ⵢⴻⵎⵎⴻⵔⴱⴻⴱ ⵡⴰⵎⴰⵔⴰⵢ ⵏ ⴷⴷⵓⵍⴰ, ⴰⵏⴻⵖⵍⴰⴼ ⵏ ⵍⵎⴰⵃⵔⵓⵇⴰⵜ ⴷ ⵍⵎⴰⵏⴰⵊⵉⵎ, ⵎⴰⵙⵙ ⵎⵓⵃⴻⵎⵎⴻⴷ ⵄⴻⵔⵇⴰⴱ, ⴰⵙⵙ-ⴰ ⵏ ⵜⵜⵍⴰⵜⴰ ⴷⵉ ⵜⵏⴻⵖⵍⴰⴼⵜ, ⵙ ⵜⵎⴰⵙⴰⵢⵜ ⵏ ⵜⵏⴻⵖⵍⴰⴼⵜ ⵏ ⵜⵎⴻⵚⵍⵉⵡⵉⵏ ⵏ ⴱⴻⵕⵕⴰ ⵏ ⵜⴻⵇⴷⵓⴷⴰ ⵏ ⵍⵀⵉⵏⴷ, ⵎⴰⵙⵙⴰ ⵏⵉⵏⴰ ⵎⴰⵍⵀⵓⵜⵔⴰ. ⵜⴰⵎⴰⵙⴰⵢⵜ-ⴰⴳⵉ ⵜⴻⴳⴳⴰ ⵓⵔⵣⴰⴼ ⵓⵏⵚⵉⴱ ⵖⴻⵔ ⵍⴻⵣⵣⴰⵢⴻⵔ ⴷⴻⴳ ⵓⵙⴰⵜⴰⵍ ⵏ ⵜⴰⵙⵓⵜ ⵜⵉⵙ ⵙⴰ (7) ⵏ ⵜⵎⵉⵙⵉⵡⵍⵉⵏ ⵜⵉⵙⴻⵔⵜⴰⵏⵉⵏ ⴳⴰⵔ ⵍⴻⵣⵣⴰⵢⴻⵔ ⴷ ⵍⵀⵉⵏⴷ, ⴰⴽⴽⴻⵏ ⵉ ⴷ-ⵢⵓⵙⴰ ⴷⴻⴳ ⵓⵍⵖⵓ ⵏ ⵜⵏⴻⵖⵍⴰⴼⵜ.
ⵢⵓⵙⴰ-ⴷ ⴷⴻⴳ ⵓⵍⵖⵓ ⵡⴰⴽⴽⴻⵏ ⵙⵏⴰⵜ ⵏ ⵜⵎⴰⴽⵉⵏ ⵛⴽⵓⵏⵜ ⵙ "ⵡⴰⵙⵙⴰⵖⴻⵏ ⵉⵎⵣⵔⵓⵢⴰⵏⴻⵏ ⴷ ⵜⵎⵉⴷⵉ ⴷ ⵓⵎⵢⴰⵍⵍⴻⵍ ⴳⴰⵔ ⵍⴻⵣⵣⴰⵢⴻⵔ ⴷ ⵍⵀⵉⵏⴷ, ⴷ ⵜⵎⴻⵔⵏⵉⵡⵜ ⵢⴻⵍⵀⴰⵏ ⵏ ⵡⴰⵙⵙⴰⵖⴻⵏ-ⴰⴳⵉ, ⵍⴰⴷⵖⴰ ⵙⴻⴳ ⴷⴻⴼⴼⵉⵔ ⵓⵔⵣⴰⴼ ⵏ ⴷⴷⵓⵍⴰ ⵉ ⵜⴻⴳⴳⴰ ⵜⵙⴻⵍⵡⴰⵢⵜ ⵏ ⵍⵀⵉⵏⴷ, ⴷⵔⵓⴱⴰⴷⵉ ⵎⵓⵔⵎⵓ, ⵖⴻⵔ ⵍⴻⵣⵣⴰⵢⴻⵔ ⴷⴻⴳ ⵓⴽⵜⵓⴱⴻⵔ 2024, ⴷ ⵜⵎⵉⵙⵉⵡⵍⵉⵏ ⵉ ⵜⴻⴳⴳⴰ ⴰⴽⴽⴻⴷ ⵓⵙⴻⵍⵡⴰⵢ ⵏ ⵜⴻⵇⴷⵓⴷⴰ, ⵎⴰⵙⵙ ⵄⴻⴱⴷⴻⵍⵎⴰⵊⵉⴷ ⵜⴻⴱⴱⵓⵏ".
ⵜⵉⵎⵉⵙⵉⵡⵍⵉⵏ-ⴰⴳⵉ ⵣⵔⴻⵡⵏⵜ ⵉⴱⵔⵉⴷⴻⵏ ⵏ ⵓⵙⴻⵊⵀⴻⴷ ⵏ ⵓⵎⵢⴰⵍⵍⴻⵍ ⴳⴰⵔ ⵍⴻⵣⵣⴰⵢⴻⵔ ⴷ ⵍⵀⵉⵏⴷ ⴷⴻⴳ ⵢⵉⴳⵔⴰⵏ ⵏ ⵍⵎⴰⵃⵔⵓⵇⴰⵜ, ⵍⵎⴰⵏⴰⵊⵉⵎ ⴷ ⵓⵙⵙⴻⴼⵢ ⵏ ⵡⴰⵎⴰⵏ ⵏ ⵍⴱⴻⵃⵔ. ⵙⵙⴻⴷⴷⴻⴷⴻⵏ ⵖⴻⴼ ⵡⴰⵣⴰⵍ ⵏ ⵡⴰⵙⵙⴰⵖⴻⵏ-ⴰⴳⵉ ⴷ ⵢⵉⴱⵔⵉⴷⴻⵏ ⵏ ⵓⵙⴻⵏⴻⴼⵍⵉ-ⵏⵙⴻⵏ.
ⴷⴻⴳ ⵜⵉⵎⵍⵉⵍⵉⵜ-ⴰⴳⵉ, ⵡⴰⵎⴰⵔⴰⵢ ⵏ ⴷⴷⵓⵍⴰ ⵢⴻⵙⵙⴻⴽⵏ-ⴷ "ⵜⴻⴳⵏⵉⵜⵉⵏ ⵏ ⵡⴰⵙⵙⴻⵎⵔⴻⴹ ⴷⵉ ⵢⵉⴳⴻⵔ ⵏ ⵍⵎⴰⵃⵔⵓⵇⴰⵜ, ⵢⴻⵙⵙⵓⵜⴻⵔ ⵙⵖⵓⵔ ⵜⴽⴻⴱⴱⴰⵏⵉⵢⵉⵏ ⵜⵉⴽⴻⵔⵡⴰⵜⵉⵢⵉⵏ ⴰⴷ ⴷⵔⵓⵏⵜ ⴷⴻⴳ ⵓⵙⴻⵏⴻⴼⵍⵉ ⵏ ⵢⵉⵙⴻⵏⴼⴰⵔⴻⵏ ⵏ ⵍⴱⵉⵜⵔⵓⵍ ⴷ ⵍⴳⴰⵣ ⵙⴻⴳ ⵜⵉⵣⵡⵉⵔⵉ ⴰⵔⵎⵉ ⴷ ⵜⴰⴳⴳⴰⵔⴰ, ⵍⴰⴷⵖⴰ ⴷⵉ ⵢⵉⴳⵔⴰⵏ ⵏ ⵓⵏⴰⴷⵉ, ⴰⴼⴰⵔⴻⵙ, ⴷ ⵓⵙⴻⵍⵍⵉ ⵏ ⵢⵉⴼⴻⵔⴷⵉⵙⴻⵏ ⵏ ⵓⴷⴷⵓⵙ".
ⵜⴰⵎⴰ ⵜⴰⴽⴻⵔⵡⴰⵜⵉⵜ ⵜⴻⵙⵙⴻⴽⵏ-ⴷ ⵍⴻⴱⵖⵉ-ⵉⵙ ⵉ ⵓⵙⴻⵊⵀⴻⴷ ⵏ ⵓⵎⵢⴰⵍⵍⴻⵍ ⴰⴷⴰⵎⵙⴰⵏ ⴰⴽⴽⴻⴷ ⵙⵓⵏⴰⵜⵔⴰⵛ, ⵍⴰⴷⵖⴰ ⴷⵉ ⵓⵣⵏⵓⵣ ⵏ ⵍⴳⴰⵣ ⵏ ⵍⴱⵉⵜⵔⵓⵍ ⵢⴻⵙⵙⴻⴼⵙⴰⵢⴻⵏ (GPL) ⴷ ⵢⵉⴼⴰⵔⵉⵙⴻⵏ ⵏ ⵍⴱⵉⵜⵔⵓⵍ.
ⴷⴻⴳ ⵓⵙⴰⵜⴰⵍ-ⴰⴳⵉ ⴷⴰⵖⴻⵏ, ⵎⵎⴻⵙⵍⴰⵢⴻⵏ ⵖⴻⴼ "ⵢⵉⴱⵔⵉⴷⴻⵏ ⵏ ⵓⵎⵢⴰⵍⵍⴻⵍⴻⴷ ⴷⵉ ⵜⵎⴻⴳⵓⵕⵉⵢⵉⵏ ⵜⵉⴱⵉⵜⵔⵓⴽⵉⵎⵉⵢⵉⵏ, ⴰⴼⴰⵔⴻⵙ ⵏ ⵍⴼⵉⵔⵜⵉⵍⵉⵣⴰⵏ ⴷ ⵓⴱⴻⴷⴷⴻⵍ ⵏ ⵍⴼⵓⵙⴼⴰⵟ, ⴰⴽⴽⴻⴷ ⵜⴻⴳⵏⵉⵜⵉⵏ ⵏ ⵓⵎⵢⴰⵍⵍⴻⵍ ⴷⵉ ⵍⵎⴰⵏⴰⵊⵉⵎ, ⴰⵏⴰⴷⵉ ⴷ ⵓⵙⴻⴽⴼⴻⵍ ⵏ ⵢⵉⵙⵓⴳⴰⵎ ⵏ ⵍⵎⴰⵏⴰⵊⵉⵎ ⴷ ⵜⵣⵔⴰⵡⵉⵏ ⵜⵉⵊⵉⵢⵓⵍⵓⵊⵉⵢⵉⵏ ⴷ ⵓⵙⴻⴳⴳⴻⵎ ⵏ ⵜⴽⴰⵔⴹⵉⵡⵉⵏ ⴷ ⵓⵙⵉⵍⴻⵖ. ⵡⴰⵎⴰⵔⴰⵢ ⵏ ⴷⴷⵓⵍⴰ ⵢⴻⵏⵏⴰ-ⴷ ⵡⴰⴽⴽⴻⵏ ⵍⴻⵣⵣⴰⵢⴻⵔ ⵜⴻⴱⵖⴰ ⴰⴷⵔⴰⵡ ⵏ ⵜⴽⴻⴱⴱⴰⵏⵉⵢⵉⵏ ⵜⵉⴽⴻⵔⵡⴰⵜⵉⵢⵉⵏ ⴷⵉ ⵢⵉⵙⴻⵏⴼⴰⵔⴻⵏ ⵉⵎⴰⵢⵏⵓⵜⴻⵏ ⵏ ⵍⵎⴰⵏⴰⵊⵉⵎ".
ⴷⴻⴳ ⵜⴰⴳⴳⴰⵔⴰ ⵏ ⵓⵍⵖⵓ, ⵜⴰⵎⴰ ⵜⴰⴽⴻⵔⵡⴰⵜⵉⵜ ⵜⴻⵙⵙⴻⴷⴷⴻⴷ "ⵍⴻⴱⵖⵉ ⵏ ⵜⵎⵓⵔⵜ-ⵉⵙ ⵉ ⵓⵙⴻⵎⵖⴻⵔ ⵏ ⵢⵉⴳⵔⴰⵏ ⵏ ⵓⵎⵢⴰⵍⵍⴻⵍ ⴰⴽⴽⴻⴷ ⵍⴻⵣⵣⴰⵢⴻⵔ, ⵍⴰⴷⵖⴰ ⴷⵉ ⵍⵎⴰⵃⵔⵓⵇⴰⵜ ⴷ ⵍⵎⴰⵏⴰⵊⵉⵎ ⴷ ⵓⵎⵢⴰⵡⴰⴹ ⵏ ⵜⵉⵔⵎⴰⵏⵉⵏ ⴷ ⵓⵙⵉⵡⴻⴹ ⵏ ⵜⵉⴽⵏⵓⵍⵓⵊⵉⵜ".
ⴰⵔⵏⵓ ⵖⴻⵔ
