ⵜⴻⴱⴱⵓⵏ, ⵜⴻⵜⵜⴻⴳⴳ ⵎⴰⵕⵕⴰ ⵜⵉⵣⵎⴰⵔ-ⵉⵙ ⵉ ⵡⴰⴽⴽⴻⵏ ⴰⴷ ⵙⵏⴻⵊⵎⴰⵄⴻⵏ ⵢⵉⴼⵔⵉⵇⵉⵢⴻⵏ ⵜⵉⵣⵎⴰⵔ-ⵏⵙⴻⵏ ⵉ ⵡⴰⴽⴽⴻⵏ ⴰⴷ ⵜⴻⵏⴼⴻⵍ ⵜⴼⵔⵉⵇⵜ. ⵢⴻⵙⵙⵓⵜⵓⵔ ⴷⴰⵖⴻⵏ ⵉ ⵢⵉⵎⴱⴻⵇⵇⴰⵙ ⵏ ⵜⴼⵔⵉⵇⵜ ⴰⴷ ⵙⵙⴻⵏⴼⵍⴻⵏ ⵜⴰⵢⴻⵙⵙⴰ ⵏ ⵜⵍⴻⵡⵡⵉⵜ (ⵙⵙⵍⴰⵎ) ⴷ ⵓⵎⵙⴻⴳⴳⴻⵎ ⴰⵖⴻⵍⵏⴰⵡ, ⵢⴻⵔⵏⴰ ⴰⴷ ⵇⴷⴻⵛⴻⵏ ⵉ ⵡⴰⴽⴽⴻⵏ ⴰⴷ ⵢⴻⴽⴼⵓ ⵡⴰⵃⴻⵜⵜⴻⵍ ⴷ ⵓⵎⴻⵏⵏⵓⵖ ⴷⴻⴳ ⵜⴼⵔⵉⵇⵜ.
ⵜⴰⴳⴳⴰⵔⴰ, ⴼⴽⴰⵏ ⵜⵉⴼⵓⵍⵉⵏ ⵏ ⵢⵉⵙⵎⴰⵡⴻⵏ ⵏ ⵢⵉⵎⴻⵙⵍⴻⵢⴻⵏ ⵏ ⵜⵔⴰⴱⵄⵉⵏ-ⴰⴳⵉ ⵏ ⵜⵎⴷⵓⴽⴽⵍⵉ ⵉ ⵢⵉⵙⴼⵉⵔⴻⵏ ⴷ ⵢⵉⵎⴻⵎⵎⴻⵜⵜⵉⵍⴻⵏ ⵏ ⵜⵎⵓⵔⴰ ⵏ ⵜⴼⵔⵉⵇⵜ ⵉ ⴷ-ⵢⴻⵔⵣⴰⵏ ⵖⴻⵔ ⵍⴻⵇⴷⵉⵛ-ⴰⴳⵉ.
ⴰⵔⵏⵓ ⵖⴻⵔ
