ⴰⵏⴻⵖⵍⴰⴼ ⵏ ⵢⵉⵎⵓⵀⴰⵍ ⵉⵎⴰⵜⵓⵜⴻⵏ ⴷ ⵢⵉⵙⵓⴷⴰⵔ ⵏ ⵍⵇⴰⵄⴰ, ⵎⴰⵙⵙ ⵄⴻⴱⴷⴻⵍⵇⴰⴷⴻⵔ ⵊⴻⵍⵍⴰⵡⵉ, ⵢⴻⴼⴽⴰ-ⴷ ⴰⵙⵙ-ⴰ ⵏ ⴰⵔⵉⵎ ⵉⵎⵓⵔⴰ ⵉⵡⴰⴽⴽⴻⵏ ⴰⴷ ⵙⵙⴻⴳⵢⴻⵔⴻⵏ ⴰⴽⴽ ⵜⵉⵣⵎⴰⵔ ⵏ ⵢⵉⴼⴻⵛⴽⴰⵏ ⴷ ⵢⵉⵎⴷⴰⵏⴻⵏ ⵢⴻⵔⵏⴰ ⴰⴷ ⵢⵉⵍⵉ ⵓⵎⵢⴰⵡⴰⵙ ⴳⴰⵔ ⵡⵉⴷ ⴰⴽⴽ ⵢⴻⵜⵜⴻⴽⴽⵉⵏ, ⵉⵡⴰⴽⴽⴻⵏ ⴰⴷ ⵙⵙⴻⵖⵡⵉⵍⴻⵏ ⴰⵅⴻⴷⴷⵉⵎ ⵏ ⵓⵣⴻⵔⵉⴳ ⵏ ⵜⵎⴰⵏⵉⵜ ⵏ ⵓⵙⴰⵎⵎⴰⵔ (ⵄⴻⵏⵏⴰⴱⴰ - ⴱⴻⵍⴰⴷ ⵍⵃⴻⴷⴱⴰ) ⴰⴽⴽⴻⵏ ⴰⴷ ⵢⴻⴼⴼⵓⴽ ⴷⴻⴳ ⵍⵡⴻⵇⵜ ⵉ ⴷ-ⵢⴻⵜⵜⵡⴰⴼⴽⴰⵏ, ⴰⴽⴽⴻⵏ ⵉ ⴷ-ⵢⴻⵏⵏⴰ ⵡⴰⵍⵖⵓ ⵏ ⵜⵏⴻⵖⵍⴰⴼⵜ.
ⴰⵢⴰ ⵢⴻⵍⵍⴰ-ⴷ ⴷⴻⴳ ⵢⵉⵡⴻⵜ ⵏ ⵜⴻⵎⵍⵉⵍⵉⵜ ⵉ ⵢⴻⵙⵍⴻⵡⵉ ⵡⴰⵏⴻⵖⵍⴰⴼ ⵉⵡⴰⴽⴽⴻⵏ ⴰⴷ ⴹⴻⴼⴼⴻⵔⴻⵏ ⴰⵎⴻⴽ ⵢⴻⵜⵜⴻⴷⴷⵓ ⵓⵙⴻⵏⴼⴰⵔ-ⴰⴳⵉ, ⵍⴰⴷⵖⴰ ⴷⴻⴳ ⵢⵉⵎⴽⴰⵏ ⵏ ⵜⵏⵓⴽⵍⴰ (43 ⴽⵎ), ⴷⵔⵉⵄⴰ - ⵡⴰⴷ ⵍⴽⴻⴱⵔⵉⵜ (30 ⴽⵎ) ⴷ ⵓⵙⴰⴳⴻⵏ ⵏ ⵄⴻⵏⵏⴰⴱⴰ - ⴱⵓⵛⵇⵓⴼ (54 ⴽⵎ).
ⵜⵉⵎⵍⵉⵍⵉⵜ-ⴰⴳⵉ ⵜⵓⵙⴰ-ⴷ ⵉⵡⴰⴽⴽⴻⵏ ⴰⴷ ⵙⵏⴻⵙⴻⵏ ⵉⵎⵓⵔⴰ ⵏ ⵓⵙⴻⵍⵡⴰⵢ ⵏ ⵜⴻⴳⴷⵓⴷⴰ, ⵎⴰⵙⵙ ⵄⴻⴱⴷⴻⵍⵎⴰⵊⵉⴷ ⵜⴻⴱⴱⵓⵏ, ⵉ ⴷ-ⵢⴻⴼⴽⴰ ⴷⴻⴳ ⵡⴰⴳⴳⵓⵔ ⵏ ⵢⴻⵏⵏⴰⵢⴻⵔ ⵢⴻⵣⵔⵉⵏ, ⵢⴻⵔⵏⴰ ⴷⴻⴼⴼⵉⵔ ⵓⵔⵣⵓ ⵏ ⵡⴰⵏⴻⵖⵍⴰⴼ ⴰⵎⴻⵣⵡⴰⵔⵓ, ⵙⴰⵢⴼⵉ ⵖⴰⵔⵉⴱ, ⵖⴻⵔ ⵓⵙⴻⵏⴼⴰⵔ-ⴰⴳⵉ ⵉⴹⴻⵍⵍⵉ ⵏ ⵍⵃⴻⴷⴷ, ⴰⵏⴷⴰ ⵢⴻⵡⵡⴻⴽⴻⴷ ⵖⴻⴼ ⵓⴹⴻⴼⴼⴻⵔ ⵏ ⵢⵉⵎⵓⵔⴰ ⵏ ⵓⵙⴻⵍⵡⴰⵢ ⵉⵡⴰⴽⴽⴻⵏ ⴰⴷ ⵢⴻⴼⴼⵓⴽ ⵓⵅⴻⴷⴷⵉⵎ ⴷⴻⴳ ⵍⵡⴻⵇⵜ.
ⴷⴻⴳ ⵜⴻⵎⵍⵉⵍⵉⵜ-ⴰⴳⵉ, ⵙⴼⴻⵙⵙⵔⴻⵏ-ⴷ ⴰⵀⵉⵍ ⵏ ⵡⴰⵢⴻⵏ ⵉ ⴷ-ⵢⴻⴳⵔⴰⵏ ⵏ ⵓⵅⴻⴷⴷⵉⵎ. ⴰⵣⴻⵔⵉⴳ-ⴰⴳⵉ ⵏ ⵜⵎⴰⵏⵉⵜ ⵢⴻⵙⵄⴰ 422 ⴽⵎ, 174 ⴽⵎ ⴼⵓⴽⴽⴻⵏ, ⵢⴻⵔⵏⴰ 127 ⴽⵎ ⵏⵏⵉⴹⴻⵏ ⴰⴷ ⴼⵓⴽⴽⴻⵏ ⴷⴻⴳ ⵡⴰⴳⴳⵓⵔ ⵏ ⵡⴻⴱⵔⵉⵍ ⵉ ⴷ-ⵢⴻⵜⵜⴻⴷⴷⵓⵏ. ⴰⴽⴽⴰ, ⴰⴷ ⵢⴰⵡⴻⴹ ⵓⵟⵟⵓⵏ ⵏ ⵡⴰⵢⴻⵏ ⵢⴻⴼⴼⵓⴽⴻⵏ ⴰⵔ 301 ⴽⵎ ⴷⴻⴳ ⵡⴰⴳⴳⵓⵔ-ⵏⵏⵉ.
ⵎⴰ ⴷ ⴰⵢⴻⵏ ⵉ ⴷ-ⵢⴻⴳⵔⴰⵏ (121 ⴽⵎ) ⴳⴰⵔ ⴱⵓⵛⵇⵓⴼ - ⵙⵓⵇ ⴰⵀⵔⴰⵙ - ⴷⵔⵉⵄⴰ, ⵜⴰⵏⴻⵖⵍⴰⴼⵜ ⵜⴻⵏⵏⴰ-ⴷ ⴱⴻⵍⵍⵉ ⴰⴷ ⵢⴻⴼⴼⵓⴽ ⴷⴻⴳ ⵍⵡⴻⵇⵜ ⵉ ⴷ-ⵢⴻⵜⵜⵡⴰⴼⴽⴰⵏ. ⵡⴰⵏⴻⵖⵍⴰⴼ ⵢⴻⵙⵍⴻⵡⵉ ⴷⴰⵖⴻⵏ ⵜⵉⵎⵍⵉⵍⵉⵜ ⵜⵉⵙ ⵙⵏⴰⵜ ⴷ ⵢⵉⵇⴻⴷⴷⴰⵛⴻⵏ ⴷ ⵜⴽⴻⴱⴱⴰⵏⵉⵢⵉⵏ ⵏ ⵓⵅⴻⴷⴷⵉⵎ, ⵢⴻⵔⵏⴰ ⵢⴻⵡⵡⴻⴽⴻⴷ-ⴷ ⴱⴻⵍⵍⵉ ⵉⵍⴰⵇ ⴰⴷ ⵙⵙⴻⴳⵢⴻⵔⴻⵏ ⴰⴽⴽ ⵜⵉⵣⵎⴰⵔ ⵉⵎⵉ ⴰⵎⴽⴰⵏ-ⴰⴳⵉ (ⴱⵓⵛⵇⵓⴼ - ⵙⵓⵇ ⴰⵀⵔⴰⵙ - ⴷⵔⵉⵄⴰ) ⵢⴻⵡⵄⴻⵔ ⴰⵟⴰⵙ ⵙ ⵢⵉⴷⵓⵔⴰⵔ ⴷ ⵜⵍⴻⵇⵡⴰⵢⵉⵏ ⵏ ⵍⵇⴰⵄⴰ.
ⴰⵔⵏⵓ ⵖⴻⵔ
