ⴷⵣⴰⵢⴻⵔ ⵜⴰⵎⴰⵏⴻⵖⵜ – ⵢⴻⵖⵜⴻⵙ ⵓⵙⴻⵍⵡⴰⵢ ⵏ ⵜⴻⴳⴷⵓⴷⴰ, ⵎⴰⵙⵙ ⴰⴱⴷⴻⵍⵎⴰⴷⵊⵉⴷ ⵜⴻⴱⴱⵓⵏⴻ, ⴷⴻⴳ ⵉ ⴷ-ⵢⴻⵙⵙⴻⵍⵡ, ⴰⵙⵙ-ⴰ ⵜⵉⵎⵍⵉⵍⵉⵜⵏ ⵓⵙⴻⵇⵇⴰⵎⵓ ⵏ ⵢⵉⵏⴻⵖⵍⴰⴼⴻⵏ, ⴰⴷⵀⴰⵍ ⵏ ⵢⵉⵅⴻⵍⵍⵉⵚⴻⵏ ⵏ ⵢⵉⵃⴰⴵⴵⴻⵏ ⵉⴷⵣⴰⵢⵔⵉⵢⴻⵏ ⵏ ⵜⵙⴻⵎⵀⵓⵢⵜ ⵏ 2026 ⵢⴻⵅⵍⴻⴹ ⵖⴻⵔ 10 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⵙⴰⵏⵜⵉⵎⴻⵏ, ⴱⴰⵛ ⴰⴷ ⵢⴻⵡⵡⴻⴹ ⵜⴰⵙⵇⴰⵎⵜ ⵏ ⵍⵃⵉⴵⴵ ⵖⴻⵔ 82 ⵏ ⵢⵉⵎⴻⵍⵢⵓⵏⴻⵏ ⴷⴻⴳ ⵡⴰⴷⴻⴳ ⵏ 92 ⵏ ⵢⵉⵎⴻⵍⵢⵓⵏⴻⵏ ⵏ ⵢⵉⵙⴰⵏⵜⵉⵎⴻⵏ.
ⴷⴻⴳ ⵡⴰⵜⵜⴰⵍ-ⴰⵢⴰ, ⵢⵓⵎⴻⵔ ⵓⵙⴻⵍⵡⴰⵢ ⵏ ⵜⴻⴳⴷⵓⴷⴰ ⴰⵏⴻⵖⵍⴰⴼ ⴰⵎⴻⵏⵣⵓ ⵙ ⵜⴹⵓⵍⵍⵉ ⵏ ⵓⴹⴼⴰⵔ ⴰⵖⴻⵜⵜⴰⵙ ⵏ ⵓⵙⴰⵏⵙ ⵏ ⵜⵉⵙⵓⵏⴹⵉⵡⵉⵏ ⵏ ⵓⵙⴻⵇⵇⴰⵎⵓ ⵏ ⵢⵉⵏⴻⵖⵍⴰⴼⴻⵏ ⴷ ⵓⵏⴰⴱⴰⴹ ⴷⴻⴳ ⵓⵏⵔⴰⵔ.
ⵖⴻⴼ ⵓⵛⵉⵔⵉ ⵏ ⵓⵏⴰⵖⴻⵣ ⵏ ⵓⵣⴰⵏⴳⴻⵍ ⴷ ⵓⵍⴷⵓⵏ, ⵢⴻⵙⵙⴻⴷⴷⵉ ⵓⵙⴻⵍⵡⴰⵢ ⵏ ⵜⴻⴳⴷⵓⴷⴰ ⵖⴻⴼ ⵜⴹⵓⵍⵍⵉ ⵏ ⵓⵛⵉⵔⵉ ⵏ ⵓⵙⴻⵏⴼⴰⵔ-ⴰⵢⴰ ⴰⴷⴰⵎⵙⴰⵏ ⴰⵅⴰⵜⴰⵔ ⴷⴻⴳ ⵓⵢⵓⵔ ⵏ ⵎⴻⵖⵔⴻⵙ 2026 ⵖⴻⴼ ⵎⴰⵜⵜⴰ ⵢⴻⵍⵍⴰⵏ ⴷⴻⴳ-ⵙ ⵏ ⵡⴰⵙⴰⵢⴻⵏ ⵏ ⵓⵅⴻⴷⴷⵉⵎ ⴷ ⵢⵉⴱⴰⵖⵓⵔⴻⵏ ⵉⴷⴰⵎⵙⴰⵏⴻⵏ ⵏ ⵜⴻⵎⵏⴰⴹⵜ ⴰⴽⴽⴻⴷ ⴷⵣⴰⵢⴻⵔ ⵙ ⵓⵎⴰⵜⴰ.
ⴷⴻⴳ ⵓⵎⴻⵥⵍⵓ ⴰⴷⴷⴰⵍⴰⵏ, ⴷⴻⴼⴼⵉⵔ ⵏ ⵓⴷⵔⴰⵡ ⵏ ⵜⴻⵖⵍⴰⵎⵜ ⵜⴰⵖⴻⵍⵏⴰⵡⵜ ⵏ ⵜⵛⵉⵔⴹⴰⵔⵜ ⴷⴻⴳ ⵜⵢⴰⴽⵉⵡⵉⵏ ⵏ ⵜⴻⵇⴱⵓⵛⵜ ⵏ ⵢⵉⵖⵍⴰⵏⴻⵏ ⵏ ⵜⴻⴼⵔⵉⵇⵜ 2025, ⵉⴽⴻⵍⵍⴻⴼ ⵓⵙⴻⵍⵡⴰⵢ ⵏ ⵜⴻⴳⴷⵓⴷⴰ ⴰⵏⴻⵖⵍⴰⴼ ⵏ ⵡⴰⴷⴷⴰⵍ ⴰⴷ ⵢⴻⵙⵙⵉⵡⴻⴹ ⴰⵙⵔⵓⵖⴻⴷ-ⵏⵏⴻⵙ ⵉ ⵜⴻⵖⵍⴰⵎⵜ ⵜⴰⵖⴻⵍⵏⴰⵡⵜ, ⴷⴻⴳ ⵢⵉⵅⴻⴼ-ⵏⵙⴻⵏ ⵯⵍⴰⴷⵉⵎⵉⵔ ⵒⴻⵜⴽⵓⴼⵉⵛ, ⵢⴻⵔⵏⵉ ⵢⴻⵙⵙⵉⵔⴻⵎ-ⴰⵙⴻⵏ ⴰⴽⴰⵍⴰ ⵢⴻⵍⵀⴰⵏ ⴷⴻⴳ ⵜⴻⵇⴱⵓⵛⵜ ⵏ ⵓⵎⴰⴹⴰⵍ ⵉ ⴷ-ⵢⵓⵙⵉⵏ.
ⵢⴻⵔⵏⵉ ⵢⴻⵙⵙⵏⴻⵎⵎⴻⵔ ⵓⵙⴻⵍⵡⴰⵢ ⵏ ⵜⴻⴳⴷⵓⴷⴰ ⴰⴳⴷⵓⴷ ⴰⴷⵣⴰⵢⵔⵉ, ⵍⴰⴷⵖⴰ ⴰⵎⵖⵉⵡⴰⵏ ⴰⵖⴻⵍⵏⴰⵡ ⵢⴻⵍⵍⴰⵏ ⴷⴻⴳ ⵓⵣⵖⴰⵔ, ⵉ ⴷ-ⵢⵓⴳⵉⵔⴻⵏ ⵙⴻⴳ ⵢⵉⵖⵉⵔⴻⵏ ⵏ ⵓⵎⴰⴹⴰⵍ ⵖⴻⴼ ⵓⴷⵀⴰⵍ ⵏ ⵜⴻⵖⵍⴰⵎⵜ ⵜⴰⵖⴻⵍⵏⴰⵡⵜ.
ⴰⵔⵏⵓ ⵖⴻⵔ
