ⵇⵙⴻⵏⵟⵉⵏⴰ – ⵢⴻⵏⵏⴰ-ⴷ ⵓⵏⵖⵍⴰⴼ ⵏ ⵓⵙⵍⵎⴻⴷ ⵓⵏⵏⵉⴳ ⴷ ⵓⵏⴰⴷⵉ ⵓⵙⵙⵏⴰⵏ, ⴽⴰⵎⴰⵍ ⴱⴻⴷⴷⴰⵔⵉ, ⴰⵙⵙ-ⴰ ⵏ ⵍⴻⵜⵏⵉⵢⴻⵏ ⵙⴻⴳ ⵜⵖⵉⵡⴰⵏⵜ ⵏ ⵇⵙⴻⵏⵟⵉⵏⴰ, ⴱⴻⵍⵍⵉ "ⵍⵣⵣⴰⵢⴻⵔ ⵜⴻⵜⵜⴻⴷⴷⵓ ⵙ ⵜⵖⴰⵡⵍⴰ ⴷⴻⴳ ⵓⵏⴰⴷⵉ ⵓⵙⵙⵏⴰⵏ ⵉ ⵡⴰⴽⴽⴻⵏ ⴰⴷ ⵜⴻⵙⵏⴻⴼⵍⴰⵢ ⴰⵃⵔⵉⵛ ⵏ ⵜⴼⵍⴰⵃⵜ, ⵜⵉⵎⴻⴳⵓⵔⵉⵡⵉⵏ ⵏ ⵢⵉⵙⴰⴼⴰⵔⴻⵏ ⴷ ⵢⵉⵃⵛⴻⵏ ⵏⵏⵉⴹⴻⵏ".
ⴷⴻⴳ ⵢⵉⵡⴻⵏ ⵡⴰⵡⴰⵍ ⵉ ⵢⴻⴼⴽⴰ ⴷⴻⴳ ⵜⵙⴻⴷⴷⴰⵡⵉⵜ ⵏ ⵚⴰⵍⴻⵃ ⴱⵓⵏⴱⴻⵏⴷⵉⵔ, ⵎⴰⵙⵙ ⴱⴻⴷⴷⴰⵔⵉ ⵢⴻⵙⴼⴻⵔⵔⴻⵯ-ⴷ ⴱⴻⵍⵍⵉ "ⴰⵡⴻⵍⵍⴻⵀ ⵏ ⵓⵏⴰⴷⵉ ⵓⵙⵙⵏⴰⵏ ⵖⴻⵔ ⵜⵎⵉⵙⴰⵍ ⵏ ⵜⴷⴰⵎⵙⴰ ⴷ ⵜⴰⵖⴻⵔⵜ ⵉⵊⴻⵀⴷⴻⵏ ⵏ ⵓⵡⴰⵏⴰⴽ". ⵢⴻⵔⵏⴰ ⵢⴻⵏⵏⴰ-ⴷ ⴱⴻⵍⵍⵉ ⵜⴰⵏⴻⵖⵍⴰⴼⵜ-ⵉⵙ ⵜⴻⵅⴷⴻⵎ ⵉ ⵡⴰⴽⴽⴻⵏ ⴰⴷ ⵜⴻⴼⴽ ⴰⵣⴰⵍ ⵉ ⵡⴰⵢⴻⵏ ⵉ ⴷ-ⵢⴻⵜⵜⴻⴼⴼⵓⵖⵓⵏ ⵙⴻⴳ ⵓⵏⴰⴷⵉ, ⵢⴻⵔⵏⴰ ⴰⴷ ⵜⴻⵇⵇⴻⵏ ⵜⴰⵙⴻⴷⴷⴰⵡⵉⵜ ⵖⴻⵔ ⵜⴷⴰⵎⵙⴰ ⵜⴰⵖⴻⵍⵏⴰⵡⵜ ⵙ ⵜⴰⵍⵍⴻⵍⵜ ⵏ ⵢⵉⵙⴻⵏⴼⴰⵔⴻⵏ ⵏ ⵓⵙⵏⵓⵍⴼⵓ. ⴰⵢⴰ ⴰⴷ ⵢⴻⴼⴽ ⵜⴰⴳⵏⵉⵜ ⵉ ⵡⴰⴽⴽⴻⵏ ⴰⴷ ⵏⴰⵡⴻⴹ ⵖⴻⵔ ⵍⴰⵎⴰⵏ ⵏ ⵜⵓⵜⵛⵉⵜ ⴷ ⵜⴷⵓⴳⴰⵎⵜ ⵏ ⵜⵣⵎⴻⵔⵜ.
ⴰⵏⵖⵍⴰⴼ ⵢⴻⵏⵏⴰ-ⴷ ⴷⴰⵖⴻⵏ ⴱⴻⵍⵍⵉ ⵜⴰⵙⴻⴷⴷⴰⵡⵉⵜ ⵜⴰⵣⵣⴰⵢⵔⵉⵜ ⵜⴻⵙⵄⴰ ⵜⵓⵔⴰ ⵜⵉⵎⵓⵙⵏⵉⵡⵉⵏ ⵉⵙⵜⵔⴰⵜⵉⵊⵉⵢⴻⵏ ⵉ ⵢⴻⵜⵜⴰⵊⵊⴰⵏ ⴰⴷ ⵜⴻⵍⵍⵉ ⴷ ⵜⴰⴷⴻⵊⵊⴰⵢⵜ ⵏ ⵜⴷⴰⵎⵙⴰ ⵜⴰⵎⴰⵢⵏⵓⵜ. ⵢⴻⴼⴽⴰ ⴷⴰⵖⴻⵏ ⵜⴰⵢⵏⵉⵜ ⵉ ⵓⵃⴰⴷⴰⵔ ⵏ ⵓⵙⵏⵓⵍⴼⵓ ⵙ ⵓⵊⴻⵔⵔⴻⴷ ⵏ ⵜⵓⴽⴽⵉⵡⵉⵏ ⵏ ⵓⵙⵏⵓⵍⴼⵓ (brevets), ⴰⴽⴽⴻⵏ ⵉⵏⴰⴳⵎⴰⵢⴻⵏ ⴷ ⵢⵉⵏⴻⵍⵎⴰⴷⴻⵏ ⴰⴷ ⵣⴻⵎⵔⴻⵏ ⴰⴷ ⵙⴻⵇⴷⴻⵛⴻⵏ ⵜⵉⵎⵓⵙⵏⵉⵡⵉⵏ-ⵏⵙⴻⵏ ⵉ ⵡⴰⴽⴽⴻⵏ ⴰⴷ ⴷ-ⴳⴻⵏ ⴰⴷⵔⵉⵎ ⴷ ⵜⵔⴻⵣⵡⴰ.
ⴷⴻⴳ ⵜⵓⵣⵣⵢⴰ-ⴰⴳⵉ, ⴰⵏⵖⵍⴰⴼ ⵢⴻⵍⴷⴰ ⴰⵎⵎⴰⵙ ⴰⵖⴻⵍⵏⴰⵡ ⵏ ⵓⵍⵎⵎⵓⴷ ⵏ ⵡⵉⴷ ⵓⵔ ⵏⴻⵜⵜⵡⴰⵍⵉ (ⴱⵔⴰⵢ) ⴷⴻⴳ ⵜⵙⴻⴷⴷⴰⵡⵉⵜ ⵏ ⵚⴰⵍⴻⵃ ⴱⵓⵏⴱⴻⵏⴷⵉⵔ. ⵢⴻⵍⴷⴰ ⴷⴰⵖⴻⵏ ⵢⵉⵡⴻⵏ ⵡⴰⵙⴽⴽⵓⴷ ⵢⴻⴷⴷⵓⴽⴽⵍⴻⵏ ⵉ ⵢⵉⵏⴻⵍⵎⴰⴷⴻⵏ ⵢⴻⵙⵄⴰⵏ ⵢⵉⵙⴻⵏⴼⴰⵔⴻⵏ ⵏ ⵓⵙⵏⵓⵍⴼⵓ. ⵢⴻⵔⵏⴰ ⵢⴻⵍⴷⴰ ⵜⴰⵏⵎⴻⵍ ⵓⵏⵏⵉⴳⵜ ⵏ ⵓⵙⵉⴹⴻⵏ ⴷ ⵡⴻⴷⵔⵉⵎ ⴷⴻⴳ ⵄⵍⵉ ⵎⴻⵏⵊⵍⵉ, ⵉ ⵢⴻⵡⵡⵉⵏ ⵉⵙⴻⵎ ⵏ ⵓⵎⴳⴰⵔⵓ ⵙⵍⵉⵎⴰⵏ ⴱⵓⵎⵄⴰⵣⴰ.
ⵎⴰⵙⵙ ⴱⴻⴷⴷⴰⵔⵉ ⵢⴻⵔⵣⴰ ⴷⴰⵖⴻⵏ ⵖⴻⵔ ⵜⵎⴰⵏⵓⵜ ⵏ ⵓⵏⴰⴷⵉ ⴷⴻⴳ ⵍⵄⴻⵔⵔⴰⵡⵉⵢⴰ (ⵍⵅⵔⵓⴱ), ⴷⴻⴳ ⵓⵃⵔⵉⵛ ⵏ ⵜⴼⵍⴰⵃⵜ, ⵉ ⵡⴰⴽⴽⴻⵏ ⴰⴷ ⵉⵡⴰⵍⵉ ⴰⵎⴻⴽ ⵙⵏⴻⴼⵍⴰⵢⴻⵏ ⴰⴼⴰⵔⵉⵙ ⵏ ⵍⵎⵓⵣ ⴷ ⵓⵙⴻⴳⴳⴻⵎ ⵏ ⵓⴼⴰⵔⵉⵙ ⴰⵖⴻⵍⵏⴰⵡ. ⴷⴻⴳ ⵜⴰⴳⴳⴰⵔⴰ, ⵢⴻⴼⴽⴰ ⵢⵉⵡⴻⵏ ⵓⵎⴰⴳⵔⴰⴷ ⵏ ⵓⵙⴻⴷⴷⴻⵔ ⵏ ⵢⵉⵙⴻⵏⴼⴰⵔⴻⵏ ⵉ ⵡⴰⵟⴰⵙ ⵏ ⵡⵉⴷ ⵢⴻⵙⵏⵓⵍⴼⴰⵏ ⵢⵉⵙⴻⵏⴼⴰⵔⴻⵏ ⵢⴻⵍⵀⴰⵏ.
ⴰⵔⵏⵓ ⵖⴻⵔ
