ⵜⴻⵙⵙⴻⵀⴻⴳⴳⴰ-ⴷ ⵜⴻⵏⵎⴻⵀⵍⴰ ⵜⴰⵎⴰⵜⵓⵜ ⵏ ⵜⴳⴻⵎⵎⴰⵔⵉ ⴷ ⵜⴻⵔⴱⵉⵜ ⵏ ⵡⴰⵎⴰⵏ, ⴷⴻⴳ ⵜⵎⴰⵡⴰⵙⵜ ⵏ ⵜⴼⴻⵍⵍⴰⵃⵜ, ⵢⵉⵡⴻⵏ ⵏ ⵓⵎⴰⵀⵉⵍ ⵏ ⵓⵅⴻⴷⴷⵉⵎ ⵉ ⵓⵙⴻⴳⴳⴰⵙ-ⴰⴳⵉ, ⵉ ⴷ-ⵢⴻⵡⵡⵉⵏ ⴰⵙⵏⵓⵍⴼⵓ ⵏ ⵓⵙⴻⵏⴷⵓⵇ ⴰⵖⴻⵍⵏⴰⵡ ⵉ ⵓⵅⴻⵍⵍⴻⵚ ⵏ ⵢⵉⴳⴻⵎⵎⴰⵔⴻⵏ (ⵉⵚⴻⴳⴳⴰⴷⴻⵏ) ⴷⴻⴳ ⵜⴰⵍⵍⵉⵜ ⵏ ⵓⵃⴻⴱⴱⴻⵙ ⵏ ⵓⵅⴻⴷⴷⵉⵎ, ⴰⵎⴰ ⵖⴻⴼ ⵍⴶⴰⵍ ⵏ ⵜⵍⵓⴼⴰ ⵏ ⵍⵃⴰⵍ ⵏⴻⵖ ⴷⴻⴳ ⵜⴰⵍⵍⵉⵜ ⵏ ⵔⵔⴰⵃⴰ ⵜⴰⴱⵢⵓⵍⵓⵊⵉⵜ, ⴰⴽⴽⴻⵏ ⵉ ⴷ-ⵢⴻⵏⵏⴰ ⵓⵎⴹⴻⴱⴱⴻⵔ ⴰⵎⴻⵣⵡⴰⵔⵓ ⵏ ⵜⴻⵏⵎⴻⵀⵍⴰ ⵎⵉⵍⵓⴷ ⵜⵔⵉⵄⴰ.
ⵢⴻⵙⴼⴻⵙⵔ-ⴷ ⵜⵔⵉⵄⴰ ⴱⴻⵍⵍⵉ ⴰⵅⴻⴷⴷⵉⵎ ⴰⵜⴰⵏ ⵢⴻⵜⵜⴻⴽⴽⴰ ⴷⴻⴳ ⵜⴰⵍⵍⵉⵜ-ⴰ ⵙ ⵓⵎⵢⴰⵡⴰⵙ ⴷ ⵡⵉⴷ ⵢⴻⵄⵏⴰ ⵍⴰⵎⴻⵔ ⵉⵡⴰⴽⴽⴻⵏ ⴰⴷ ⵙⴻⵔⵙⵓⵏ ⵍⵇⴰⵏⵓⵏ ⴷ ⵓⵙⵓⴷⴷⴻⵙ ⵏ ⵓⵙⴻⵏⴷⵓⵇ-ⴰⴳⵉ. ⴰⵙⴻⵏⴷⵓⵇ-ⴰ ⴰⴷ ⵢⴻⵜⵜⵡⴰⵅⴻⵍⵍⴻⵚ ⵙ ⵜⵜⴻⴽⵍⴰ ⵏ ⵢⵉⴳⴻⵎⵎⴰⵔⴻⵏ ⴷⴻⴳ ⵜⴰⵍⵍⵉⵜ ⵏ ⵡⵓⴼⵓⵔ ⵏ ⵢⵉⵙⴻⵍⵎⴰⵏ, ⵙ ⵜⵜⴻⴽⵍⴰ ⵏ ⴷⴷⵓⵍⴰ, ⴷ ⴽⵔⴰ ⵏ ⵜⵖⴰⵡⵙⵉⵡⵉⵏ ⵏⵏⵉⴹⴻⵏ ⵉ ⵎⴰⵣⴰⵍ ⵜⵜⵣⴻⵔⵡⵉⵔⴻⵏ-ⵜⴻⵏ (ⴰⵎ ⵍⴻⵅⵍⴰⵚ ⵏ ⵓⵙⴻⴽⵛⵓⵎ ⵏ ⴽⵔⴰ ⵏ ⵙⵙⵍⵄⴰ).
ⵢⴻⵏⵏⴰ-ⴷ ⵓⵎⴹⴻⴱⴱⴻⵔ-ⴰⴳⵉ ⴱⴻⵍⵍⵉ ⴰⵙⴻⵏⴷⵓⵇ-ⴰⴳⵉ ⵢⵓⵙⴰ-ⴷ "ⵉⵡⴰⴽⴽⴻⵏ ⴰⴷ ⵢⴻⵔⵔⴻⴷ ⵖⴻⴼ ⵡⴰⵢⴻⵏ ⵉ ⵉⵖⴻⴱⴱⴻⵏ ⵉⵅⴻⴷⴷⴰⵎⴻⵏ ⵏ ⵜⴳⴻⵎⵎⴰⵔⵉ, ⵉⵎⵉ ⴰⵟⴰⵙ ⴷⴻⴳ-ⵙⴻⵏ ⵓⵔ ⴷ-ⵜⵜⴰⵡⵉⵏ ⴰⵔⴰ ⵉⴷⵔⵉⵎⴻⵏ ⴷⴻⴳ ⵜⴰⵍⵍⵉⵜ-ⴰⴳⵉ". ⵢⴻⵔⵏⴰ ⴰⵙⴻⵏⴼⴰⵔ-ⴰ ⵢⴻⵍⵍⴰ ⴷⴻⴳ ⵓⵎⴰⵀⵉⵍ ⵏ ⵓⵙⴻⴳⴳⴰⵙ 2026.
ⵢⴻⵔⵏⴰ-ⴷ ⵜⵔⵉⵄⴰ ⴱⴻⵍⵍⵉ ⵉⵙⵡⵉ ⵏ ⵓⵙⴻⵏⴷⵓⵇ-ⴰⴳⵉ ⴷ ⴷⴷⴰⵎⴰⵏⴰ ⵏ ⵢⵉⵡⴻⵏ ⵓⵍⵙⵉⵔ ⵏ ⵢⵉⴷⵔⵉⵎⴻⵏ (حد أدنى من الدخل) ⵉ ⵢⵉⴳⴻⵎⵎⴰⵔⴻⵏ ⴷⴻⴳ ⵜⴰⵍⵍⵉⵜ ⵏ ⵔⵔⴰⵃⴰ ⵜⴰⴱⵢⵓⵍⵓⵊⵉⵜ ⵉ ⵢⴻⵜⵜⵉⵍⵉⵏ ⵢⴰⵍ ⴰⵙⴻⴳⴳⴰⵙ, ⵏⴻⵖ ⵎⴰ ⵢⴻⵍⵍⴰ ⵍⵃⴰⵍ ⴷ ⴰⵎⵛⵓⵎ, ⴰⴽⴽⴻⵏ ⵢⴻⵍⵍⴰ ⵍⵃⴰⵍ ⴷⴻⴳ ⵡⴰⵟⴰⵙ ⵏ ⵜⵎⵓⵔⴰ ⵏⵏⵉⴹⴻⵏ.
ⴷⴻⴳ ⵓⴼⵔⴰⴳ-ⴰ, ⴰⵏⴻⵎⵀⴰⵍ ⴰⵎⴰⵜⵓ ⵢⴻⵛⴽⴻⵔ ⵜⵜⴰⵅⵅⴰⵎⵜ ⵜⴰⵖⴻⵍⵏⴰⵡⵜ ⵏ ⵜⴳⴻⵎⵎⴰⵔⵉ ⴷ ⵜⴻⵔⴱⵉⵜ ⵏ ⵡⴰⵎⴰⵏ, ⵉ ⵢⴻⵜⵜⴻⴽⴽⴰⵏ ⴷ ⵜⵜⴰⵅⵅⴰⵎⵉⵏ ⵏ ⵜⵡⵉⵍⴰⵢⵉⵏ ⵏⵏⵉⴹⴻⵏ, ⵉⵡⴰⴽⴽⴻⵏ ⴰⴷ ⵙⵉⵡⴹⴻⵏ ⵉⵖⴻⴱⵍⴰⵏ ⵏ ⵢⵉⵅⴻⴷⴷⴰⵎⴻⵏ ⵏ ⵍⴻⴱⵃⴻⵔ ⴷⴻⴳ ⵢⴰⵍ ⴰⵎⴽⴰⵏ ⵏ ⵜⵎⵓⵔⵜ.
ⴰⵔⵏⵓ ⵖⴻⵔ
