ⴰⵙⵙⴻⵎⴼⴻⴷ ⵏ ⵢⵉⵔⵎⵓⴷⴻⵏ ⵏ ⵜⵣⵉⵡⵉⵏ ⵜⵉⵖⴻⵍⵏⴰⵡⵉⵏ ⵏ ⵜⴽⴰⵜⵓⵜ ⴷ ⵓⵎⵣⵔⵓⵢ

ⵜⵜⵙⴻⵏⵏⵉⴼⴻⵏⵜ, ⴰⵙⵙ-ⴰ ⵏ ⵍⴰⵔⴻⴱⵄⴰ, ⴷⴻⴳ ⵓⵙⴰⴳⵓⵔ ⵉⴳⵔⴰⵖⵍⴰⵏ ⵏ ⵢⵉⵏⴰⵎⵓⴳⴳⴰⵔⴻⵏ "Abdelatif Rahal" ⴷⴻⴳ ⴷⵣⴰⵢⴻⵔ ⵜⴰⵎⴰⵏⴰⵖⵜ, ⵜⵎⴰⵀⵍⵉⵡⵉⵏ ⵏ ⵜⵣⵉⵡⵉⵏ ⵜⵉⵖⴻⵍⵏⴰⵡⵉⵏ ⵏ ⵜⴽⴰⵜⵓⵜ ⴷ ⵓⵎⵣⵔⵓⵢ, ⵉ ⵢⴻⵜⵜⵡⴰⵙⵙⴻⵡⵙⴻⵢⴻⵏ ⴷⴷⴰⵡ ⵏ ⵓⵃⵔⴰⵣ ⴰⵎⴰⵜⵜⴰⵢ ⵏ ⵓⵙⴻⵍⵡⴰⵢ ⵏ ⵜⴻⴳⴷⵓⴷⴰ, ⵎⴰⵙⵙ Abdelmadjid Tebboune.

ⵢⴻⵙⵙⴽⴻⵏ ⵓⵃⵔⵉⵞ ⵏ ⵚⵚⴱⴻⵃ ⵏ ⵡⴰⵙⵙ ⵡⵉⵙ ⵙⵉⵏ (2) ⵏ ⵜⵣⵉⵡⵉⵏ-ⴰ ⵉ ⴷ-ⵢⴻⵜⵜⵉⵍⵉⵏ ⴷⴷⴰⵡ ⵏ ⵓⵎⴻⵏⵣⴰⵢ "ⵜⴰⴽⴰⵜⵓⵜ ⵏ ⵜⵎⵓⵔⵜ, ⴰⵎⵣⵔⵓⵢ ⵏ ⵜⵎⴻⵜⵜⵉ, ⴰⴼⴰⵔⴰⵚ ⵏ ⵜⵙⵓⵜⴰⵜⵉⵏ", ⵓⵙⵙⴻⵍⵃⵉ ⵏ ⵢⵉⴷⵉⵡⴰⵍⴻⵏ ⵉⵎⴰⵙⵙⴰⵏⴻⵏ ⵉ ⵉⵙⵙⴻⵎⵍⴻⵍⴻⵏ, ⴷⴻⴳ ⵓⵙⵡⵉⵔ ⵏ ⵙⵏⴰⵜ ⵏ ⵜⵏⴻⵣⴷⵓⵖⵉⵏ ⵏ ⵢⵉⵙⵡⵉⵢⴻⵏ, ⵉⵎⵓⵣⵔⴰⴳ, ⵜⵙⵓⴷⴷⵡⵉⵏ ⴷ ⵢⵉⴼⴻⵔⵔⴷⵉⵙⴻⵏ ⵢⴷⵓⵙⴰ̄ⵏⴻⵏ, ⵖⴻⵔ ⵢⵉⴷⵉⵙ ⵏ ⵢⵉⵎⴼⴻⵔⴳⴻⵏ ⵏ ⵢⵉⵃⵔⵉⵞⴻⵏ ⵢⵉⵏⴻⵖⵍⴰⴼⴻⵏ ⵉ ⵉⵞⵓⴷⴷⴻⵏ ⴷ ⵜⵙⵓⴷⴷⵡⵉⵏ ⵜⵉⵖⴻⵍⵏⴰⵡⵉⵏ.

ⵜⵙⴼⴻⵃ ⵜⵏⴻⵣⴷⵓⵖⵜ ⵜⴰⵎⴻⵣⵡⴰⵔⵓⵜ ⵖⴻⵔ "ⵓⵙⵙⴻⴼⴻⵖ ⵙ ⵜⴼⴰⴹⵜ ⵉ ⵉⵃⵓⵣⴻⵏ ⴰⵙⴰⴳⵓⵔ ⵏ ⵢⵉⵙⴰⴳⵓⵔⴻⵏ ⵉⵖⴻⵍⵏⴰⵡⴻⵏ ⴷⴻⴳ ⵓⵃⵔⵉⵞ ⵏ ⵜⴽⴰⵜⵓⵜ ⴷ ⵓⵎⵣⵔⵓⵢ", ⴰⵏⴷⴰ ⵉⵃⵓⵣ ⵢⵉⵏⴻⴷⴷⴰⵡⴻⵏ ⵡⴰⵟⴰⵙ ⵏ ⵢⵉⵙⵡⵉⵢⴻⵏ ⵉ ⵉⵞⵓⴷⴷⴻⵏ ⵖⴻⵔ "ⵜⵙⵓⴷⴷⵡⵉⵏ ⵜⵉⵖⴻⵍⵏⴰⵡⵉⵏ ⵏ ⵜⴽⴰⵜⵓⵜ", "ⵉⵙⴰⴹⵓⴼⴻⵏ ⴷ ⵜⵙⵓⴳⵉⵏⵜ ⵜⵉⵎⴰⵜⴰⵡⵉⵏ ⵉ ⵉⵞⵓⴷⴷⴻⵏ", "ⴰⵙⵙⵜⴻⵢ ⵏ ⵢⵉⵖⵙⴰⵏ ⴷ ⵢⵉⴽⴰⵔⴰⵎⴻⵏ", ⵖⴻⵔ ⵢⵉⴷⵉⵙ ⵏ "ⵓⵜⵉⵍⵉⵏ ⵏ ⵜⴽⴰⵜⵓⵜ ⵜⴰⵖⴻⵍⵏⴰⵡⵜ ⴷⴻⴳ ⵓⵙⵙⴻⴳⵎⵉ" ⴷ "ⵜⴼⴻⴼⵔⴰⵏⵜ ⵜⴰⵎⵣⵔⵓⵢⵜ".

ⵎⴰ ⴷ ⵜⴰⵏⴻⵣⴷⵓⵖⵜ ⵜⵉⵙ ⵙⵏⴰⵜ ⵜⵙⴼⴻⵃ ⵖⴻⵔ "ⵓⵙⵙⴻⴼⴻⵖ ⵙ ⵜⴼⴰⴹⵜ ⵉ ⵉⵃⵓⵣⴻⵏ ⴰⵙⵙⴻⴱⴷⵓⴷ ⵏ ⵢⵉⴽⴰⵢⴰⴷⴻⵏ ⴷ ⵢⵉⵅⵉⵍⴼⴻⵏ ⴷⴻⴳ ⵓⵏⴰⴳⵔⴰⵡ ⵏ ⵜⴽⴰⵜⵓⵜ ⵜⴰⵖⴻⵍⵏⴰⵡⵜ", ⵙ ⵓⴷⵉⵡⴰⵍ ⵏ "ⵓⴳⵔⴰⵏ ⵏ ⵢⵉⴽⴰⵔⴰⵎⴻⵏ ⴷ ⵜⵎⴻⵙⵏⴰ ⵜⴰⵎⴰⵢⵏⵓⴷⵜ", "ⵓⴳⵓⵔⴻⵏ ⵏ ⵓⵙⵙⴻⵍⵎⴻⴷ ⵏ ⵓⵎⵣⵔⵓⵢ" ⴷ "ⵓⵙⵙⴻⵎⵥⵉ ⵏ ⵓⵙⵙⴻⴱⵍⵓ ⴷⴻⴳ ⵜⴽⴰⵜⵓⵜ ⵜⴰⵎⴻⵏⵙⴰⵢⵜ", ⴷ ⵢⵉⴼⴻⵔⵔⴷⵉⵙⴻⵏ ⵏⵏⵉⴹⴻⵏ.

ⵉⵜⵜⵡⴰⵙⵙⴻⴽⵙ ⴷⴰⴽⴽⴻⵏ ⵜⵣⵉⵡⵉⵏ ⵜⵉⵖⴻⵍⵏⴰⵡⵉⵏ ⵏ ⵜⴽⴰⵜⵓⵜ ⴷ ⵓⵎⵣⵔⵓⵢ ⴱⴻⵏⵜ-ⴷ ⵜⵎⴰⵀⵍⵉⵡⵉⵏ-ⵏⵙⴻⵏⵜ ⵉⴹⴻⵍⵍⵉ, ⴷⴷⴰⵡ ⵏ ⵓⵙⵙⴻⵡⵙⴻⵢ ⵏ ⵓⵏⴻⵖⵍⴰⴼ ⵏ ⵢⵉⵎⵊⴰⵀⴻⴷⴻⵏ ⴷ ⵢⵉⵎⵡⴰⵍⴰⵏ ⵏ ⵢⵉⵣⴻⵔⴼⴰⵏ, ⵎⴰⵙⵙ Abdelmalek Tacherift, ⵙ ⵓⵜⵜⴻⴽⴽⵉ ⵏ ⵢⵉⵎⵎⴰⵙⵍⴰⵢⴻⵏ ⵏ ⵓⵏⴰⴱⴰⴹ ⵖⴻⵔ ⵢⵉⴷⵉⵙ ⵏ ⵢⵉⵎⴼⴻⵔⴳⴻⵏ ⵏ ⵜⵙⵓⴷⴷⵡⵉⵏ, ⵢⵉⴼⴻⵔⵔⴷⵉⵙⴻⵏ ⵉⵖⴻⵍⵏⴰⵡⴻⵏ ⴷ ⵢⵉⵎⵎⴰⵙⵍⴰⵢⴻⵏ ⵙⴻⴳ ⵜⵎⴻⵜⵜⵉ ⵜⴰⵜⵔⴰⵡⵔⴰⵢⵜ.

ⴷⴻⴳ ⵓⵎⴻⵙⵍⴰⵢ-ⵉⵏⴻⵙ ⴷⴻⴳ ⵓⵎⵓⵍⵍⵉ-ⴰ, ⵉⵙⵙⴻⵡⵙⴻⵢ ⵎⴰⵙⵙ Tacherift ⵙ ⵡⴰⵣⴰⵍ ⵉ ⵉⴼⴽⴰ ⵓⵙⴻⵍⵡⴰⵢ ⵏ ⵜⴻⴳⴷⵓⴷⴰ, ⵎⴰⵙⵙ Abdelmadjid Tebboune, ⵉ ⵓⴽⴰⵔⴰⵎ ⵏ ⵓⵎⵣⵔⵓⵢ ⴷ ⵜⴽⴰⵜⵓⵜ ⵜⴰⵖⴻⵍⵏⴰⵡⵜ, ⵙ ⵓⴹⵎⴰⵏ ⵏ ⵡⴰⵣⴰⵍ-ⵉⵙ ⴷⴻⴳ ⵓⵙⵊⴻⵀⴻⴷ ⵏ ⵜⴷⵓⴽⵍⵉ ⵜⴰⵖⴻⵍⵏⴰⵡⵜ, ⵙ ⵓⵙⵙⴻⴽⵙ ⵏ ⵢⵉⵙⵓⵎⴰⵔⴻⵏ ⵉ ⴷ-ⵉⵙⵙⴻⴽⴽⴻⵔ ⴷⴻⴳ ⵓⴽⴰⵜⴰⵕ-ⴰ, ⵍⴰⴷⵖⴰ ⴰⵙⵙⴻⴱⴷⵓⴷ ⵏ ⵡⴰⵙⵙ ⴰⵖⴻⵍⵏⴰⵡ ⵏ ⵜⴽⴰⵜⵓⵜ, ⴷ ⵓⵙⵙⴻⴱⴷⵓⴷ ⵏ ⵜⴷⴰⵇⵉⵇⵜ ⵏ ⵜⵙⵓⵙⵎⵉ ⵉ ⵓⵙⵙⴻⴽⵜⴰⵢ ⵏ ⵢⵉⵎⴰⵏ ⵏ ⵢⵉⵎⵖⴰⵔⴻⵏ ⵏ ⵜⴻⵙⴽⵉⵍⵜ ⵏ 17 ⴽⵟⵓⴱⵓⵔ 1961 ⴷⴻⴳ Paris, ⵖⴻⵔ ⵢⵉⴷⵉⵙ ⵏ ⵓⵙⵙⵜⴻⵢ ⵏ ⵢⵉⵖⵙⴰⵏ ⵏ ⵢⵉⵎⵖⴰⵔⴻⵏ ⵏ ⵜⵏⴻⴼⵙⵉ ⴷ ⵓⵙⵙⴻⴱⴷⵓⴷ-ⵏⵙⴻⵏ ⴷⴻⴳ ⵜⴰⴽⴰⵍⵜ ⵏ ⴷⵣⴰⵢⴻⵔ, ⴷ ⵓⵙⵙⴻⴽⴽⴻⵔ ⵏ ⵜⵉⵍⵉⵥⵔⵉ ⵏ ⵜⴽⴰⵜⵓⵜ, ⵖⴻⵔ ⵢⵉⴷⵉⵙ ⵏ ⵢⵉⴱⴰⵖⵓⵔⴻⵏ ⵏⵏⵉⴹⴻⵏ ⵢⴻⵎⴳⴰⵔⴰⴷⴻⵏ.