ⵍⵣⵣⴰⵢⴻⵔ ⵜⴰⵎⴰⵏⴻⵖⵜ – ⵢⴻⵙⵙⴻⵊⴷⴻⴷ ⵓⵙⴻⵍⵡⴰⵢ ⵏ ⵜⴻⴳⴷⵓⴷⴰ, ⵎⴰⵙⵙ ⵄⴻⴱⴷⵓⵍⵎⴻⵊⵉⴷ ⵜⴻⴱⴱⵓⵏ, ⴰⵙⵙ-ⴰ ⵏ ⵍⴻⵜⵏⵉⵢⴻⵏ, ⴱⴻⵍⵍⵉ ⵜⵓⵣⵣⵢⴰ ⵏ ⵓⵙⴻⵍⵡⴰⵢ ⵏ ⵜⴳⴷⵓⴷⴰ ⵏ ⵏⵏⵉⵊⵉⵔ, ⵍⴼⵔⵉⵇ ⵄⴻⴱⴷⵓⵍⵔⵔⴰⵃⵎⴰⵏ ⵜⵢⴰⵏⵉ, ⵖⴻⵔ ⵍⵣⵣⴰⵢⴻⵔ, ⵜⴻⵙⵙⴻⵍⵉ ⴰⵙⵡⵉⵔ ⵏ ⵜⴳⵎⴰⵜ ⴷ ⵜⵎⴷⵓⴽⴽⵍⵉ ⴳⴰⵔ ⵙⵏⴰⵜ ⵏ ⵜⵎⵓⵔⴰ ⵉⵎⴰⵣⵓⵣⴻⵏ, ⵢⴻⵔⵏⴰ ⵜⴻⴽⴼⴰ ⵢⵉⵡⴻⵏ ⵓⵣⵎⴻⵣ ⵓⵔ ⵏⴻⵍⵀⴰ ⵉ ⵢⴻⵍⵍⴰⵏ ⴷⴻⴳ ⵜⵎⴷⵓⴽⴽⵍⵉⵡⵉⵏ ⴳⴰⵔ-ⴰⵙⴻⵏⵜ.
ⴷⴻⴳ ⵢⵉⵡⴻⵏ ⵡⴰⵡⴰⵍ ⵢⴻⴷⴷⵓⴽⴽⵍⴻⵏ ⴷ ⵓⵙⴻⵍⵡⴰⵢ ⵏ ⵏⵏⵉⵊⵉⵔ, ⵎⴱⴰⵄⴻⴷ ⵜⵉⵎⵙⵍⴰⵢⵉⵏ ⵉ ⴷ-ⵢⴻⵍⵍⴰⵏ ⴷⴻⴳ ⵡⴰⵎⵎⴰⵙ ⵏ ⵜⵙⴻⵍⵡⵉⵜ ⵏ ⵜⴻⴳⴷⵓⴷⴰ, ⵎⴰⵙⵙ ⵜⴻⴱⴱⵓⵏ ⵢⴻⵏⵏⴰ-ⴷ: "ⴼⵔⴻⵃⴻⵖ ⴰⵟⴰⵙ ⵉⵎⵉ ⵙⵜⴻⵇⴱⴻⵍⴻⵖ ⴳⵓⵎⴰ-ⵢⵉ, ⵍⴼⵔⵉⵇ ⵄⴻⴱⴷⵓⵍⵔⵔⴰⵃⵎⴰⵏ ⵜⵢⴰⵏⵉ. ⵜⵓⵣⵣⵢⴰ-ⴰⴳⵉ ⵏⴻⴳⴳⴰⵏ-ⴰⵙ ⵢⴰⴽⴰ ⴰⵟⴰⵙ ⵏ ⵍⵡⴻⵇⵜ, ⵢⴻⵔⵏⴰ ⵜⵓⵔⴰ ⵜⴻⴹⵔⴰ-ⴷ ⵙ ⵍⵅⴻⵢⵔ."
ⵢⴻⵔⵏⴰ-ⴷ ⵓⵙⴻⵍⵡⴰⵢ ⴱⴻⵍⵍⵉ ⵙ ⵜⵓⵣⵣⵢⴰ-ⴰⴳⵉ, ⵍⵣⵣⴰⵢⴻⵔ ⴷ ⵏⵏⵉⵊⵉⵔ ⴽⴼⴰⵏⵜ ⵢⵉⵡⴻⵏ ⵓⵣⵎⴻⵣ ⵏ ⵓⵚⴻⵎⵎⵉⴷ ⵉ ⵢⴻⵍⵍⴰⵏ ⴳⴰⵔ ⵜⵏⴻⴱⴱⴰⴹⵉⵏ, ⵎⴻⵄⵏⴰ ⵢⵉⵖⴻⵔⴼⴰⵏ ⵏ ⵙⵏⴰⵜ ⵏ ⵜⵎⵓⵔⴰ ⵇⵇⵉⵎⴻⵏ ⴷⴰⵢⵎⴻⵏ ⴷⴷⵓⴽⴽⵍⴻⵏ. ⵢⴻⵏⵏⴰ-ⴷ ⴱⴻⵍⵍⵉ ⵏⵏⵉⵊⵉⵔ ⴷ ⵜⴰⵎⵓⵔⵜ ⵜⴰⵊⴰⵔⴻⵜ ⵢⴻⵔⵏⴰ ⴷ ⵜⴰⵎⴰⵣⵓⵣⵜ, ⵢⴻⵔⵏⴰ ⵎⵙⴰⴼⴰⵏ ⵖⴻⴼ ⵓⵙⵊⴻⵀⴻⴷ ⵏ ⵓⵎⵢⴻⵍⵍⴻⵍ ⴷⴻⴳ ⵓⵃⵔⵉⵛ ⵏ ⵍⴰⵎⴰⵏ, ⵓⵥⴰⵔⵓ, ⵜⵔⵉⴽⵉⵜ ⴷ ⵓⵙⵉⵍⴻⵯ ⵏ ⵢⵉⵍⵎⴻⵣⵢⴻⵏ ⴷⴻⴳ ⵜⵙⴻⴷⴷⴰⵡⵉⵢⵉⵏ ⴷ ⵍⵄⴻⵙⴽⴻⵔ.
ⵎⴰⵙⵙ ⵄⴻⴱⴷⵓⵍⵎⴻⵊⵉⴷ ⵜⴻⴱⴱⵓⵏ ⵢⴻⵙⴼⴻⵔⵔⴻⵯ-ⴷ ⵢⵉⵡⴻⵜ ⵏ ⵜⵎⵙⴰⵍⵜ ⵉⵊⴻⵀⴷⴻⵏ: ⵍⵣⵣⴰⵢⴻⵔ ⴷ ⵏⵏⵉⵊⵉⵔ ⵎⵙⴰⴼⴰⵏⵜ ⴰⴽⴽⴻⵏ ⴰⴷ ⴱⴷⵓⵏⵜ ⴰⵙⴻⵏⴼⴰⵔ ⴰⵎⴻⵇⵇⵔⴰⵏ ⵏ ⵓⴱⵔⵉⴷ ⵏ ⵓⴳⴰⵣ ⵉ ⵢⴻⵣⴳⴰⵔⴻⵏ ⵜⵚⴻⵃⵔⴰ . ⵍⴻⵇⴷⵉⵛ-ⴰⴳⵉ ⴰⴷ ⵢⴻⴱⴷⵓ ⵎⴱⴰⵄⴻⴷ ⵡⴰⴳⴳⵓⵔ ⵏ ⵔⴻⵎⴹⴰⵏ ⴰⵎⴻⴳⴳⴰⵣ, ⵢⴻⵔⵏⴰ ⵜⵜⴻⵛⴰⵔⵉⴽⴰ ⵏ "ⵙⵓⵏⴰⵟⵔⴰⴽ" ⴷ ⵏⴻⵜⵜⴰⵜ ⴰⵔⴰ ⵢⴻⵣⵡⵉⵔⴻⵏ ⵉ ⵡⴰⴽⴽⴻⵏ ⴰⴷ ⵜⴻⵙⵙⴻⵔⵙ ⵉⴱⴻⵍⵍⵉⵄⴻⵏ ⵏ ⵓⴳⴰⵣ ⴷⴻⴳ ⵡⴰⴽⴰⵍ ⵏ ⵏⵏⵉⵊⵉⵔ.
ⵜⴰⴳⴳⴰⵔⴰ, ⵓⵙⴻⵍⵡⴰⵢ ⵢⴻⵏⵏⴰ-ⴷ ⴱⴻⵍⵍⵉ ⵍⵣⵣⴰⵢⴻⵔ ⴰⴷ ⵜⵃⴰⴷⴻⵔ ⵜⵉⵎⴷⵓⴽⴽⵍⵉ ⵢⴻⵍⵍⴰⵏ ⴳⴰⵔ-ⴰⵙ ⴷ ⵏⵏⵉⵊⵉⵔ ⵙⴻⴳ ⵣⵉⴽ, ⵢⴻⵔⵏⴰ ⵜⴰⵎⴷⵓⴽⴽⵍⵉ-ⴰⴳⵉ ⴰⴷ ⵜⴻⵍⵍⵉ ⴷ ⴰⵎⴻⴷⵢⴰ ⵢⴻⵍⵀⴰⵏ ⵉ ⵎⴰⵕⵕⴰ ⵜⵎⵓⵔⴰ ⵏ ⵜⴼⵔⵉⵇⵜ.
