ⵢⴻⵏⵏⴰ ⵓⵎⴻⵜⵜⴻⵍ ⵏ ⴷⵉⵎⴰ ⵏ ⵍⴻⵣⵣⴰⵢⴻⵔ ⴷⴻⴳ ⵢⴻⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ, ⴰⵏⵎⴰⵀⴰⵍ ⵄⴰⵎⵎⴰⵔ ⴱⴻⵏ ⴶⴰⵎⴻⵄ, ⴱⴻⵍⵍⵉ ⵍⴻⵣⵣⴰⵢⴻⵔ ⵎⵉ ⵜⴻⴼⵔⴰ ⵜⴰⵍⵍⵉⵜ-ⵉⵙ (ⵜⴰⵣⵎⴻⵔⵜ-ⵉⵙ) ⴷⴻⴳ ⵓⵙⴻⵇⵇⴰⵎⵓ ⵏ ⵍⴰⵎⴰⵏ, ⵜⴻⵅⴷⴻⵎ ⴰⵢⴻⵏ ⵉ ⴷ-ⵢⴻⴼⴼⵖⴻⵏ ⴼⴻⵍⵍ-ⴰⵙ ⵢⴻⵔⵏⵓ ⵜⴻⴳⴳⴰ ⵍⵡⴰⴶⴻⴱ-ⵉⵙ. ⵢⴻⵙⵙⴻⴷⴷⴻⵔ ⴷⴰⵖⴻⵏ ⵖⴻⴼ ⵜⴰⵎⴰⵙⵉⵜ ⵏ ⵓⵎⵖⵉⵡⴰⵏ ⴰⵎⴰⴹⵍⴰⵏ ⵣⴷⴰⵜ ⵏ ⵢⵉⵎⵓⴽⴰⵏ ⵏ ⵡⵓⴳⵓⵔⴻⵏ ⴰⴽⴽⴻⵏ ⴰⴷ ⵃⴻⴷⴷⵓⵏ ⴰⴱⴹⴰ ⵏ ⵢⵉⵎⴻⵏⵏⴰⵖⴻⵏ ⵙ ⵜⵉⴼⵔⴰⵜⵉⵏ ⵜⵉⵙⴻⵔⵜⵉⵢⵉⵏ ⵢⴻⴳⴷⴻⵏ ⵉ ⵢⴻⵇⴰⴷⵔⴻⵏ ⵜⵉⵎⵓⵏⴻⵏⵜ ⵏ ⵜⵎⵓⵔⴰ ⴷ ⵢⵉⵣⴻⵔⴼⴰⵏ ⵏ ⵢⵉⴳⴷⵓⴷⴻⵏ.
ⴷⴻⴳ ⵜⵖⵉⵎⵉⵜ ⵏ ⵓⵙⴻⵇⵇⴰⵎⵓ ⵏ ⵍⴰⵎⴰⵏ, ⵉⴹ ⵏ ⵡⴰⵢⵏⴰⵙ, ⵖⴻⴼ "ⵢⵉⴳⵓⵎⵎⴰⵏ ⵉ ⵢⴻⵜⵜⴰⴳⴳⴰⴷⴻⵏ ⵍⴰⵎⴰⵏ ⴷ ⵜⴰⵍⵡⵉⵜ ⵜⴰⵎⴰⴹⵍⴰⵏⵜ", ⵢⴻⵏⵏⴰ-ⴷ ⴱⴻⵏ ⴶⴰⵎⴻⵄ ⴱⴻⵍⵍⵉ "ⵍⴻⵣⵣⴰⵢⴻⵔ ⵜⴻⴼⴼⴻⵖ ⵙⴻⴳ ⵓⵙⴻⵇⵇⴰⵎⵓ ⵏ ⵍⴰⵎⴰⵏ ⵢⴻⵔⵏⵓ ⵜⴻⵅⴷⴻⵎ ⴰⵢⴻⵏ ⵉ ⵜⴻⵙⵙⴻⴼⴽ ⴰⴷ ⵜ-ⵜⴻⵅⴷⴻⵎ".
ⵢⴻⴼⴽⴰ-ⴷ ⴷⴰⵖⴻⵏ ⵜⴰⵢⴻⵎⵎⴰⵜ-ⵉⵙ ⵉ ⵡⴰⵡⴰⵍ ⵏ ⵓⵎⴻⵜⵜⴻⵍ ⵏ ⵚⵓⵎⴰⵍ, ⴰⴱⵓⴽⴰⵔ ⵟⴰⵀⴻⵔ ⵄⵓⵜⵎⴰⵏ, ⵉ ⵢⴻⵣⴻⵏⵏⴻⵣⵡⴻⵏ ⴰⵔⵓⵣⵣⴻⵖ ⵏ ⵓⴷⴷⴰⵢⵔⴰ ⵏ ⵚⴻⵢⵢⵓⵏ ⵙ ⵜⵎⴻⵏⵏⴰⴹⵜ ⵏ "ⵜⴰⵎⵓⵔⵜ ⵏ ⵚⵓⵎⴰⵍ" (Somaliland), ⴰⵢⴻⵏ ⵢⴻⵍⵍⴰⵏ ⴷ ⴰⵙⴻⴼⵙⴻⴷ ⵓⵏⵚⵉⴱ ⵏ ⵜⵛⴰⵔⵜ ⵏ ⵢⴻⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⴷ ⵢⵉⵍⵓⴳⴰⵏ ⵏ ⵜⴷⵓⴽⵍⵉ ⵜⴰⴼⵔⵉⵇⵉⵜ. ⵢⴻⵙⵙⴻⴷⴷⴻⵔ ⴱⴻⵏ ⴶⴰⵎⴻⵄ ⴱⴻⵍⵍⵉ "ⵜⴰⵎⵓⵔⵜ ⵏ ⵚⵓⵎⴰⵍ ⴷ ⴰⵢⵍⴰ ⵏ ⵚⵓⵎⴰⵍ ⵓⵔ ⵢⴻⵜⵜⵡⴰⴱⴹⴰⵏ".
ⵢⴻⵙⵙⴰⵡⴻⵍ ⵓⵎⴻⵜⵜⴻⵍ ⵏ ⵍⴻⵣⵣⴰⵢⴻⵔ ⵉ ⵢⵉⵎⴻⴷⴷⵓⴽⴽⴰⵍ-ⵉⵙ ⴷⴻⴳ ⵓⵙⴻⵇⵇⴰⵎⵓ ⵏ ⵍⴰⵎⴰⵏ, ⴰⴽⴽⴻⴷ ⵡⵉⴷ ⴰⵔⴰ ⵢⴻⵟⵟⴼⴻⵏ ⵜⴰⵎⴰⵙⵉⵜ ⵜⴰⵥⴰⵢⵜ ⴷⴻⴳ ⵢⵉⵎⴰⵍ, ⴰⴽⴽⴻⵏ ⴰⴷ ⵅⴻⴷⴷⵎⴻⵏ ⵙ ⵍⵊⴻⵀⴷ ⵢⴻⵔⵏⵓ ⴰⴷ ⵙⵙⴻⴽⵛⴻⵎⴻⵏ ⴰⴽⴽ ⵢⵉⵎⴰⵙⵍⴰⴹⴻⵏ ⵏ ⵢⴻⵖⵍⴰⵏⴻⵏ ⵢⴻⴷⴷⵓⴽⴽⵍⴻⵏ ⴷⴻⴳ ⵡⴰⵢⴻⵏ ⵉⵅⴻⴷⴷⴻⵎ ⵓⵙⴻⵇⵇⴰⵎⵓ.
ⵢⴻⵙⵙⴻⴼⵀⴻⵎ-ⴷ ⴱⴻⵍⵍⵉ ⵢⴻⴱⵖⴰ ⴰⴷ ⴷ-ⵢⵉⵏⵉ ⵢⵉⵎⴰⵙⵍⴰⴹⴻⵏ ⵏ ⴷⵉⵎⴰ ⴷ ⵡⵉⴷ ⵓⵔ ⵏⴻⵍⵍⵉ ⵏ ⴷⵉⵎⴰ, ⴰⴽⴽⴻⵏ ⴰⴷ ⵃⵔⴻⵣⴻⵏ ⵜⴰⵍⵡⵉⵜ ⴷ ⵍⴰⵎⴰⵏ ⵉⵎⴰⴹⵍⴰⵏⴻⵏ. ⵢⴻⴽⴼⴰ ⴰⵡⴰⵍ-ⵉⵙ ⵙ ⵓⵙⴻⴷⴷⴻⵔ ⵖⴻⴼ ⵢⵉⵎⴻⴷⴷⵓⴽⴽⴰⵍ-ⵉⵙ ⵏ ⵜⴳⵔⵓⵎⵎⴰ "A3+", ⵍⴰⴷⵖⴰ ⵡⵉⴷ ⵓⵔ ⵏⴻⵍⵍⵉ ⵙⴻⴳ ⵜⴼⵔⵉⵇⵜ ⵍⴰⵎⴻⵄⵏⴰ ⵃⵓⴷⴷⴻⵏ ⵙ ⵍⵊⴻⵀⴷ ⵖⴻⴼ ⵜⵎⵓⵔⴰ ⵜⵉⴼⵔⵉⵇⵉⵢⵉⵏ ⴷⴻⴳ ⵓⵙⴻⵇⵇⴰⵎⵓ-ⴰⴳⵉ.
ⴰⵔⵏⵓ ⵖⴻⵔ
