ⴰⵙⴻⴳⴳⴻⵎ ⴷ ⵜⵎⴻⵏⵏⵓⵜ: ⴰⵍⴷⴰⵢ ⵏ ⵍⴻⵛⵢⴰⵍ ⵏ ⵓⵙⵉⵍⴻⵯ ⵖⴻⴼ ⵓⵡⴰⵀⵉⵍ ⴰⵎⴰⵢⵏⵓ ⵉ ⵓⵃⴰⴷⴰⵔ ⵏ ⵡⴰⵔⵔⴰⵡ ⵢⴻⵙⵄⴰⵏ ⴰⵡⴰⵃⴷⵉ

ⵍⵣⵣⴰⵢⴻⵔ ⵜⴰⵎⴰⵏⴻⵖⵜ – ⵜⴻⵙⵙⴻⵍⵡⴰⵢ ⵜⴰⵏⴻⵖⵍⴰⴼⵜ ⵏ ⵜⵎⴻⵏⵏⵓⵜ ⵜⴰⵖⴻⵍⵏⴰⵡⵜ, ⵜⵡⴰⵛⵓⵍⵜ ⴷ ⵜⵎⴻⵙⵍⴰⵢⵉⵏ ⵏ ⵜⵎⴻⵟⵟⵓⵜ, ⵎⴰⵙⵙⴰ ⵚⵓⵔⵢⴰ ⵎⵓⵍⵓⵊⵉ, ⴰⵙⵙ-ⴰ ⵏ ⵍⵃⴻⴷ ⴷⴻⴳ ⵜⵏⴻⵎⵎⴻⵍ ⵜⴰⵖⴻⵍⵏⴰⵡⵜ ⵏ ⵜⵏⴻⴱⴷⴰⴷⵜ, ⴰⵍⴷⴰⵢ ⵓⵏⵚⵉⴱ ⵏ ⵍⴻⵛⵢⴰⵍ ⵏ ⵓⵙⵉⵍⴻⵯ ⵢⴻⵔⵣⴰⵏ ⴰⵡⴰⵀⵉⵍ ⴰⵎⴰⵢⵏⵓ ⵏ ⵓⵙⴻⴳⴳⴻⵎ ⴷ ⵓⵍⵎⵎⵓⴷ ⵉ ⵓⵃⴰⴷⴰⵔ ⵏ ⵡⴰⵔⵔⴰⵡ ⵢⴻⵙⵄⴰⵏ ⴰⵟⵟⴰⵏ ⵏ ⵡⴰⵡⴰⵃⴷⵉ (ⴰⵜⵓⵡⴰⵃⵓⴷ).

ⴰⴽⴽⴻⵏ ⵉ ⴷ-ⵢⴻⵏⵏⴰ ⵡⴰⵍⵖⵓ ⵏ ⵜⵏⴻⵖⵍⴰⴼⵜ, ⵡⵓⵙⵙⴰⵏ-ⴰⴳⵉ ⵏ ⵓⵙⵉⵍⴻⵯ ⵍⵍⴰⵏ-ⴷ ⴷⴻⴳ ⵡⴰⵏⵏⴰⵔ ⵏ ⵢⵉⵡⴻⵏ ⵓⵙⵓⵔ ⴰⵖⴻⵍⵏⴰⵡ ⵉ ⵢⴻⴱⵯⴰⵏ ⴰⴷ ⵢⴻⵙⴷⵓⴽⴽⴻⵍ ⵢⵉⴱⵔⵉⴷⴻⵏ ⵓⵙⵙⵏⴰⵏⴻⵏ ⴷ ⵓⵙⴻⴳⴳⴻⵎ ⵢⴻⵔⵣⴰⵏ ⴰⵟⵟⴰⵏ-ⴰⴳⵉ. ⵉⵙⵡⵉ-ⵙ ⴷ ⴰⵙⵊⴻⵀⴻⴷ ⵏ ⵓⵎⵢⴻⵍⵍⴻⵍ ⴳⴰⵔ ⵢⵉⵃⵔⵉⵛⴻⵏ ⵢⴻⵎⴳⴰⵔⴰⴷⴻⵏ ⵉ ⵡⴰⴽⴽⴻⵏ ⴰⴷ ⵢⵉⵍⵉ ⵓⵃⴰⴷⴰⵔ ⵢⴻⵚⴼⴰⵏ, ⵢⴻⵔⵏⴰ ⴰⴷ ⴼⴽⴻⵏ ⵜⵉⵎⵓⵙⵏⵉⵡⵉⵏ ⵜⵉⵎⴰⵢⵏⵓⵜⵉⵏ ⴷ ⵡⴰⵍⴰⵜⴻⵏ ⵏ ⵓⵎⴰⵀⵉⵍ ⵉ ⵢⵉⵅⴻⴷⴷⴰⵎⴻⵏ ⴷⴻⴳ ⵡⴰⵏⵏⴰⵔ ⵉ ⵡⴰⴽⴽⴻⵏ ⴰⴷ ⵙⵍⴻⵍⵍⵉⵏ ⵜⵉⵣⵎⴰⵔ ⵏ ⵡⴰⵔⵔⴰⵡ-ⴰⴳⵉ.

ⴷⴻⴳ ⵡⴰⵡⴰⵍ-ⵉⵙ, ⵜⴰⵏⴻⵖⵍⴰⴼⵜ ⵜⴻⵙⵙⴻⴽⵏ-ⴷ ⴱⴻⵍⵍⵉ ⵍⵣⵣⴰⵢⴻⵔ ⵜⴻⵜⵜⴻⴷⴷⵓ ⵙ ⵜⵖⴰⵡⵍⴰ ⵉ ⵡⴰⴽⴽⴻⵏ ⴰⴷ ⵜⴻⵙⴱⴻⴷⴷ ⵢⵉⵡⴻⵏ ⵡⴰⵏⴰⴳⵔⴰⵡ ⴰⵎⴰⵜⵓ ⵉ ⵓⵃⴰⴷⴰⵔ ⵏ ⵡⵉⴷ ⵢⴻⵜⵜⵓⵜⵢⴻⵏ ⵙ ⵡⴰⵟⵟⴰⵏ ⵏ ⵡⴰⵡⴰⵃⴷⵉ. ⴰⵢⴰ ⵢⴻⵊⵊⴻⵀⴻⴷ ⵙ ⵓⵙⵓⴼⴼⴻⵖ ⵏ ⵓⵏⴰⴹ ⵏ ⵓⵙⴻⵍⵡⴰⵢ (Décret Présidentiel) ⵓⵟⵟⵓⵏ 26-09 ⴷⴻⴳ ⵢⴻⵏⵏⴰⵢⴻⵔ 2026, ⵉ ⵢⴻⵙⴱⴻⴷⴷⴻⵏ ⴰⵎⵎⴰⵙ ⴰⵖⴻⵍⵏⴰⵡ ⵏ ⵡⴰⵡⴰⵃⴷⵉ, ⴷ ⵓⵏⴰⴹ ⵏ ⵓⵙⴻⴷⵎⴻⵔ (Décret Exécutif) ⵢⴻⵔⵣⴰⵏ ⴰⵙⴱⴻⴷⴷ ⵏ ⵡⴰⵎⵎⴰⵙⴻⵏ ⵓⵥⵍⴰⵢⴻⵏ ⴷ ⵡⴰⵎⴻⴽ ⴰⵔⴰ ⵍⵃⵓⵏ.

ⴰⵎⵎⴰⵙ-ⴰⴳⵉ ⴰⵖⴻⵍⵏⴰⵡ ⴰⴷ ⵢⴻⵇⴷⴻⵛ ⵖⴻⴼ ⵓⵙⴻⴷⵎⴻⵔ ⴷ ⵓⵄⴰⵙⵙ ⵏ ⵓⵡⴰⵀⵉⵍ ⴰⵖⴻⵍⵏⴰⵡ, ⵢⴻⵔⵏⴰ ⴰⴷ ⵢⵉⵍⵉ ⴷ ⵜⴰⵔⵉⵛⵜ ⵉ ⵡⴰⴽⴽⴻⵏ ⴰⴷ ⴷⴷⵓⴽⴽⵍⴻⵏ ⵍⴻⵇⴷⵉⵛⴻⵏ ⵏ ⵜⵎⴻⵔⵙⴻⵍⵉⵏ ⵜⵉⴳⴷⵓⴷⴰⵏⵉⵏ ⴷ ⵓⵎⴻⵜⵜⵉ ⴰⵖⴻⵔⵎⴰⵏ. ⴰⴷ ⵢⴻⴳ ⴷⴰⵖⴻⵏ ⵉⵏⴰⴷⵉⵢⴻⵏ, ⴰⵙⵉⵍⴻⵯ ⴷ ⵜⴰⵍⵍⴻⵍⵜ ⵜⴰⵜⴻⴽⵏⵉⴽⵜ ⵉ ⵜⵡⴰⵛⵓⵍⵉⵏ, ⵢⴻⵔⵏⴰ ⴰⴷ ⵢⴻⵙⵏⴻⴼⵍⴰⵢ ⵢⵉⴱⵔⵉⴷⴻⵏ ⵏ ⵓⵙⴻⴳⴳⴻⵎ ⴷ ⵓⵍⵎⵎⵓⴷ ⵢⴻⴷⴷⵓⴽⴽⵍⴻⵏ.

ⵜⴰⵏⴻⵖⵍⴰⴼⵜ ⵜⴻⵔⵏⴰ-ⴷ ⴱⴻⵍⵍⵉ ⵢⴻⵍⵍⴰ-ⴷ ⵓⵀⴻⴳⴳⵉ ⵏ ⵢⵉⵡⴻⵏ ⵓⵙⴻⵏⴼⴰⵔ ⵏ ⵓⵡⴰⵀⵉⵍ ⵏ ⵓⵙⴻⴳⴳⴻⵎ ⵉ ⵢⴻⴱⵯⴰⵏ ⴰⴷ ⵢⴻⵙⴷⵓⴽⴽⴻⵍ ⵢⵉⴱⵔⵉⴷⴻⵏ ⵏ ⵓⵃⴰⴷⴰⵔ ⴷⴻⴳ ⵎⴰⵕⵕⴰ ⵜⵎⴻⵔⵙⴻⵍⵉⵏ. ⴰⵡⴰⵀⵉⵍ-ⴰⴳⵉ ⵢⴻⵙⵄⴰ ⵎⵔⴰⵡ (10) ⵏ ⵢⵉⵙⴻⵏⵜⴰⵍ ⵉⵙⴰⵙⵉⵢⴻⵏ, ⴰⵎ ⵓⵙⴻⴼⵔⴻⵯ ⵏ ⵜⵣⵎⴻⵔⵜ, ⴰⵙⴻⴳⴳⴻⵎ ⵏ ⵡⴰⵏⵏⴰⵔ, ⴰⵙⵏⴻⴼⵍⴰⵢ ⵏ ⵜⴻⵢⵡⴰⵍⵜ, ⴰⵙⵊⴻⵀⴻⴷ ⵏ ⵜⵎⵓⵙⵏⵉ ⴷ ⵓⵙⵉⵍⴻⵯ ⵏ ⵜⵍⴻⵍⵍⵉ ⵏ ⵓⵎⴷⴰⵏ ⴷ ⵡⴰⵎⴻⴽ ⴰⵔⴰ ⵢⴻⴽⵛⴻⵎ ⴷⴻⴳ ⵜⵏⴻⵎⵎⴻⵍ ⴷ ⵓⵎⴻⵜⵜⵉ ⵙ ⵜⵖⴰⵡⵍⴰ.

ⵍⴻⵇⴷⵉⵛ-ⴰⴳⵉ ⵏ ⵓⵙⵉⵍⴻⵯ ⵢⴻⵔⵣⴰ 320 ⵏ ⵢⵉⵎⴻⵙⴽⴰⵔⴻⵏ ⵙⴻⴳ ⵢⵉⵃⵔⵉⵛⴻⵏ ⵏ ⵜⵎⴻⵏⵏⵓⵜ, ⵉⵙⴻⵍⵎⴰⴷⴻⵏ ⵏ ⵜⴻⵔⴱⵉⵢⵜ ⵜⴰⵖⴻⵍⵏⴰⵡⵜ, ⵜⵉⴷⴷⵓⴽⴽⵍⵉⵡⵉⵏ ⴷ ⵜⵡⴰⵛⵓⵍⵉⵏ. ⴰⵡⴰⵀⵉⵍ-ⴰⴳⵉ ⴰⴷ ⵢⵉⵍⵉ ⴷⴰⵖⴻⵏ ⴷⴻⴳ ⵜⵡⵉⵍⴰⵢⵉⵏ ⵏ ⵡⴻⵀⵔⴰⵏ, ⵇⵙⴻⵏⵟⵉⵏⴰ ⴷ ⴱⵙⴻⴽⵔⴰ, ⵉ ⵡⴰⴽⴽⴻⵏ ⴰⴷ ⵢⴰⵡⴻⴹ ⵖⴻⵔ ⵎⴰⵕⵕⴰ ⵢⵉⵅⴻⴷⴷⴰⵎⴻⵏ ⴷⴻⴳ ⵓⵃⵔⵉⵛ-ⴰⴳⵉ, ⴰⵎ ⵢⵉⵎⵙⴻⴳⴳⵎⴻⵏ, ⵉⵎⵓⵙⵏⴰⵡⴻⵏ ⵏ ⵜⵏⴻⴼⵙⵉⵜ ⴷ ⵢⵉⵙⴻⵍⵎⴰⴷⴻⵏ.

ⵜⴰⴳⴳⴰⵔⴰ, ⵎⴰⵙⵙⴰ ⵎⵓⵍⵓⵊⵉ ⵜⴻⵏⵏⴰ-ⴷ ⴱⴻⵍⵍⵉ ⴰⵔⴻⴱⴱⴰⵃ ⵏ ⵓⵃⴰⴷⴰⵔ ⵏ ⵡⵉⴷ ⵢⴻⵙⵄⴰⵏ ⴰⵡⴰⵃⴷⵉ ⵢⴻⵙⵙⵓⵜⵓⵔ ⴰⵎⵢⴻⵍⵍⴻⵍ ⵉⵊⴻⵀⴷⴻⵏ ⴳⴰⵔ ⵜⵣⵎⴻⵔⵜ, ⵜⴰⵏⴻⴼⵙⵉⵜ, ⴰⵙⴻⴳⴳⴻⵎ ⴷ ⵓⵎⴻⵜⵜⵉ, ⵢⴻⵔⵏⴰ ⵢⴻⴱⵏⴰ ⵖⴻⴼ ⵓⵙⵉⵍⴻⵯ ⵓⴽⵓⵢⴰⵏ (ⵍⴷⴰⵢⵎⴻⵏ) ⵉ ⵎⴰⵕⵕⴰ ⵡⵉⴷ ⵉⵇⴷⴻⵛⴻⵏ ⴷⴻⴳ ⵡⴰⵏⵏⴰⵔ.