ⴰⵏⵖⵍⴰⴼ ⵏ ⵢⵉⵎⵓⵊⴰⵀⵉⴷⴻⵏ ⴷ ⵡⵉⴷ ⵉⵍⴰⵏ ⵢⵉⵣⴻⵔⴼⴰⵏ, ⵎⴰⵙⵙ ⵄⴰⴱⴷⴻⵍⵎⴰⵍⴻⴽ ⵜⴰⵛⵀⵔⵉⴼⵜ, ⵢⴻⵏⵏⴰ-ⴷ ⴰⵙⵙ-ⴰ ⵏ ⵜⵍⴰⵜⵉⵏ ⴷⵉ ⴷⵣⴰⵢⵔ ⵜⴰⵎⴰⵏⴻⵖⵜ, ⴱⴻⵍⵍⵉ ⵜⴰⵎⴻⵏⵖⵉⵡⵜ ⵏ ⵙⴰⵇⵢⴻⵜ ⵙⵉⴷⵉ ⵢⵓⵙⴻⴼ (08 ⴼⵓⵔⴰⵔ 1958) ⴷ "ⵜⴰⵍⵍⵉⵜ ⵜⴰⵦⴰⵜⴰⵔⵜ" ⴷⴻⴳ ⵡⴻⴱⵔⵉⴷ ⵏ ⵓⵎⴻⵏⵏⵓⵖ ⵏ ⵙⵉⵏ ⵏ ⵡⴻⴳⴷⵓⴷⴻⵏ ⴰⵣⵣⴰⵢⵔⵉ ⴷ ⵓⵜⵓⵏⵙⵉ, ⵙ ⵡⴰⵣⴰⵍ ⴰⵎⴻⵇⵇⵔⴰⵏ ⵏ ⵓⵙⴻⴱⴻⵍ ⵉ ⴷ-ⵜⴻⵡⵡⵉ ⴷ ⵜⵓⴳⵏⴰ ⵏ ⴷⵉⵔⵉ ⵏ ⵜⵙⴻⵔⵜⵉⵜ ⵏ ⵓⵏⴻⴳⵔⵓⴷ ⴷ ⵓⵄⴻⵜⴱⴻⵔ ⵉ ⵢⴻⴷⴷⴻⵎ ⵓⵛⴻⵏⴳⵓ ⵏ ⵓⵔⵓⵎⵉ (ⴼⵔⴰⵏⵙⴰ).
ⴷⴻⴳ ⵓⵍⴷⴰⵢ ⵏ ⵜⴷⵉⵡⴻⵏⵏⵉⵜ ⴷⴻⴳ ⵜⴰⴳⵏⵉⵜ ⵏ ⵓⵙⵎⴻⴽⵜⴰⵢ ⵏ ⵜⵓⵣⵣⵢⴰ ⵡⵉⵙ 68 ⵏ ⵜⵎⴻⵏⵖⵉⵡⵜ-ⴰⴳⵉ, ⵎⴰⵙⵙ ⵜⴰⵛⵀⵔⵉⴼⵜ ⵢⴻⵏⵏⴰ-ⴷ ⴱⴻⵍⵍⵉ ⵜⴰⵏⴻⴳⴳⴰⵔⵓⵜ-ⴰⴳⵉ ⴷ "ⴰⴱⴻⴷⴷⴻⵍ ⴰⵎⴻⵣⵔⵓⵢⴰⵏ ⴷⴻⴳ ⵓⵎⴻⵣⵔⵓⵢ ⵏ ⵓⵎⴻⵏⵏⵓⵖ ⵏ ⵓⵙⵍⴻⵍⵍⵉ, ⵢⴻⵔⵏⴰ ⴷ ⴰⵎⴽⴰⵏ ⵉⵕⴻⵙⴰⵏ ⴷⴻⴳ ⵜⴽⴰⵜⵉⵜ ⵏ ⵜⵎⵓⵔⵜ ⴷ ⵍⴱⴰⵍ ⵏ ⵙⵉⵏ ⵏ ⵡⴻⴳⴷⵓⴷⴻⵏ ⵙ ⵡⴰⵢⴻⵏ ⵉ ⴷ-ⵜⴻⵙⵙⴽⴻⵏ ⵏ ⵍⵊⴻⵀⴷ ⵏ ⵓⵙⴻⴱⴻⵍ ⴷ ⵓⵅⴻⵚⵚⴰⵔ ⵉ ⵅⴻⴷⵎⴻⵏ ⵢⵉⵕⵓⵎⵉⵢⴻⵏ".
ⴷⴻⴳ ⵜⴰⴳⵏⵉⵜ-ⴰⴳⵉ, ⴰⵏⵖⵍⴰⴼ ⵉⵛⴻⴽⴽⴻⵔ ⵜⵉⵛⴻⴽⴽⵉⵔⵉⵏ ⵏ ⵜⴻⴳⵎⴰⵜ ⴳⴰⵔ ⴷⵣⴰⵢⵔ ⴷ ⵜⵓⵏⵙ ⵉ ⵢⴻⴷⴷⴰⵏ ⵙ ⵢⵉⵡⴻⵜ ⵏ "ⵜⴽⴻⵔⵔⵉⵙⵜ ⵏ ⵓⵣⵣⵉⴳ" ⴷⴻⴳ ⵢⵉⵙⴻⴳⴳⴰⵙⴻⵏ-ⴰⴳⵉ ⵉⵏⴻⴳⴳⵓⵔⴰ, ⵙ ⴷⴷⴰⵡ ⵏ ⵜⵎⵓⵖⵍⵉ ⴷ ⵓⴹⴻⴱⴱⴻⵔ ⵏ ⵢⵉⵎⴹⴻⴱⴱⵔⴻⵏ ⵏ ⵙⵏⴰⵜ ⵏ ⵜⵎⵓⵔⴰ, ⴰⵙⴻⵍⵡⴰⵢ ⵏ ⵜⴻⴳⴷⵓⴷⴰ ⵎⴰⵙⵙ ⵄⴰⴱⴷⴻⵍⵎⴰⴷⵊⵉⴷ ⵜⴱⵓⵏ ⴷ ⴳⵎⴰ-ⵙ ⴰⵙⴻⵍⵡⴰⵢ ⵏ ⵜⵓⵏⵙ ⵎⴰⵙⵙ ⵇⴰⵉⵙ ⵙⴰⵉⴻⴷ.
ⵢⴻⵙⵙⴰⵡⴻⵍ ⵉⵡⴰⴽⴽⴻⵏ ⴰⴷ "ⴽⴻⵎⵎⵍⴻⵏ ⵍⵊⴻⵀⴷ ⴷ ⵓⴷⵓⴽⴽⵓⵍ ⵏ ⵜⵢⴻⵣⴻⵎⵎⴰⵔ ⴷ ⵜⵎⵓⵖⵍⵉⵡⵉⵏ, ⵍⴰⴷⵖⴰ ⴷⴻⴳ ⵜⴰⵍⵍⵉⵜ-ⴰⴳⵉ ⵉ ⴷⴻⴳ ⵍⵍⴰⵏ ⵡⴰⵟⴰⵙ ⵏ ⵢⵉⴻⵄⵡⵉⵇⴻⵏ ⵏ ⵜⴰⵎⵏⴰⵟ ⴷ ⵡⵉⴷ ⵏ ⴷⴷⵓⵏⵉⵜ ⵉⵢⴻⵄⵓⵏ ⵓⵣⵣⵉⴳ ⵏ ⵓⵎⵢⵓⵏ ⴷ ⵓⵎⴰⵀⵉⵍ ⵢⵉⴷ, ⵉⵡⴰⴽⴽⴻⵏ ⴰⴷ ⵃⴰⴷⵔⴻⵏ ⵍⴼⴰⵢⴷⴰ ⵏ ⵙⵏⴰⵜ ⵏ ⵜⵎⵓⵔⴰ ⴷ ⵓⵔⴻⵙⵙⵉ ⵏ ⵍⴰⵎⴰⵏ ⴷ ⵍⴻⵀⵏⴰ ⴷⴻⴳ-ⵙⴻⵏⵜ".
ⵙⴻⴳ ⵢⵉⴷⵉⵙ-ⵉⵙ, ⴰⵎⴹⴻⴱⴱⴻⵔ ⵏ ⵙⴼⴰⵔⴰ ⵏ ⵜⵓⵏⵙ ⴷⵉ ⴷⵣⴰⵢⵔ, ⵎⴰⵙⵙ ⵄⴰⴱⴷⴻⵍⵊⴰⵍⵉⵍ ⴱⴻⵏ ⵔⴰⴱⴻⵀ, ⵉⵡⴰⵍⴰ ⴱⴻⵍⵍⵉ ⴰⵙⵎⴻⴽⵜⴰⵢ ⵏ ⵜⵓⵣⵣⵢⴰ-ⴰⴳⵉ ⴷ "ⵜⴰⴳⵏⵉⵜ ⵜⴰⵎⴰⵢⵏⵓⵜ ⵉ ⵓⵙⴻⴳⵀⴻⴷ ⵏ ⵡⴰⵣⴰⵍⴻⵏ ⵏ ⴷⴷⵓⴽⴽⵍⵉ ⴷ ⵓⵎⵄⵉⵡⴻⵏ ⴳⴰⵔ ⵙⵉⵏ ⵏ ⵡⴻⴳⴷⵓⴷⴻⵏ, ⵉⵡⴰⴽⴽⴻⵏ ⴰⴷ ⵇⴰⴱⵍⴻⵏ ⵉⵄⴻⵡⵡⵉⵇⴻⵏ ⵏ ⵜⵓⵔⴰ ⴷ ⵓⵔⴻⴱⴱⵉ ⵏ ⵢⵉⵎⴰⵍ ⵏ ⵢⵉⴷ", ⵢⴻⵔⵏⴰ ⵢⴻⵏⵏⴰ-ⴷ ⴱⴻⵍⵍⵉ ⵜⴰⵎⴻⵏⵖⵉⵡⵜ ⵏ ⵙⴰⵇⵢⴻⵜ ⵙⵉⴷⵉ ⵢⵓⵙⴻⴼ ⵜⴻⵙⵙⴽⴰⵏ-ⴷ ⴰⵎⴻⴽ ⵉ ⴷ-ⵢⴻⵍⵍⴰ ⵓⴷⵓⴽⴽⵓⵍ ⴳⴰⵔ ⴷⵣⴰⵢⵔ ⴷ ⵜⵓⵏⵙ ⵣⴷⴰⵜ ⵏ ⵓⵛⴻⵏⴳⵓ ⵏ ⵓⵔⵓⵎⵉ.
ⴰⵔⵏⵓ ⵖⴻⵔ
