ⵍⵣⵣⴰⵢⴻⵔ ⵜⴰⵎⴰⵏⴻⵖⵜ – ⵢⴻⵙⵙⴻⴽⵏ-ⴷ ⵓⵏⵖⵍⴰⴼ ⵏ ⵜⵎⵉⵙⴰⵍ ⵏ ⴷⴷⴰⵅⴻⵍ, ⵜⵉⴷⴷⵓⴽⴽⵍⵉⵡⵉⵏ ⵜⵉⴷⵉⴳⴰⵏⵉⵏ ⴷ ⵡⴰⵙⵙⴰⵢ, ⵎⴰⵙⵙ ⴰⵙⵙⴰⵄⵉⴷ ⵙⴰⵄⵢⵓⴷ, ⴰⵙⵙ-ⴰ ⵏ ⵍⴻⵜⵏⵉⵢⴻⵏ, ⴱⴻⵍⵍⵉ ⴰⴹⵔⵉⵙ ⵏ ⵍⵇⴰⵏⵓⵏ ⵢⴻⵔⵣⴰⵏ ⴰⵙⴻⴳⴳⴻⵎ ⴰⴷⵉⴳⴰⵏ ⵏ ⵜⵎⵓⵔⵜ ⵢⴻⵙⴽⴰⵏⴰⵢ-ⴷ ⵍⴻⴱⵖⵉ ⵏ ⵙⵙⵢⴰⵙⴰ ⵢⴻⵚⴼⴰⵏ ⵉ ⵓⵙⵊⴻⵀⴻⴷ ⵏ ⵓⵎⵙⴻⴳⴳⴻⵎ ⴳⴰⵔ ⵜⵎⴻⵏⵏⴰⴹⵉⵏ ⴷ ⵜⴰⵍⵍⴻⵍⵜ ⵏ ⵓⵏⴻⴳⵎⵓ ⵓⵔⴰⵙⵡⴰⵢ .
ⴷⴻⴳ ⵓⵙⵙⴻⴽⵏ ⵏ ⵍⵇⴰⵏⵓⵏ-ⴰⴳⵉ ⴷⴰⵜ ⵢⵉⵎⴱⴻⵇⵇⴰⵙ ⵏ ⵓⴳⵔⴰⵡ ⴰⵖⴻⵍⵏⴰⵡ ⴰⵎⴰⴳⴷⴰⵢ, ⵎⴰⵙⵙ ⵙⴰⵄⵢⵓⴷ ⵢⴻⵙⴼⴻⵔⵔⴻⵯ-ⴷ ⴱⴻⵍⵍⵉ ⴰⴹⵔⵉⵙ-ⴰⴳⵉ ⵉ ⵖⴻⴼ ⵊⴻⵔⴷⴻⵏ ⵢⵉⵎⴻⵙⵍⴻⵢⴻⵏ ⵏ ⵡⴰⵙⵇⴰⵎⵓ ⵓⵏⵏⵉⴳ, ⴷ ⴰⵙⵓⵔ ⴰⵎⴻⵇⵇⵔⴰⵏ ⵉ ⵡⴰⴽⴽⴻⵏ ⴰⴷ ⵇⴻⵔⵔⴱⴻⵏ ⵜⴰⵖⵜⴻⵙⵜ ⵖⴻⵔ ⵢⵉⵎⴻⵣⴷⴰⵖ ⵢⴻⵔⵏⴰ ⴰⴷ ⵙⴱⴻⴷⴷⴻⵏ ⵢⵉⵡⴻⵜ ⵏ ⵜⵏⴻⴱⴷⴰⴷⵜ ⵉⵊⴻⵀⴷⴻⵏ, ⵢⴻⵣⵎⵔⴻⵏ ⴰⴷ ⵜⴻⴼⵔⵓ ⵉⵖⵉⵍⵉⴼⴻⵏ ⵏ ⵓⴳⴷⵓⴷ ⵢⴻⵔⵏⴰ ⴰⴷ ⵜⵙⴻⴳⴳⴻⵎ ⵍⴻⵇⴷⵉⵛ ⴰⴳⴷⵓⴷⴰⵏ.
ⴰⵏⵖⵍⴰⴼ ⵢⴻⵔⵏⴰ-ⴷ ⴱⴻⵍⵍⵉ ⴰⴹⵔⵉⵙ-ⴰⴳⵉ ⴷ ⴰⵎⵓⵔ ⵙⴻⴳ ⵢⵉⵡⴻⵏ ⵓⴱⵔⵉⴷ ⴰⵖⴻⵍⵏⴰⵡ ⵏ ⵓⵙⵎⴰⵢⵏⵓ ⵏ ⵓⵙⴻⴳⴳⴻⵎ ⵏ ⵡⴰⴽⴰⵍ. ⴰⵢⴰ ⵢⴻⴱⵏⴰ ⵖⴻⴼ ⵢⵉⵙⴻⴽⵏⴻⵏ ⵓⵙⵙⵏⴰⵏⴻⵏ ⴷ ⵜⵎⵓⵖⵍⵉ ⵜⴰⵙⵜⵔⴰⵜⵉⵊⵉⵜ ⵢⴻⵔⵣⴰⵏ ⵜⴰⴷⴰⵎⵙⴰ, ⵜⴰⵔⴰⴽⴰⵍⵜ (geography) ⴷ ⵍⴻⴱⵖⵉ ⵏ ⵢⵉⵎⴷⴰⵏⴻⵏ, ⵢⴻⵔⵏⴰ ⵢⴻⵜⵜⴰⴽⴽ ⴰⵣⴰⵍ ⵉ ⵜⵏⴻⵊⵊⴰⵃⵜ ⵏ ⵜⵏⴻⴱⴷⴰⴷⵜ.
ⵍⴻⵇⴷⵉⵛ-ⴰⴳⵉ ⵢⵓⵙⴰ-ⴷ ⴷ ⴰⵙⴻⴷⵎⴻⵔ ⵏ ⵢⵉⵏⴻⴹⴰⴼ ⵏ ⵓⵙⴻⵍⵡⴰⵢ ⵏ ⵜⴻⴳⴷⵓⴷⴰ, ⵎⴰⵙⵙ ⵄⴻⴱⴷⵓⵍⵎⴻⵊⵉⴷ ⵜⴻⴱⴱⵓⵏ, ⵉ ⵢⴻⴼⴽⴰⵏ ⵜⵉⵏⴻⴹⴰⴼ ⵢⴻⵚⴼⴰⵏ ⵉ ⵓⴼⵔⴰⵢ ⵏ ⵜⵎⵉⵙⴰⵍ ⵏ ⵓⴱⴹⴰ ⴰⴷⵉⴳⴰⵏ ⵙ ⵢⵉⵡⴻⵜ ⵏ ⵜⵎⵓⵖⵍⵉ ⵢⴻⵎⵙⴻⴳⴳⴻⵎⴻⵏ ⵉ ⵇⴰⴷⵔⴻⵏ ⵜⵓⵍⵎⵉⵙⵉⵏ ⵏ ⴽⵓⵍ ⵜⴰⵎⵏⴰⵟ.
ⵎⴰⵙⵙ ⵙⴰⵄⵢⵓⴷ ⵢⴻⵙⵙⴻⴽⵜⴰ-ⴷ ⴱⴻⵍⵍⵉ ⵍⵇⴰⵏⵓⵏ ⵢⴻⵔⵔⴰ ⵢⵉⵡⴻⵜ ⵏ ⵜⴰⵍⵍⵉⵜ ⵏ ⵓⴱⴻⴷⴷⴻⵍ ⵏ ⵢⵉⵡⴻⵏ ⵓⵙⴻⴳⴳⴰⵙ ⴰⵍⴰⵎⵎⴰ ⴷ 31 ⴷⵓⵊⴰⵎⴱⴻⵔ 2026. ⴷⴻⴳ ⵓⵣⵎⴻⵣ-ⴰⴳⵉ, ⵜⵉⵏⴻⴱⴷⴰⴷⵉⵏ ⵏ ⵜⵡⵉⵍⴰⵢⵉⵏ ⵜⵉⵇⴱⵓⵔⵉⵏ ⴰⴷ ⴽⴻⵎⵎⵍⴻⵏⵜ ⵍⴻⵇⴷⵉⵛ-ⵏⵙⴻⵏⵜ ⵉ ⵡⴰⴽⴽⴻⵏ ⴰⴷ ⴹⵎⴻⵏⵏⵜ ⵍⴻⵇⴷⵉⵛ ⵏ ⵜⵡⵉⵍⴰⵢⵉⵏ ⵜⵉⵎⴰⵢⵏⵓⵜⵉⵏ ⴰⵍⴰⵎⵎⴰ ⵡⴻⵊⵊⴷⴻⵏⵜ ⵙ ⵜⵎⴰⵎⵉⵜ. ⵢⴻⵏⵏⴰ-ⴷ ⴷⴰⵖⴻⵏ ⴱⴻⵍⵍⵉ ⵀⴻⴳⴳⴰⵏ ⵎⴰⵕⵕⴰ ⵢⵉⴹⵔⵉⵙⴻⵏ ⵏ ⵍⵇⴰⵏⵓⵏ ⵢⴻⵇⵇⵏⴻⵏ ⵖⴻⵔ ⵡⴰⵢⴰ, ⵍⴰⴷⵯⴰ ⵡⵉⴷ ⵢⴻⵔⵣⴰⵏ ⵉⵙⵎⴰⵡⴻⵏ ⵏ ⵜⵡⵉⵍⴰⵢⵉⵏ, ⵉⵎⴽⴰⵏⴻⵏ ⵏ ⵜⵏⴻⴱⴷⴰⴷⵜ ⴷ ⵜⵉⵍⵉⵙⵉⵏ ⵏ ⵜⵖⵉⵡⴰⵏⵉⵏ.
ⵙⴻⴳ ⵍⵊⵉⵀⴰ-ⵏⵙⴻⵏ, ⵢⵉⵎⴱⴻⵇⵇⴰⵙ ⵏ ⵓⴳⴷⵓⴷ ⴼⴽⴰⵏ ⴰⵣⴰⵍ ⵉⵊⴻⵀⴷⴻⵏ ⵉ ⵡⴰⵢⴻⵏ ⴷ-ⵢⵓⵙⴰⵏ ⴷⴻⴳ ⵓⴹⵔⵉⵙ-ⴰⴳⵉ, ⵍⴰⴷⵯⴰ ⴷⴻⴳ ⵓⵙⵊⴻⵀⴻⴷ ⵏ ⵓⴽⴽⴻⵙ ⵏ ⵡⴰⵎⵎⴰⵙ ⴷ ⵓⵇⴻⵔⵔⴻⴱ ⵏ ⵜⵏⴻⴱⴷⴰⴷⵜ ⵖⴻⵔ ⵓⵎⴻⵣⴷⴰⵖ. ⴰⵢⴰ ⴰⴷ ⵢⴻⵊⵊ ⵜⵉⵏⴻⴱⴷⴰⴷⵉⵏ ⵜⵉⴷⵉⴳⴰⵏⵉⵏ ⴰⴷ ⵟⵟⴼⴻⵏⵜ ⵜⵉⵖⵜⴻⵙⵉⵏ ⵢⴻⵔⴱⴻⵃⵏ ⵢⴻⵔⵏⴰ ⴰⴷ ⵔⵔⴻⵏⵜ ⵜⴰⵢⵏⵉⵜ ⵉ ⵢⵉⵖⵉⵍⵉⴼⴻⵏ ⵏ ⵢⵉⵎⴻⵣⴷⴰⵖ.
ⵢⴻⵍⵀⴰ ⴰⴷ ⴷ-ⵏⴻⵙⵙⴻⴽⵜⵉ ⴱⴻⵍⵍⵉ ⵍⵇⴰⵏⵓⵏ-ⴰⴳⵉ ⴰⴷ ⵢⴻⵙⵙⴻⵍⵉ 11 ⵏ ⵜⵎⴻⵏⵏⴰⴹⵉⵏ ⵏ ⵜⵏⴻⴱⴷⴰⴷⵜ ⵖⴻⵔ ⵜⵡⵉⵍⴰⵢⵉⵏ ⵜⵉⵎⴰⴷⴷⴰⵢⵉⵏ ⵢⴻⵙⵄⴰⵏ ⵎⴰⵕⵕⴰ ⵉⵣⴻⵔⴼⴰⵏ. ⵜⵉⵡⵉⵍⴰⵢⵉⵏ-ⴰⴳⵉ ⴰⴷ ⵟⵟⴼⴻⵏⵜ ⴰⴽⴰⵍ ⵢⴻⴳⴳⴰⵏ 100 ⵏ ⵢⵉⴼⴻⵏ ⵏ ⵢⵉⴽⵉⵍⵓⵎⵉⵜⵔⴻⵏ, ⵢⴻⵔⵏⴰ ⴰⵜⵉⴳ ⵏ ⵢⵉⵎⴻⵣⴷⴰⵖ-ⵏⵙⴻⵏⵜ ⵢⴻⴳⴳⴻⵔ 2.5 ⵏ ⵢⵉⵎⵍⵢⵓⵏⴻⵏ. ⴰⴷ ⵙⵄⵓⵏⵜ 40 ⵏ ⵜⴷⴰⵢⵔⵉⵡⵉⵏ ⴷ 108 ⵏ ⵜⵖⵉⵡⴰⵏⵉⵏ.
ⴰⵔⵏⵓ ⵖⴻⵔ
