ⴰⴷⵉⵙ ⴰⴱⴰⴱⴰ (ⵉⵜⵢⵓⴱⵢⴰ) – ⵢⴻⴼⴽⴰ ⵓⵙⴻⵍⵡⴰⵢ ⵏ ⵜⴻⴳⴷⵓⴷⴰ, ⵎⴰⵙⵙ ⵄⴻⴱⴷⵓⵍⵎⴻⵊⵉⴷ ⵜⴻⴱⴱⵓⵏ, ⴰⵙⵙ-ⴰ ⵏ ⵍⵃⴻⴷ, ⵢⵉⵡⴻⵏ ⵡⴰⵡⴰⵍ ⵉⵊⴻⵀⴷⴻⵏ ⵉ ⵢⵉⵎⴻⵙⴽⴰⵔⴻⵏ ⴷⴻⴳ ⵜⵉⵎⵍⵉⵍⵉⵜ ⵏ ⵢⵉⵎⵙⴻⵍⵡⴰⵢⴻⵏ ⵏ ⵜⵎⵓⵔⴰ ⵢⴻⵇⵇⵏⴻⵏ ⵖⴻⵔ ⵜⵙⴻⵇⵇⴰⵎⵓⵜ ⵜⵓⵏⵏⵉⴳⵜ ⵏ ⵜⴰⴷⵓⴽⴽⵍⵉ ⵜⴰⴼⵔⵉⵇⵉⵜ ⵢⴻⵔⵣⴰⵏ ⵡⵓⵏⵥⵓⵍ ⵏ ⵙⵓⴷⴰⵏ (C5). ⵜⵉⵎⵍⵉⵍⵉⵜ-ⴰⴳⵉ ⵜⴻⴹⵔⴰ-ⴷ ⴷⴻⴳ ⵔⵔⵉⴼ ⵏ ⵜⵙⵓⵜⵍⵜ ⵜⵉⵙ 39 ⵏ ⵜⴰⴷⵓⴽⴽⵍⵉ ⵜⴰⴼⵔⵉⵇⵉⵜ ⴷⴻⴳ ⴰⴷⵉⵙ ⴰⴱⴰⴱⴰ, ⵢⴻⵔⵏⴰ ⵢⴻⵖⵔⴰ-ⵜ ⵓⵎⴻⵣⵡⴰⵔⵓ ⵏ ⵢⵉⵏⴻⵖⵍⴰⴼⴻⵏ ⵎⴰⵙⵙ ⵙⵉⴼⵉ ⵖⵔⵉⴱ.
ⴷⴻⴳ ⵡⴰⵡⴰⵍ-ⵉⵙ, ⵓⵙⴻⵍⵡⴰⵢ ⵜⴻⴱⴱⵓⵏ ⵢⴻⴼⴽⴰ ⵜⴰⵢⵏⵉⵜ ⵜⴰⵎⴻⵇⵇⵔⴰⵏⵜ ⵉ ⵍⴻⵇⴷⵉⵛ ⵏ ⵓⵙⴻⵍⵡⴰⵢ ⵏ ⵢⴻⴼⴼⵓⵙ ⵏ ⵜⴼⵔⵉⵇⵜ, ⵙⵉⵔⵉⵍ ⵔⴰⵎⴰⴼⵓⵣⴰ, ⵢⴻⵔⵏⴰ ⵢⴻⵙⵙⴻⴽⵏ-ⴷ ⴱⴻⵍⵍⵉ ⵍⵣⵣⴰⵢⴻⵔ ⵜⴻⵇⵇⴻⵏ ⵜⵎⵓⴽⴽⵍⵉ-ⵙ ⴷ ⵡⵓⵏⵥⵓⵍ ⵏ ⵙⵓⴷⴰⵏ ⵉ ⵡⴰⴽⴽⴻⵏ ⴰⴷ ⵜⴻⴱⵏⵓ ⵜⵎⴻⵔⵙⴻⵍⵉⵏ-ⵉⵙ ⵢⴻⵔⵏⴰ ⴰⴷ ⵜⵉⴷⵉⵔ ⴷⴻⴳ ⵍⴰⵎⴰⵏ ⴷ ⵓⴼⵔⴰⵃ.
ⵓⵙⴻⵍⵡⴰⵢ ⵢⴻⵙⴼⴻⵔⵔⴻⵯ-ⴷ ⴽⵔⴰⴹ (03) ⵏ ⵜⵉⵔⵉⵛⵉⵏ ⵉⵙⴰⵙⵉⵢⴻⵏ ⵉ ⵡⴰⴽⴽⴻⵏ ⴰⴷ ⵜⴻⴼⴼⴻⵖ ⵜⵎⵓⵔⵜ-ⴰⴳⵉ ⵜⴰⵎⴰⵣⵓⵣⵜ ⵙⴻⴳ ⵜⵡⴰⵖⵉⵜ:
ⴷⵉ ⵜⵣⵡⴰⵔⴰ: ⴰⵣⴰⵍ ⵏ ⵓⵎⵛⵉⵡⴰⵔ ⴷ ⵓⴷⵉⵡⴻⵏ. ⵍⵣⵣⴰⵢⴻⵔ ⵜⵓⵎⴻⵏ ⴱⴻⵍⵍⵉ ⴰⵎⵛⵉⵡⴰⵔ ⴷ ⴰⴱⵔⵉⴷ ⵡⴰⵃⴷ-ⵉⵙ ⵉ ⵢⴻⵜⵜⴰⵡⵉⵏ ⵖⴻⵔ ⵜⵍⴻⵡⵡⵉⵜ (ⵙⵙⵍⴰⵎ) ⵉⴷⵓⵎⴻⵏ. ⵢⴻⵙⵙⵓⵜⵓⵔ ⵙⴻⴳ ⵎⴰⵕⵕⴰ ⵢⵉⴳⵔⴰⵡⴻⵏ ⵏ ⵙⵙⵢⴰⵙⴰ ⴰⴷ ⴷⴷⵓⴽⴽⵍⴻⵏ ⴷⴻⴳ ⵢⵉⵡⴻⵏ ⵓⵎⵛⵉⵡⴰⵔ ⵢⴻⵚⴼⴰⵏ ⵓⵇⴱⴻⵍ ⴰⴷ ⴷ-ⵢⴰⵡⴹⴻⵏ ⵡⵓⵙⵙⴰⵏ ⵏ ⵓⴼⵔⴰⵏ (ⵜⵉⴼⵔⴰⵏⵉⵏ).
ⵡⵉⵙ ⵙⵉⵏ: ⴰⵡⴰⵀⵉⵍ ⵏ ⵓⴱⵔⵉⴷ ⵢⴻⵚⴼⴰⵏ ⵉ ⵜⴼⵔⴰⵏⵉⵏ. ⵓⵙⴻⵍⵡⴰⵢ ⵢⴻⵙⵙⵓⵜⵓⵔ ⵙⴻⴳ ⵜⵏⴻⴱⴱⴰⴹⵜ ⵏ ⵡⵓⵏⵥⵓⵍ ⵏ ⵙⵓⴷⴰⵏ ⴰⴷ ⵜⴻⴳ ⵢⵉⵡⴻⵏ ⵓⵡⴰⵀⵉⵍ ⵏ ⵓⵎⴰⵀⵉⵍ ⵢⴻⴱⵏⴰⵏ ⵖⴻⴼ ⵍⵡⴻⵇⵜ ⵉⵚⴻⵃⵃⴰⵏ, ⵉ ⵡⴰⴽⴽⴻⵏ ⴰⴷ ⴷ-ⵢⵉⵍⵉ ⵓⴼⵔⴰⵏ ⵢⴻⵍⵍⴻⵍⵍⵉⵏ ⵢⴻⵔⵏⴰ ⵢⴻⵙⴽⴰⵏⴰⵢ ⵍⴻⴱⵖⵉ ⵜⵉⴷⴻⵜ ⵏ ⵓⴳⴷⵓⴷ.
ⵡⵉⵙ ⴽⵔⴰⴹ: ⴰⵙⴷⵓⴽⴽⴻⵍ ⵏ ⵜⴳⴳⴰⵍⵉⵏ ⵏ ⵍⴰⵎⴰⵏ. ⵓⵙⴻⵍⵡⴰⵢ ⵢⴻⵏⵏⴰ-ⴷ ⴱⴻⵍⵍⵉ ⴰⵙⴱⴻⴷⴷ ⵏ "ⵜⴳⴳⴰⵍⵉⵏ ⵢⴻⴷⴷⵓⴽⴽⵍⴻⵏ" ⴷ ⵜⴰⵔⵉⵛⵜ ⵏ ⵜⴻⴼⵍⴻⵙⵜ ⴳⴰⵔ ⵢⵉⵖⴻⵔⴼⴰⵏ. ⵢⴻⵙⵙⵓⵜⵓⵔ ⴰⴷ ⵣⵣⴻⵔⴱⴻⵏ ⴷⴻⴳ ⵓⵃⴻⴳⴳⵉ ⵏ ⵢⵉⵅⴻⴷⴷⴰⵎⴻⵏ ⵏ ⵍⴰⵎⴰⵏ ⵉ ⵡⴰⴽⴽⴻⵏ ⴰⴷ ⵃⴰⴷⵔⴻⵏ ⵢⵉⵖⵔⵉⵎⴻⵏ ⵢⴻⵔⵏⴰ ⴰⴷ ⵙⵊⴻⵀⴷⴻⵏ ⵍⵇⴰⵏⵓⵏ.
ⵎⴰⵙⵙ ⵄⴻⴱⴷⵓⵍⵎⴻⵊⵉⴷ ⵜⴻⴱⴱⵓⵏ ⵢⴻⵙⵙⴻⴽⵜⴰ-ⴷ ⴱⴻⵍⵍⵉ ⵍⵣⵣⴰⵢⴻⵔ ⵜⴻⵇⴷⴻⵛ ⴰⵟⴰⵙ ⴷⴻⴳ ⵓⵙⴻⴳⴳⴰⵙ 2025 ⵉⵎⵉ ⵜⴻⵙⵙⴻⵍⵡⴰⵢ ⴰⵙⵇⴰⵎⵓ ⵏ ⵜⵍⴻⵡⵡⵉⵜ ⴷ ⵍⴰⵎⴰⵏ ⵏ ⵜⴼⵔⵉⵇⵜ. ⵢⴻⵏⵏⴰ-ⴷ ⴱⴻⵍⵍⵉ ⵍⵣⵣⴰⵢⴻⵔ ⴰⴷ ⵜⴻⵇⵇⵉⵎ ⴷ ⵜⴰⵎⴷⵓⴽⴽⴻⵍⵜ ⵏ ⵡⵓⵏⵥⵓⵍ ⵏ ⵙⵓⴷⴰⵏ ⵢⴻⵔⵏⴰ ⵜⴻⵙⵙⵓⵜⵓⵔ ⵙⴻⴳ ⵓⵎⴰⴹⴰⵍ ⴰⴷ ⵢⴻⴼⴽ ⵜⴰⵍⵍⴻⵍⵜ ⵜⴰⴼⴳⴰⵏⵉⵜ ⵉ ⵢⵉⵖⴻⵔⴼⴰⵏ ⵢⴻⵜⵜⵓⵜⵢⴻⵏ.
ⵜⴰⴳⴳⴰⵔⴰ, ⵓⵙⴻⵍⵡⴰⵢ ⵢⴻⵏⵏⴰ-ⴷ ⴱⴻⵍⵍⵉ ⴰⵔⴻⴱⴱⴰⵃ ⵏ ⵡⵓⵏⵥⵓⵍ ⵏ ⵙⵓⴷⴰⵏ ⴷ ⴰⵔⴻⴱⴱⴰⵃ ⵏ ⵎⴰⵕⵕⴰ ⵜⴼⵔⵉⵇⵜ. ⵢⴻⵍⵀⴰ ⴰⴷ ⴷⴷⵓⴽⴽⵍⴻⵏ ⵢⵉⴼⵔⵉⵇⵉⵢⴻⵏ ⵉ ⵡⴰⴽⴽⴻⵏ ⴰⴷ ⵃⴰⴷⵔⴻⵏ ⵜⴰⵎⵓⵔⵜ-ⴰⴳⵉ ⴰⵍⴰⵎⵎⴰ ⵜⴻⵡⵡⴻⴹ ⵖⴻⵔ ⵍⴰⵎⴰⵏ ⴷ ⵜⵍⴻⵡⵡⵉⵜ.
ⴰⵔⵏⵓ ⵖⴻⵔ
