ⴰⴷ ⵜⵎⴰⴳⴰⵔ ⵜⴰⵔⴱⴰⵄⵜ ⴰⵖⴻⵍⵏⴰⵡ ⴰⴷⵣⴰⵢⵔⵉ ⵏ ⴷⴷⴰⴱⴻⵅ ⵏ ⵓⴹⴰⵔ ⵜⵉⵏ ⵏ ⴳⵉⵏⵢⴰ ⵜⴰⵙⴻⴱⴳⴰⵙⴰⵏⵜ, ⴰⵣⴻⴽⴽⴰ ⵏ ⵍⴰⵔⴻⴱⵄⴰ (ⵖⴻⴼ ⵜⵉⵙ 17:00), ⵉ ⵓⴹⴼⴰⵔ ⵏ ⵜⵓⴽⴽⴰⵍⵜ ⵜⵉⵙ ⴽⵔⴰⴹⵜ ⴷ ⵜⴰⵏⴻⴳⴳⴰⵔⵓⵜ ⵏ ⵜⴳⵔⵓⵎⵎⴰ ⵜⵉⵙ ⵅⴻⵎⵙⴰ (E) ⵏ ⵜⴰⴽⵓⵙⵜ ⵏ ⵜⴼⵔⵉⵇⵜ ⵏ ⵢⴻⵖⵍⴰⵏⴻⵏ 2025. ⵉⴷⵣⴰⵢⵔⵉⵢⴻⵏ ⴱⵖⴰⵏ ⴰⴷ ⴷ-ⵡⵉⵏ ⵔⵔⴱⴻⵃ ⵡⵉⵙ ⴽⵔⴰⴹ ⴷ ⴰⵎⴻⵣⵣⵉⵡⴻⵔ, ⴷⴻⴼⴼⵉⵔ ⵎⵉ ⴷ-ⵡⵉⵏ ⴰⵎⴽⴰⵏ-ⵏⵙⴻⵏ ⴷⴻⴳ ⵓⴷⵓⵔ ⵡⵉⵙ 16 ⵙ ⵜⵓⵔⴰⵔⵜ ⵉⵊⴻⵀⴷⴻⵏ.
ⵙⴻⴳ ⵡⴰⵙⵎⵉ ⵉ ⵜⴻⴱⴷⴰ ⵜⴱⵓⵖⵓⵔⵜ-ⴰ ⵜⴰⴼⵔⵉⵇⵉⵜ, "ⵉⵎⴻⵣⴳⵉⵡⴻⵏ" ⵓⵔⴰⵔⴻⵏ ⵎⵍⵉⵃ, ⴱⴷⴰⵏ ⵙ ⵜⵉⵢⴰⴼⴰⵜ ⵜⴰⵎⴻⵇⵇⵔⴰⵏⵜ ⵣⴷⴰⵜ ⵏ ⵙⵓⴷⴰⵏ (3-0), ⵓⵇⴱⴻⵍ ⴰⴷ ⵔⴻⴱⵃⴻⵏ ⴱⵓⵔⴽⵉⵏⴰ ⴼⴰⵙⵓ (1-0). ⵙ ⵙⵏⴰⵜ-ⴰⴳⵉ ⵏ ⵜⵉⵢⴰⴼⴰⵜⵉⵏ, ⵜⴰⵔⴱⴰⵄⵜ ⴰⵖⴻⵍⵏⴰⵡ ⵜⴹⴻⵎⵎⴻⵏ ⴰⵎⴽⴰⵏ-ⵉⵙ ⵢⴰⴽⴰ ⴷⴻⴳ ⵓⴷⵓⵔ ⵡⵉⵙ 16, ⵢⴻⵔⵏⵓ ⵜⴻⵟⵟⴻⴼ ⴰⵎⴽⴰⵏ ⴰⵎⴻⵣⵡⴰⵔⵓ ⵏ ⵜⴳⵔⵓⵎⵎⴰ.
ⵔⵔⵉⴼ ⵏ ⵡⴰⵢⴻⵏ ⵉ ⴷ-ⵜⵜⵔⴰⵊⵓⵏ ⵙ ⵓⴱⵔⵉⴷ ⵓⵏⵚⵉⴱ, ⵉⵎⴻⴷⴷⵓⴽⴽⴰⵍ ⵏ ⵓⵏⴻⴼⵍⵓⵙ ⵔⵉⵢⴰⴹ ⵎⴰⵃⵔⴻⵣ ⴱⵖⴰⵏ ⴰⴷ ⵄⵉⵡⴷⴻⵏ ⴰⵢⴻⵏ ⵉ ⴷ-ⵢⵓⵖⴰⵍⴻⵏ ⵙ ⵍⵅⵉⵔ ⴷⴻⴳ ⵙⵉⵏ ⵏ ⵢⵉⵙⴻⴳⴳⴰⵙⴻⵏ: 1990 ⴷⴻⴳ ⵍⴻⵣⵣⴰⵢⴻⵔ ⴷ 2019 ⴷⴻⴳ ⵎⵉⵚⵔⴰ, ⴰⵏⴷⴰ ⵉ ⴼⵓⴽⴽⴻⵏ ⴰⴷⵓⵔ ⴰⵎⴻⵣⵡⴰⵔⵓ ⵙ ⵜⴻⴽⵜⵉⵜ ⵜⴰⵎⴰⵜⵓⵜ , ⵓⵇⴱⴻⵍ ⴰⴷ ⴷ-ⴰⵡⵉⵏ ⴰⵣⵡⴻⵍ ⵏ ⵜⴼⵔⵉⵇⵜ.
ⴷ ⴰⵎⵛⵓⴱⴱⴰ ⵉ ⴷ-ⵔⵔⴰⵏ ⴷⴻⴳ ⵓⵇⴻⵔⵔⵓ-ⵏⵙⴻⵏ ⵢⵉⵙⴻⵍⵡⴰⵢⴻⵏ ⵏ ⵜⴼⴻⵔⵔⴻⵖⵜ ⴷ ⵢⵓⵔⴰⵔⴰⵢⴻⵏ, ⴰⵛⴽⵓ ⵥⵔⴰⵏ ⴱⴻⵍⵍⵉ ⵔⵔⴱⴻⵃ ⴷⴻⴳ ⵓⴷⵓⵔ ⴰⵎⴻⵣⵡⴰⵔⵓ ⵢⴻⵣⵎⴻⵔ ⴰⴷ ⴷ-ⵢⴻⵔⵔ ⵏⵏⴼⵄ ⴷⴻⴳ ⵡⴰⵢⴻⵏ ⵉ ⴷ-ⵢⴻⴳⴳⵔⴻⵏ. ⵖⴰⵙ ⴰⴽⴽⴻⵏ ⴰⵎⴹⴰⵏ ⵏ ⵜⵏⴻⵎⵍⵉ ⵓⵔ ⵢⴻⵊⵀⵉⴷ ⴰⵔⴰ, ⵍⴰⵎⴻⵄⵏⴰ ⵜⴰⵔⴱⴰⵄⵜ ⴰⵖⴻⵍⵏⴰⵡ ⴰⴷ ⵜⵓⵔⴰⵔ ⵙ ⵡⴰⴽⴽ ⵍⵊⴻⵀⴷ-ⵉⵙ.
ⵢⴻⵏⵏⴰ-ⴷ ⵓⵙⵍⴻⵖⵎⴰⵢ ⴰⵖⴻⵍⵏⴰⵡ ⴼⵍⴰⴷⵉⵎⵉⵔ ⴱⴻⵜⴽⵓⴼⵉⵜⵛ, ⴷⴻⴳ ⵜⴷⵉⵡⴻⵏⵏⵉⵜ ⴷⴻⴼⴼⵉⵔ ⵜⵓⵔⴰⵔⵜ ⵏ ⴱⵓⵔⴽⵉⵏⴰ ⴼⴰⵙⵓ: "ⴰⴷ ⵏⴻⵣⵣⵉⵀ ⵎⵍⵉⵃ ⵖⴻⴼ ⵜⵓⵔⴰⵔⵜ-ⵏⵏⴻⵖ ⵏ ⴳⵉⵏⵢⴰ ⵜⴰⵙⴻⴱⴳⴰⵙⴰⵏⵜ, ⵙ ⵢⵉⵙⵡⵉ ⵏ ⵔⵔⴱⴻⵃ. ⴰⴷ ⵙⴱⴻⴷⴷⵍⴻɣ ⴽⵔⴰ ⴷⴻⴳ ⵜⵎⴻⵜⵜⵉⵜ ⴰⴽⴽⴻⵏ ⴰⴷ ⵙⴳⵓⵏⴼⵓɣ ⴽⵔⴰ ⵏ ⵢⵓⵔⴰⵔⴰⵢⴻⵏ."
ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⵢⵓⵔⴰⵔⴰⵢⴻⵏ, ⵜⴰⵔⴱⴰⵄⵜ ⴰⴷⵣⴰⵢⵔⵉ ⴰⴷ ⵜⵉⵅⵓⵙ ⵙⴻⴳ ⵙⵉⵏ ⵏ ⵢⵉⵎⵃⴰⴷⴷⵉⵜⵔⴻⵏ: ⵙⴰⵎⵉⵔ ⵛⴻⵔⵇⵉ ⴷ ⵊⵓⴰⵏ ⵃⴰⵊⵊⴰⵎ, ⵉ ⵢⴻⵜⵜⵡⴰⵊⴻⵔⵃⴻⵏ ⵣⴷⴰⵜ ⵏ ⴱⵓⵔⴽⵉⵏⴰ ⴼⴰⵙⵓ. ⵃⴰⵊⵊⴰⵎ ⴰⴷ ⵉⵙⴳⵓⵏⴼⵓ ⴳⴰⵔ ⴷⴷⵓⵔⵜ ⴷ ⵎⵔⴰⵡ (10) ⵏ ⵡⵓⵙⵙⴰⵏ. ⵎⴰ ⴷ ⵛⴻⵔⵇⵉ, ⵜⵓⵔⴰⵔⵜ-ⵉⵙ ⴷⴻⴳ ⵡⴰⵢⴻⵏ ⵉ ⴷ-ⵢⴻⴳⴳⵔⴻⵏ ⵏ ⵜⴱⵓⵖⵓⵔⵜ ⵜⴻⵡⵄⴻⵔ ⴰⵟⴰⵙ ⴰⵛⴽⵓ ⵢⴻⵔⵖⴰ ⴷⴻⴳ ⵓⵖⴻⵔⴷⵉⵎ
ⴱⴻⵜⴽⵓⴼⵉⵜⵛ ⴰⴷ ⵉⴱⴻⴷⴷⴻⵍ ⴽⵔⴰ ⵏ ⵢⵉⵎⵓⴽⴰⵏ ⴰⴽⴽⴻⵏ ⴰⴷ ⵉⵃⵔⴻⵣ ⵢⵓⵔⴰⵔⴰⵢⴻⵏ ⵉ ⵓⴷⵓⵔ ⵡⵉⵙ 16 ⵉ ⴷ-ⵢⴻⵜⵜⵔⴰⵊⵓⵏ ⴰⵙⵙ ⵏ ⵓⵙⵉⵏⴰⵙ 6 ⵢⴻⵏⵏⴰⵢⴻⵔ, ⵣⴷⴰⵜ ⵏ ⵡⵉⵏ ⴰⵔⴰ ⴷ-ⵢⴻⴼⴼⵖⴻⵏ ⵡⵉⵙ ⵙⵉⵏ ⴷⴻⴳ ⵜⴳⵔⵓⵎⵎⴰ ⵜⵉⵙ ⴽⵓⵥ (D) (ⵙⴻⵏⴻⴳⴰⵍ, RDC, ⴱⴻⵏⵉⵏ ⴷ ⴱⵓⵜⵙⵡⴰⵏⴰ). ⵢⴻⵣⵎⴻⵔ ⴰⴷ ⵓⵔⴰⵔⴻⵏ ⵇⴻⴱⴱⴰⵍ, ⴱⴻⵍⵄⵉⴷ, ⴱⵓⵍⴱⵉⵏⴰ ⴷ ⵣⴻⵔⵔⵓⵇⵉ ⴷ ⵢⵉⵎⴻⵣⵡⵓⵔⴰ.
ⵙⴻⴳ ⵜⴰⵎⴰ-ⵏⵏⵉⴹⴻⵏ, ⵜⴰⵔⴱⴰⵄⵜ ⵏ ⴳⵉⵏⵢⴰ ⵜⴰⵙⴻⴱⴳⴰⵙⴰⵏⵜ, ⵉ ⴷ-ⵢⴻⴼⴼⵖⴻⵏ ⵢⴰⴽⴰ ⵙⴻⴳ ⵜⴱⵓⵖⵓⵔⵜ ⴷⴻⴼⴼⵉⵔ ⵙⵏⴰⵜ ⵏ ⵜⵓⵔⴰⴼⵉⵏ, ⴰⴷ ⵜⵓⵔⴰⵔ ⴰⴽⴽⴻⵏ ⴰⴷ ⵜⵃⵔⴻⵣ ⵍⵀⵉⵔ-ⵉⵙ. ⵖⴰⵙ ⴰⴽⴽⴻⵏ, ⴳⵉⵏⵢⴰ ⵜⴻⵙⵙⴻⴼⴽ ⴰⴷ ⵏⵃⴰⴷⴻⵔ ⴼⴻⵍⵍ-ⴰⵙ, ⴰⵛⴽⵓ ⵜⴻⵙⵙⴻⵖⵍⵉ ⵍⴻⵣⵣⴰⵢⴻⵔ ⴷⴻⴳ CAN 2022 ⴷⴻⴳ ⴽⴰⵎⵉⵔⵓⵏ, ⴰⵏⴷⴰ ⵜⵇⴻⴹⵄⴻⵏ ⵙⵉⵍⵙⵉⵍⴰ ⵏ 35 ⵏ ⵜⵓⵔⴰⵔⵉⵏ ⴱⵍⴰ ⵜⵓⵔⴰⴼⵜ.
ⴰⵔⵏⵓ ⵖⴻⵔ
