ⴱⴷⵔⴻⵏ-ⴷ ⵢⵉⵎⴻⴽⵏⴰⵢⴻⵏ ⴷⴻⴳ ⵢⵉⵡⴻⵏ ⵏ ⵡⴰⵙⵙ ⵏ ⵓⵣⵔⴰⵡ ⵉ ⴷ-ⵢⴻⵍⵍⴰⵏ ⴰⵙⵙ ⵏ ⵜⵍⴰⵜⴰ ⴷⴻⴳ ⵍⴻⵣⵣⴰⵢⴻⵔ ⵜⴰⵎⴰⵏⴻⵖⵜ, ⴰⵣⴰⵍ ⵏ ⵓⵙⴻⵅⴷⴻⵎ ⵏ ⵢⵉⴼⴻⵢⵢⵉⴷⴻⵏ ⵏ ⵓⵏⴰⴷⵉ ⵜⵓⵙⵙⵏⴰⵏⵜ ⵉ ⴷ-ⵢⴻⵜⵜⴰⴼⵖⴻⵏ ⵙⴳ ⵜⴻⵙⴷⴰⵡⵉⵢⵉⵏ ⴷ ⵢⵉⵙⵉⵔⴰⵜⴻⵏ ⵉⵣⵣⴰⵢⵔⵉⵢⴻⵏ, ⴰⴽⴽⴻⵏ ⴰⴷ ⵉⵍⵉⵏ ⴷ ⵍⵙⴰⵙ ⵉ ⵓⵙⵏⴻⵔⵏⵉ ⵏ ⵓⵃⵔⵉⴽ ⵏ ⵢⵉⵄⴻⵇⵇⴰⵢⴻⵏ (grains) ⴷ ⵜⴳⴰⵢⵢⵉⵏ .
ⵙⵙⴻⴷⴷⵔⴻⵏ-ⴷ ⵡⵉⴷ ⵉ ⴷ-ⵢⴻⵎⵎⴻⵙⵍⴰⵢⴻⵏ ⴷⴻⴳ ⵡⴰⵙⵙ-ⴰⴳⵉ ⵏ ⵓⵣⵔⴰⵡ, ⵉ ⵢⴻⵙⵓⴷⴷⴻⵙ ⵓⵙⵉⵔⴰ ⴰⵣⵣⴰⵢⵔⵉ ⵏ ⵢⵉⵄⴻⵇⵇⴰⵢⴻⵏ (OAIC), ⴱⴻⵍⵍⵉ ⴰⴹⵎⴰⵏ ⵏ ⵡⵓⵜⵛⵉ ⵢⴻⵣⴷⵉ ⴷ ⵓⵙⵎⴰⵢⵏⵓⵜ ⵏ ⵜⴼⵍⴰⵃⵜ ⵙ ⵓⴹⴻⴼⴼⴻⵔ ⵏ ⵓⵏⴰⴷⵉ ⵜⵓⵙⵙⵏⴰⵏⵜ ⴷ ⵓⵙⴻⵅⴷⴻⵎ-ⵉⵙ ⴷⴻⴳ ⵓⵏⵏⴰⵔ.
ⴷⴻⴳ ⵡⵓⴷⴻⵎ-ⴰⴳⵉ, ⴰⵏⴻⵖⵍⴰⴼ ⵏ ⵜⴼⵍⴰⵃⵜ, ⵢⴰⵙⵉⵏ ⵍⵎⴻⵀⴷⵉ ⵡⴰⵍⵉⴷ, ⵢⴻⵏⵏⴰ-ⴷ ⴱⴻⵍⵍⵉ ⵢⴻⵙⵙⴻⴼⴽ ⴰⴷ ⵏⵇⴻⵔⵔⴻⴱ ⵜⴰⴼⵍⴰⵃⵜ ⵖⴻⵔ ⵓⵏⴰⴷⵉ ⵜⵓⵙⵙⵏⴰⵏⵜ, ⵢⴻⵔⵏⴰ ⵢⴻⵏⵏⴰ-ⴷ: "ⵓⵔ ⵏⴻⵣⵎⵉⵔ ⴰⴷ ⵏⴻⵙⵏⴻⵔⵏⵉ ⵉⵄⴻⵇⵇⴰⵢⴻⵏ ⴷ ⵜⴳⴰⵢⵢⵉⵏ ⵎⴰ ⵓⵔ ⵏⴻⵜⵜⴽⵉⵍ ⵖⴻⴼ ⵢⵉⴼⴻⵢⵢⵉⴷⴻⵏ ⵏ ⵜⵓⵙⵙⵏⴰ."
ⵢⴻⵔⵏⴰ-ⴷ ⴱⴻⵍⵍⵉ ⵜⵉⵣⵉⵔⵉⵡⵉⵏ ⵏ ⵓⵏⵏⴰⵔ ⵉ ⵢⴻⴳⴳⴰ ⴷ ⵓⵏⴻⵖⵍⴰⴼ ⵏ ⵓⵙⴻⵍⵎⴻⴷ ⴰⵄⵍⴰⵢⴰⵏ, ⴽⴰⵎⴰⵍ ⴱⴻⴷⴰⵔⵉ, ⵙⴽⴻⵏⵏⴻⵏ-ⴷ "ⴱⴻⵍⵍⵉ ⵍⵍⴰⵏ ⵡⴰⵟⵟⴰⵙ ⵏ ⵢⵉⵏⴰⴷⵉⵢⴻⵏ ⵢⴻⵍⵀⴰⵏ ⵉ ⵢⴻⵔⵔⴻⵣⵏ ⴷⴻⴳ ⵢⵉⴼⵉⵍⴰⵢⴻⵏ." ⵢⴻⴱⴷⴻⵔ-ⴷ ⴰⵙⵏⴻⵔⵏⵉ ⵏ ⵢⵉⵎⵓⴷⵏ (seeds) ⵉⵃⴻⵎⵎⵍⴻⵏ ⴰⴱⴻⴷⴷⴻⵍ ⵏ ⵓⵏⵣⵡⵉ, ⴰⵙⵡⵉ ⵏ ⵜⴼⵍⴰⵃⵜ, ⴰⵙⵎⴻⵢⵢⴻⵣ ⵏ ⵜⵎⵓⵔⵜ , ⴷ ⵓⵙⴻⵅⴷⴻⵎ ⵏ ⵍⴻⵖⴱⴰⵔ.
ⵙⴳ ⵢⵉⴷⵉⵙ-ⵉⵙ, ⴱⴻⴷⴰⵔⵉ ⵢⴻⵙⵙⴻⴷⴷⴻⵔ-ⴷ ⴰⵣⴰⵍ ⵏ ⵜⵛⴻⵔⴽⴻⵜ ⴳⴰⵔ ⵜⴼⵍⴰⵃⵜ ⴷ ⵓⵏⴰⴷⵉ ⵜⵓⵙⵙⵏⴰⵏⵜ, ⴰⵢⴰ ⴰⴷ ⵢⴻⵙⵏⴻⵔⵏⵉ ⵍⵖⴻⵍⵍⴰ ⵢⴻⵔⵏⴰ ⴰⴷ ⵢⴻⵙⵙⴻⵍⵀⵓ ⵜⵓⵎⴰⵏⵜ-ⵉⵙ . ⵢⴻⵏⵏⴰ-ⴷ ⴷⴰⵖⴻⵏ ⴱⴻⵍⵍⵉ ⴰⴱⴻⴷⴷⴻⵍ ⵏ ⵓⵏⵣⵡⵉ ⵢⴻⵜⵜⴰⵡⵉ-ⵢⴰⵖ-ⴷ ⴰⴷ ⵏⴻⵙⵙⴻⵅⴷⴻⵎ ⵜⴻⴽⵏⵓⵍⵓⵊⵉⵢⵜ ⵜⴰⵎⴰⵢⵏⵓⵜ ⴰⵎ ⵜⵓⵙⵙⵏⴰ ⵜⴰⵙⴳⵓⵏⴰⵏⵜ (AI).
ⴷⴻⴳ ⵜⴻⵎⵍⵉⵍⵉⵜ-ⴰⴳⵉ, ⵙⴽⴻⵏⵏⴻⵏ-ⴷ ⴽⵔⴰ ⵏ ⵢⵉⵎⴻⴷⵢⴰⵜⴻⵏ ⵏ ⵓⵅⴻⴷⴷⵉⵎ ⵉⴷⴷⵓⴽⴽⵍⴻⵏ ⴳⴰⵔ ⵙⵉⵏ ⵢⵉⵃⵔⵉⴽⴻⵏ-ⴰⴳⵉ:
ⵜⴰⵎⴰⵔⵣⵓⵜ ⵉⵍⵀⴰⵎ ⵇⴻⴷⴷⵉⵡⵔⴰ, ⵜⴻⵙⵙⴽⴻⵏ-ⴷ ⵢⵉⵡⴻⵏ ⵏ ⵓⵏⴻⴳⵔⴰⵡ (system) ⵏ ⵜⵎⴰⵛⵉⵏⵜ ⵏ ⵜⵎⴻⴳⵔⴰ ⵉ ⴷ-ⵢⴻⵜⵜⵡⴰⵅⵍⴻⵇⴻⵏ ⴷⴰⴳⵉ ⵉ ⵡⴰⴽⴽⴻⵏ ⴰⴷ ⵜⴻⵏⵇⴻⵙ ⵍⵅⴻⵙⴰⵔⴰ ⵏ ⵢⵉⵔⴷⴻⵏ ⵉ ⵢⴻⵜⵜⴰⵡⴹⴻⵏ ⴰⵔ 20 ⴱⴻⵍⵎⵢⴰ. ⴰⴷ ⵢⴻⵜⵜⵡⴰⵊⴻⵔⵔⴻⴱ ⵓⵏⴻⴳⵔⴰⵡ-ⴰⴳⵉ ⴷⴻⴳ ⵜⵎⴻⴳⵔⴰ ⵉ ⴷ-ⵢⴻⵜⵜⴻⴷⴷⵓⵏ.
ⵎⴰ ⴷ ⴰⵏⴻⵎⵀⴰⵍ ⵏ ⵓⵏⴰⴷⵉ ⵄⴻⴱⴷⴻⵍⵇⴰⴷⴻⵔ ⴱⴻⵏ ⴱⴻⵍⵇⴰⵙⴻⵎ, ⵢⴻⵎⵎⴻⵙⵍⴰⵢ-ⴷ ⵖⴻⴼ ⵜⵣⴻⵔⵄⴰ ⵏ "ⵜⵔⵉⵜⵉⴽⴰⵍ" ⴷⴻⴳ ⵍⴻⵣⵣⴰⵢⴻⵔ, ⵢⴻⵍⵍⴰⵏ ⴷ ⵢⵉⵡⴻⵏ ⵏ ⵡⴰⵏⴰⵡ ⴰⵎⴰⵢⵏⵓ ⵏ ⵢⵉⵄⴻⵇⵇⴰⵢⴻⵏ ⵉ ⴷ-ⵢⴻⴽⴽⴰⵏ ⵙⴳ ⵓⵙⴻⵎⵍⵉⵍ ⵏ ⵢⵉⵔⴷⴻⵏ ⴷ ⵓⵙⴻⵢⵢⴰⴼ. ⴰⵏⴰⵡ-ⴰⴳⵉ ⵢⴻⵜⵜⵇⴰⵡⴰⵎ ⴰⴱⴻⴷⴷⴻⵍ ⵏ ⵓⵏⵣⵡⵉ. ⴷⴻⴳ ⵡⴰⴷⵉ ⵙⵓⴼ, ⵢⴻⴼⴽⴰ-ⴷ 137 ⵏ ⵇⴻⵏⵟⴰⵔ ⴷⴻⴳ ⵢⵉⵡⴻⵏ ⵏ ⵀⵉⴽⵜⴰⵔ.
ⴷⴻⴳ ⵜⴰⴳⴰⵔⴰ, ⵉⵎⵓⵙⵏⴰⵡⴻⵏ ⵏ ⵓⵙⵉⵔⴰ ⴰⵏⴰⵎⵓⵔ ⵏ ⵓⵏⴰⴷⵉ ⵏ ⵜⴼⵍⴰⵃⵜ ⵙⴽⴻⵏⵏⴻⵏ-ⴷ ⵍⴻⵅⴷⴰⵢⴻⵎ-ⵏⵙⴻⵏ ⴷⴻⴳ ⵡⴻⵅⵜⵉⵔⵉ ⵏ ⵢⵉⵎⵓⴷⵏ ⵢⴻⵍⵀⴰⵏ ⵏ ⵢⵉⵔⴷⴻⵏ ⴰⵇⵓⵔⴰⵏ ⴷ ⵓⵔⵟⵉⴱ, ⴷ ⵓⵙⴻⵔⵔⴻⵙ ⵏ ⵜⴽⴰⵔⴹⴰ ⵉ ⴷ-ⵢⴻⵎⵎⴰⵍⴻⵏ ⴰⴽⴽ ⵉⵎⵓⴽⴰⵏ ⵢⴻⵍⵀⴰⵏ ⵉ ⵜⵣⴻⵔⵄⴰ ⵏ ⵢⴰⵍ ⴰⵏⴰⵡ.
ⴰⵔⵏⵓ ⵖⴻⵔ
