ⵍⵣⵣⴰⵢⴻⵔ ⵜⴰⵎⴰⵏⴻⵖⵜ – ⵜⴻⴹⵔⴰ-ⴷ ⴰⵙⵙ-ⴰ ⵏ ⵜⵜⵍⴰⵜⴰ ⴷⴻⴳ ⵍⵣⵣⴰⵢⴻⵔ ⵜⴰⵎⴰⵏⴻⵖⵜ, ⵜⵉⵎⵍⵉⵍⵉⵜ ⵏ ⵜⵉⴷⴷⵓⴽⴽⵍⵉⵡⵉⵏ ⵉ ⵢⴻⵜⵜⴰⴽⴽⴻⵏ ⵜⴰⵍⵍⴻⵍⵜ ⵉ ⵢⵉⵎⵓⴹⴰⵏ ⵏ ⴰⵟⵟⴰⵏ ⴰⵎⴻⵇⵇⵔⴰⵏ. ⵉⵙⵡⵉ ⵏ ⵜⵎⵍⵉⵍⵉⵜ-ⴰⴳⵉ ⴷ ⴰⵙⵊⴻⵀⴻⴷ ⵏ ⵓⵎⵢⴻⵍⵍⴻⵍ ⴳⴰⵔ ⵢⵉⵃⵔⵉⵛⴻⵏ ⴷ ⵜⵎⴻⵔⵙⴻⵍⵉⵏ ⵜⵉⴳⴷⵓⴷⴰⵏⵉⵏ ⴷ ⵓⵎⴻⵜⵜⵉ ⴰⵖⴻⵔⵎⴰⵏ ⵉ ⵡⴰⴽⴽⴻⵏ ⴰⴷ ⵏⵏⴰⵖⴻⵏ ⵎⴳⴰⵍ ⵡⴰⵟⵟⴰⵏ-ⴰⴳⵉ.
ⵜⴰⵙⴻⵇⵇⴰⵎⵓⵜ ⵜⴰⵖⴻⵍⵏⴰⵡⵜ ⵏ ⵓⵃⴰⴷⴰⵔ ⵎⴳⴰⵍ ⴰⵟⵟⴰⵏ ⴰⵎⴻⵇⵇⵔⴰⵏ ⵉ ⴷ-ⵢⴻⴳⴳⴰⵏ ⵜⵉⵎⵍⵉⵍⵉⵜ-ⴰⴳⵉ ⵙ ⵓⵎⵢⴰⵡⴰⵙ ⴷ ⵜⴷⵓⴽⴽⵍⵉ ⵜⴰⵣⵣⴰⵢⵔⵉⵜ ⵏ ⵜⵉⴷⴷⵓⴽⴽⵍⵉⵡⵉⵏ ⵏ ⵢⵉⵎⵓⴹⴰⵏ. ⵙⵙⴰⵡⵍⴻⵏ ⵖⴻⴼ ⵢⵉⴱⵔⵉⴷⴻⵏ ⵏ ⵓⵙⵊⴻⵀⴻⴷ ⵏ ⵓⵎⵢⴰⵡⴰⵙ ⴳⴰⵔ ⵎⴰⵕⵕⴰ ⵢⵉⵎⴻⵙⴽⴰⵔⴻⵏ ⵉ ⵡⴰⴽⴽⴻⵏ ⴰⴷ ⵃⴰⴷⵔⴻⵏ ⵜⴰⵣⵎⴻⵔⵜ ⵏ ⵢⵉⵎⴻⵣⴷⴰⵖ.
ⴰⵎⵙⴻⵍⵡⴰⵢ ⵏ ⵜⵙⴻⵇⵇⴰⵎⵓⵜ, ⴱⵔⵓⴼⵉⵙⵓⵔ ⵄⴻⴷⴷⴰ ⴱⵓⵏⵊⴰⵔ, ⵢⴻⵏⵏⴰ-ⴷ ⴱⴻⵍⵍⵉ ⵜⵉⵎⵍⵉⵍⵉⵜ-ⴰⴳⵉ ⵜⴻⴹⵔⴰ-ⴷ ⴷⴻⴳ ⵡⴰⵙⵙ ⴰⴳⵔⴰⵖⵍⴰⵏ ⵏ ⵓⵎⴻⵏⵏⵓⵖ ⵎⴳⴰⵍ ⴰⵟⵟⴰⵏ ⴰⵎⴻⵇⵇⵔⴰⵏ. ⴷⴻⴳ-ⵙ ⴽⴽⴰⵏ-ⴷ ⵓⴳⴰⵔ ⵏ 70 ⵏ ⵜⵉⴷⴷⵓⴽⴽⵍⵉⵡⵉⵏ ⵙⴻⴳ ⵎⴰⵕⵕⴰ ⵜⵉⵎⵏⴰⴹⵉⵏ ⵏ ⵜⵎⵓⵔⵜ. ⴰⵢⴰ ⵢⴻⵍⵍⴰ-ⴷ ⴷⴻⴳ ⵡⴰⵏⵏⴰⵔ ⵏ ⵜⵖⴻⵔⵜ ⵜⴰⵖⴻⵍⵏⴰⵡⵜ ⵏ ⵓⵃⴰⴷⴰⵔ (2025-2035).
ⵢⴻⵔⵏⴰ-ⴷ ⴱⴻⵍⵍⵉ ⵍⵍⴰⵏ ⴽⵓⵣ (4) ⵏ ⵍⴻⵛⵢⴰⵍ ⵏ ⵓⵎⴰⵀⵉⵍ ⵢⴻⵔⵣⴰⵏ ⴰⴼⵔⴰⵢ ⵣⵉⴽ ⵏ ⵡⴰⵟⵟⴰⵏ, ⵍⴰⴷⵯⴰ ⴰⵟⵟⴰⵏ ⵏ ⵢⵉⴼⴼ ⴷ ⴱⵔⵓⵙⵜⴰⵜ. ⵙⵍⴰⵢⴻⵏ ⴷⴰⵖⴻⵏ ⵖⴻⴼ ⵡⴰⵣⴰⵍ ⵏ ⵜⵉⴷⴷⵓⴽⴽⵍⵉⵡⵉⵏ ⴷⴻⴳ ⵓⵎⵓⴷⴷⵓ ⵏ ⵢⵉⵙⴰⵍⵍⴻⵏ ⵉⵚⴻⵃⵃⴰⵏ. ⵢⴻⵙⵙⴻⴽⵜⴰ-ⴷ ⴷⴰⵖⴻⵏ ⴰⵙⵉⴳⴳⴻⵣ (ⵜⴰⵍⵇⵉⵃ) ⴰⵔⴰ ⴷ-ⵜⴻⴳ ⵍⵣⵣⴰⵢⴻⵔ ⴰⵙⴻⴳⴳⴰⵙ-ⴰⴳⵉ. ⵖⴻⴼ ⵢⵉⵙⴰⴼⴰⵔⴻⵏ, ⵢⴻⵏⵏⴰ-ⴷ ⴱⴻⵍⵍⵉ ⵍⵍⴰⵏ ⵢⴻⵔⵏⴰ ⴰⴷ ⴷ-ⴰⵡⴹⴻⵏ ⵡⵉⵢⴰⴹ ⴷⴻⴳ ⵓⵙⴻⴳⴳⴰⵙ-ⴰⴳⵉ.
ⴰⵏⵖⵍⴰⴼ ⵏ ⵜⵎⴻⴳⵓⵔⵉ ⵜⴰⵙⵏⴰⵙⴼⴰⵔⵜ, ⵡⴰⵙⵉⵎ ⵇⵡⵉⴷⵔⵉ, ⵢⴻⴼⴽⴰ ⴰⵣⴰⵍ ⵉ ⵜⵎⵍⵉⵍⵉⵜ-ⴰⴳⵉ. ⵢⴻⵏⵏⴰ-ⴷ ⴱⴻⵍⵍⵉ ⴰⵙⴻⵍⵡⴰⵢ ⵏ ⵜⴻⴳⴷⵓⴷⴰ, ⵎⴰⵙⵙ ⵄⴻⴱⴷⵓⵍⵎⴻⵊⵉⴷ ⵜⴻⴱⴱⵓⵏ, ⵢⴻⵔⵔⴰ ⵜⴰⵢⵏⵉⵜ ⵜⴰⵎⴻⵇⵇⵔⴰⵏⵜ ⵉ ⵜⵖⴻⵔⵜ-ⴰⴳⵉ. ⵢⴻⵏⵏⴰ-ⴷ ⴱⴻⵍⵍⵉ ⵜⴰⵎⴻⴳⵓⵔⵉ ⵜⴰⵙⵏⴰⵙⴼⴰⵔⵜ ⵜⴻⵙⵄⴰ 10 ⵏ ⵜⵎⴻⵔⵙⴻⵍⵉⵏ ⴷⴻⴳ ⵍⵣⵣⴰⵢⴻⵔ ⵉ ⴷ-ⵢⴻⵙⴼⵓⴼⵓⵖⴻⵏ 450 ⵏ ⵢⵉⵙⴰⴼⴰⵔⴻⵏ ⵏ ⴰⵟⵟⴰⵏ ⴰⵎⴻⵇⵇⵔⴰⵏ ⵉ ⵡⴰⴽⴽⴻⵏ ⴰⴷ ⵜⵊⴻⵀⴻⴷ ⵜⴷⵓⴳⴰⵎⵜ ⵏ ⵜⵣⵎⴻⵔⵜ.
ⵜⴰⵏⴻⵖⵍⴰⴼⵜ ⵏ ⵜⵎⴻⵏⵏⵓⵜ ⵜⴰⵖⴻⵍⵏⴰⵡⵜ ⴷ ⵜⵎⴻⵟⵟⵓⵜ, ⵎⴰⵙⵙⴰ ⵚⵓⵔⵢⴰ ⵎⵓⵍⵓⵊⵉ, ⵜⴻⴼⴽⴰ ⴰⵣⴰⵍ ⵉ ⵍⴻⵇⴷⵉⵛ ⵏ ⵜⵉⴷⴷⵓⴽⴽⵍⵉⵡⵉⵏ. ⵜⴻⵏⵏⴰ-ⴷ ⴱⴻⵍⵍⵉ ⴷ ⵜⴰⵔⵉⵛⵜ ⵉⵊⴻⵀⴷⴻⵏ ⵉ ⵡⴰⴽⴽⴻⵏ ⴰⴷ ⴷ-ⴼⴽⴻⵏ ⵜⴰⵍⵍⴻⵍⵜ ⵏ ⵜⵏⴻⴼⵙⵉⵜ (psychology) ⵉ ⵢⵉⵎⵓⴹⴰⵏ. ⵜⴻⵏⵏⴰ-ⴷ ⴱⴻⵍⵍⵉ ⴰⵃⵔⵉⵛ-ⵉⵙ ⵢⴻⵜⵜⵃⴰⴷⴰⵔ ⵜⴰⵎⴻⵟⵟⵓⵜ ⵢⴻⵔⵏⴰ ⵢⴻⵜⵜⴻⴳⴳ ⵍⴻⵇⴷⵉⵛ ⵏ ⵓⵙⵙⴻⴼⵔⴻⵯ ⵎⴳⴰⵍ ⴰⵟⵟⴰⵏ ⵏ ⵢⵉⴼⴼ.
ⴰⵎⴰⵔⴰ ⴰⵎⴰⵜⵓ ⵏ ⵜⵏⴻⵖⵍⴰⴼⵜ ⵏ ⵜⵣⵎⴻⵔⵜ, ⵎⵓⵃⴰⵎⴻⴷ ⵟⴰⵍⵃⵉ, ⵢⴻⵏⵏⴰ-ⴷ ⴱⴻⵍⵍⵉ ⵜⵉⵎⵍⵉⵍⵉⵜ-ⴰⴳⵉ ⵜⴻⵙⴽⴰⵏⴰⵢ-ⴷ ⵍⴻⴱⵖⵉ ⵏ ⵓⵎⵢⴰⵡⴰⵙ ⴳⴰⵔ ⵎⴰⵕⵕⴰ ⵢⵉⵎⴻⵙⴽⴰⵔⴻⵏ. ⵜⴰⵎⵙⴻⵍⵡⴰⵢⵜ ⵏ ⵜⴷⵓⴽⴽⵍⵉ ⵏ ⵢⵉⵎⵓⴹⴰⵏ, ⵃⴰⵎⵉⴷⴰ ⴽⴻⵜⵜⴰⴱ, ⵜⴻⵙⵙⵓⵜⵓⵔ ⴰⵙⵊⴻⵀⴻⴷ ⵏ ⵍⴻⵇⴷⵉⵛ ⵉ ⵡⴰⴽⴽⴻⵏ ⴰⴷ ⵢⵉⵍⵉ ⵓⵃⴰⴷⴰⵔ ⵢⴻⵍⵀⴰⵏ ⵏ ⵢⵉⵎⵓⴹⴰⵏ.
ⴰⵔⵏⵓ ⵖⴻⵔ
