ⵍⴰⵖⵡⴰⵟ – ⵢⴻⵙⵙⴻⵍⵡⴰⵢ ⵓⵏⵖⵍⴰⴼ ⵏ ⵜⵎⵉⵙⴰⵍ ⵏ ⴷⴷⵉⵏ ⴷ ⵍⵃⴰⴱⵓⵙ, ⵎⴰⵙⵙ ⵢⵓⵙⴻⴼ ⴱⴻⵍⵎⴻⵀⴷⵉ, ⴰⵙⵙ-ⴰ ⵏ ⵍⵃⴻⴷ ⴷⴻⴳ ⵜⵖⵉⵡⴰⵏⵜ ⵏ ⵍⴰⵖⵡⴰⵟ, ⴰⵍⴷⴰⵢ ⵓⵏⵚⵉⴱ ⵏ ⵓⵎⵣⵉⴷⴰ ⴰⵎⴻⵇⵇⵔⴰⵏ ⵉ ⵢⴻⵡⵡⵉⵏ ⵉⵙⴻⵎ ⵏ "ⴰⵎⵣⵉⴷⴰ ⵏ ⵢⵉⵎⴳⴰⵔⵓⵜⴻⵏ".
ⵍⴻⵇⴷⵉⵛ-ⴰⴳⵉ ⵢⴻⵍⵍⴰ-ⴷ ⵙ ⵓⵃⴰⴷⴰⵔ ⵏ ⵓⵡⴰⵍⵉ ⵏ ⵜⵎⵏⴰⵟ, ⵎⴰⵙⵙ ⵎⵓⵃⴰⵎⴻⴷ ⴱⴻⵏ ⵎⴰⵍⴻⴽ, ⴷ ⵓⵎⵙⴻⵍⵡⴰⵢ ⴰⵎⴰⵜⵓ ⵏ ⵜⵜⴰⵔⵉⵇⴰ ⵜⵜⵉⵊⴰⵏⵉⵜ ⵛⵛⵉⵅ ⵄⵍⵉ ⴱⴻⵍⵄⵔⴰⴱⵉ, ⴷ ⵓⵎⵙⴻⵍⵡⴰⵢ ⵏ ⵡⴰⵙⵇⴰⵎⵓ ⵏ ⵍⵉⵙⵍⴰⵎ ⵓⵏⵏⵉⴳ, ⵎⴰⵙⵙ ⵎⴱⵔⵓⴽ ⵣⵉⴷ ⵍⵅⴻⵢⵔ, ⵖⴻⵔ ⵜⴰⵎⴰ ⵏ ⵡⴰⵟⴰⵙ ⵏ ⵢⵉⵎⴻⵣⴷⴰⵖ ⴷ ⵢⵉⵎⵓⵙⵏⴰⵡⴻⵏ ⵏ ⴷⴷⵉⵏ.
ⴷⴻⴳ ⵡⴰⵡⴰⵍ-ⵉⵙ, ⵎⴰⵙⵙ ⴱⴻⵍⵎⴻⵀⴷⵉ ⵢⴻⵏⵏⴰ-ⴷ ⴱⴻⵍⵍⵉ ⴰⵎⵣⵉⴷⴰ-ⴰⴳⵉ ⴷ ⵢⵉⵡⴻⵏ ⵓⵣⴰⵍ ⴰⵎⴻⵇⵇⵔⴰⵏ ⵉ ⵜⵎⴻⵏⵏⴰⴹⵜ-ⴰⴳⵉ ⵏ ⵍⴰⵖⵡⴰⵟ ⵉ ⵢⴻⵍⵍⴰⵏ ⴷ ⴰⵎⵎⴰⵙ ⵏ ⵜⵢⴻⵙⵙⴰ (ⵜⴰⴷⴻⵍⵙⴰ) ⴷ ⵜⵎⵓⵙⵏⵉ ⵢⴻⵔⵏⴰ ⴷ ⵜⴰⵎⴰⵏⴻⵖⵜ ⵏ ⵜⵜⴰⵔⵉⵇⴰ ⵜⵜⵉⵊⴰⵏⵉⵜ ⴷⴻⴳ ⵓⵎⴰⴹⴰⵍ. ⵢⴻⵙⵙⴻⴽⵜⴰ-ⴷ ⴱⴻⵍⵍⵉ ⵉⵙⴻⵎ ⵏ ⵓⵎⵣⵉⴷⴰ ⵢⵓⵙⴰ-ⴷ ⴷ ⵜⴰⵢⵏⵉⵜ ⵉ ⵢⵉⵎⴳⴰⵔⵓⵜⴻⵏ (ⵉⵛⵎⵉⵔⴻⵏ) ⵉ ⵢⴻⴼⴽⴰⵏ ⵜⵓⴷⴻⵔⵜ-ⵏⵙⴻⵏ ⵉ ⵡⴰⴽⴽⴻⵏ ⴰⴷ ⵜⵉⴷⵉⵔ ⵜⴰⵙⵓⵜⴰ ⵏ ⵜⵓⵔⴰ ⴷⴻⴳ ⵜⵍⴻⵍⵍⵉ ⴷ ⵜⴷⵔⴻⴼⵜ. ⵢⴻⵙⵙⴻⴽⵜⴰ-ⴷ ⴷⴰⵖⴻⵏ ⴰⵎⴻⵏⵏⵓⵖ ⵏ ⵍⴰⵖⵡⴰⵟ ⵎⴳⴰⵍ ⵡⴰⵃⴻⵜⵜⴻⵍ ⴷⴻⴳ ⵓⵙⴻⴳⴳⴰⵙ 1852.
ⵙⴻⴳ ⵍⵊⵉⵀⴰ ⵏⵏⵉⴹⴻⵏ, ⴰⵏⵖⵍⴰⴼ ⵢⴻⴼⴽⴰ ⴰⵣⴰⵍ ⵉ ⵜⵓⵣⵣⵢⴰ ⵏ ⵛⵛⵉⵅ ⵄⵍⵉ ⴱⴻⵍⵄⵔⴰⴱⵉ ⵖⴻⵔ ⵜⵎⵓⵔⵜ ⵏ ⵙⵙⵉⵏⵉⴳⴰⵍ, ⵢⴻⵏⵏⴰ-ⴷ ⴱⴻⵍⵍⵉ ⴰⵢⴰ ⵢⴻⵙⵊⴻⵀⵉⴷ ⴰⵎⵢⴻⵍⵍⴻⵍ ⵏ ⵜⵏⴻⴼⵙⵉⵜ ⴷ ⵜⵢⴻⵙⵙⴰ ⴳⴰⵔ ⵍⵣⵣⴰⵢⴻⵔ ⴷ ⵜⵎⵓⵔⴰ ⵏ ⴱⴻⵔⵔⴰ.
ⵓⵡⴰⵍⵉ ⵎⵓⵃⴰⵎⴻⴷ ⴱⴻⵏ ⵎⴰⵍⴻⴽ ⵢⴻⵏⵏⴰ-ⴷ ⴱⴻⵍⵍⵉ ⴰⵎⵣⵉⴷⴰ-ⴰⴳⵉ ⴷ ⵜⴰⴳⴻⵎⵎⵓⵜ ⵏ ⵍⴻⵇⴷⵉⵛ ⵉⵊⴻⵀⴷⴻⵏ ⵏ ⵢⵉⵅⴻⴷⴷⴰⵎⴻⵏ ⴷ ⵢⵉⵎⵓⵙⵏⴰⵡⴻⵏ ⵏ ⵓⴱⴻⵏⵏⵉ, ⵢⴻⵔⵏⴰ ⴹⴻⵎⵎⵏ-ⴷ ⴰⴷ ⵜ-ⵍⴷⵉⵏ ⵓⵇⴱⴻⵍ ⴰⴷ ⴷ-ⵢⴰⵡⴻⴹ ⵡⴰⴳⴳⵓⵔ ⵏ ⵔⴻⵎⴹⴰⵏ ⴰⵎⴻⴳⴳⴰⵣ.
ⴰⵎⵣⵉⴷⴰ-ⴰⴳⵉ ⵢⴻⵣⵎⴻⵔ ⴰⴷ ⵢⴻⵇⴱⴻⵍ 16 ⵏ ⵢⵉⴼⴻⵏ (16,000) ⵏ ⵢⵉⵎⴻⵥⵥⵓⵍⵍⴰ. ⵢⴻⵙⵄⴰ ⵙⵏⴰⵜ ⵏ ⵜⵣⴻⵇⵇⴰ ⵏ ⵜⵥⴰⵍⵍⵉⵜ, ⵜⴰⵙⴷⵍⵉⵙⵜ, ⵜⴰⵣⴻⵇⵇⴰ ⵏ ⵢⵉⵙⴰⵔⴰⴳⴻⵏ, ⴰⵎⴽⴰⵏ ⵏ ⵓⵣⴷⵓⵖ ⵉ ⵢⵉⵏⴻⴱⴳⴰⵡⴻⵏ ⴷ ⵢⵉⵎⴽⴰⵏⴻⵏ ⵏ ⵓⵙⵉⵣⴷⴻⴳ (ⵍⵡⴻⴹⵓ). ⵜⴰⵚⴰⵡⵎⴻⵄⵜ-ⵉⵙ (ⵎⵉⵏⴰⵔⴻⵜ) ⵜⴻⵙⵄⴰ 60 ⵏ ⵢⵉⵎⵉⵜⵔⴻⵏ ⴷⴻⴳ ⵜⴰⵜⵜⵓⵢⵜ.
ⴷⴻⴳ ⵜⵓⵣⵣⵢⴰ-ⴰⴳⵉ ⴷⴰⵖⴻⵏ, ⴰⵏⵖⵍⴰⴼ ⵢⴻⵍⴷⴰ ⵢⵉⵡⴻⵜ ⵏ ⵜⵏⵎⴻⵍ ⵏ ⵍⵇⵓⵔⴰⵏ ⵢⴻⵔⵣⴰⵏ ⴰⵎⵣⵉⴷⴰ ⵏ "ⵍⵉⵎⴰⵎ ⵍⵃⵓⵙⵉⵏ". ⵢⴻⴼⴽⴰ ⴷⴰⵖⴻⵏ ⴰⵙⵙⴻⵏⴼⴻⵍ ⵉ ⵓⴼⵔⴰⵇ ⵏ ⵜⵇⵓⴼⵜ ⵏ ⵔⴻⵎⴹⴰⵏ ⵢⴻⵔⵏⴰ ⵢⴻⵇⴷⴻⵛ ⴷⴻⴳ ⵢⵉⵡⴻⵏ ⵡⴰⵀⵉⵍ ⵏ ⵓⵥⵥⵓ ⵏ ⵢⵉⵙⴻⴳⵍⴰ (ⵜⵉⵣⴻⴳⵡⴰ) ⴷⴻⴳ ⵔⵔⵉⴼ ⵏ ⵓⵎⵣⵉⴷⴰ ⵉ ⵡⴰⴽⴽⴻⵏ ⴰⴷ ⵃⴰⴷⵔⴻⵏ ⵜⴰⵡⴻⵏⵏⴰⴹⵜ.
ⴰⵔⵏⵓ ⵖⴻⵔ
