ⵜⴻⴱⴷⴰ ⵡⴰⵙⵙ-ⴰ ⵏ ⵍⵀⴻⴷ ⴷⴻⴳ ⵢⵉⴶⵓ ⴰⵎⴰⵙⵙⴰⵏ ⴷ ⵓⵜⵉⴽⵏⵓⵍⵓⵊⵉ "ⴰⵎⵖⴰⵔⴰⵙ ⴰⴱⴷⴻⵍⵀⴰⴼⵉⴷ ⵉⵀⴰⴷⴷⴰⴷⴻⵏ" ⴷⴻⴳ ⵙⵉⴷⵉ ⵄⴻⴱⴷⴻⵍⵍⴰ (ⵍⴻⵣⵣⴰⵢⴻⵔ ⵜⴰⵎⴰⵏⴰⵖⵜ), ⵉⵎⴰⵀⵉⵍⴻⵏ ⵏ ⵜⴻⵎⵍⵉⵍⵉⵜ ⵏ ⵓⵙⴱⴻⴷⴷⵉ ⵏ ⵓⵙⵇⴰⵎⵓ ⵓⵏⵉⴳ ⵏ ⵜⵓⴽⴽⵉⵙⵜ ⵜⴰⵎⴰⵙⵙⴰⵏⵜ ⵜⴰⵖⴻⵍⵏⴰⵡⵜ ⴷⴻⴳ ⴱⴻⵕⵕⴰ.
ⴰⵙⵇⴰⵎⵓ-ⴰⴳⵉ ⴷⴻⴳ-ⵙ 31 ⵏ ⵢⵉⵎⴰⵙⵍⴰⴷⴻⵏ ⴳⴰⵔ ⵢⵉⵎⵓⵙⵙⵏⴰⵡⴻⵏ ⴷ ⵢⵉⵎⵏⴰⴷⵉⵢⴻⵏ ⵉⵎⴻⵇⵇⵔⴰⵏⴻⵏ ⵏ ⵓⵎⴰⴹⴰⵍ (24 ⴷⵔⴰⵏ-ⴷ ⵙ ⵜⵉⴷⴷⵉⵏ, 7 ⵜⵜⴻⴽⴽⵉⵏ ⵙ ⵜⵜⴰⵡⵉⵍ ⵏ ⵓⴷⵉⵡⴻⵏⵏⵉ ⵙ ⵓⵙⴻⵍⴽⵉⵎ ⵏ ⵍⴻⴱⵄⵉⴷ). ⴳⴰⵔ-ⴰⵙⴻⵏ ⴰⴱⵕⵓⴼⵉⵙⵓⵔ ⴻⵍⵉⴰⵙ ⵣⴻⵔⵀⵓⵓⵏⵉ, ⴰⴱⵕⵓⴼⵉⵙⵓⵔ ⴱⴻⵍⵇⴰⵙⴻⵎ ⵀⴰⴱⴰ ⴷ ⵏⴼⵉⵜ ⵏ ⵢⵉⵎⵓⵙⵙⵏⴰⵡⴻⵏ ⵉ ⵓⵡⵢⴻⵏ ⴰⵎⴽⴰⵏ ⵉⵄⵍⴰⵢⴻⵏ ⴷⴻⴳ ⵓⵏⵏⴰⵔ ⵏ ⵜⵓⵙⵙⵏⴰ ⴷ ⵜⵉⵜⵉⴽⵏⵓⵍⵓⵊⵉⵢⵉⵏ ⴷⴻⴳ ⵡⴰⵟⴰⵙ ⵏ ⵜⵎⵓⵔⴰ ⵏ ⵓⵎⴰⴹⴰⵍ ⴰⵎ ⵓⵙⵜⵕⴰⵍⵢⴰ, ⵉⵡⵓⵏⴰⴽ ⵢⴻⴷⴷⵓⴽⴽⵍⴻⵏ ⵏ ⵎⴰⵔⵉⴽⴰⵏ, ⵙⵙⵡⵉⴷ ⴷ ⴼⵔⴰⵏⵙⴰ.
ⴷⴻⴳ ⵜⵎⴻⵙⵍⴰⵢⵜ-ⵉⵙ ⴷⴻⴳ ⵓⵍⴷⴰⵢ ⵏ ⵜⴻⵎⵍⵉⵍⵉⵜ-ⴰⴳⵉ, ⴰⵏⴻⵖⵍⴰⴼ ⵏ ⵓⵙⴻⵍⵎⴻⴷ ⵓⵏⵉⴳ ⴷ ⵓⵏⴰⴷⵉ ⴰⵎⴰⵙⵙⴰⵏ, ⵎⴰⵙⵙ ⴽⴰⵎⴻⵍ ⴱⴰⴷⴷⴰⵔⵉ, ⵉⵙⵙⴻⴼⵀⴻⵎ-ⴷ ⴱⴻⵍⵍⵉ "ⴰⵙⴱⴻⴷⴷⵉ ⵏ ⵓⵙⵇⴰⵎⵓ-ⴰⴳⵉ ⴷ ⴰⵙⴻⵍⴽⴻⵎ ⵏ ⵜⵜⴻⴶⴶⴰⵜ ⵏ ⵓⵙⴻⵍⵡⴰⵢ ⵏ ⵜⴻⴳⴷⵓⴷⴰ, ⵎⴰⵙⵙ ⵄⴻⴱⴷⴻⵍⵎⴰⴶⵉⴷ ⵜⴻⴱⴱⵓⵏ, ⵉ ⵢⴻⴱⵖⴰⵏ ⴰⴷ ⴷ-ⵢⴻⴼⴽ ⵜⴰⴳⵏⵉⵜ ⵜⴰⵎⴻⵇⵇⵔⴰⵏⵜ ⵉ ⵜⵓⴽⴽⵉⵙⵜ ⵜⴰⵎⴰⵙⵙⴰⵏⵜ ⴷⴻⴳ ⴱⴻⵕⵕⴰ ⵉⵡⴰⴽⴽⴻⵏ ⴰⴷ ⵜⵜⴻⴽⴽⵉ ⴷⴻⴳ ⵓⵙⵏⴻⴼⵍⵉ ⵏ ⵜⵎⵓⵔⵜ ⵙ ⵜⵎⵓⵖⵍⵉⵡⵉⵏ-ⵉⵙ ⴷ ⵢⵉⵔⵎⵉⵜⴻⵏ-ⵉⵙ, ⵔⵏⵉ-ⴷ ⴼⴻⵍⵍ-ⴰⵙⴻⵏⵜ ⴰⵎⴰⵀⵉⵍ ⵖⴻⴼ ⵓⵏⵉⴳ ⵏ ⵜⵉⵜⵉⴽⵏⵓⵍⵓⵊⵉⵢⵉⵏ ⵜⵉⵎⴰⵢⵏⵓⵜⴻⵏ".
ⵉⵙⵙⴻⴽⵜⵉ-ⴷ ⴱⴻⵍⵍⵉ ⴰⵣⴻⵎⵣ ⵏ ⵡⴰⵙⵙ-ⴰ "ⵎⴰⵞⵉ ⴷ ⵢⵉⵡⴻⵏ ⵏ ⵍⵎⴰⵄⴻⴷ ⵏ ⵍⵇⴰⵄⴰ ⴽⴰⵏ, ⵍⴰⵎⴻⵄⵏⴰ ⴷ ⵍⵍⵙⴰⵙ ⵉⵕⴻⵙⵙⴰⵏ ⴷ ⵜⴰⵣⵡⴰⵔⴰ ⵏ ⵢⵉⵡⴻⵜ ⵏ ⵜⴰⵍⵍⵉⵜ ⵜⴰⵎⴻⵇⵇⵔⴰⵏⵜ ⵉ ⵓⵙⴱⴻⴷⴷⵉ ⵏ ⵍⴻⵣⵣⴰⵢⴻⵔ ⵜⴰⵎⴰⵢⵏⵓⵜ ⵉ ⵢⴻⵔⵏⴰⵏ ⵙ ⵓⴱⵔⵉⴷ ⵏ ⵜⴻⵎⵍⵉⵍⵉⵜ-ⴰⴳⵉ ⵏ ⵓⵙⴱⴻⴷⴷⵉ ⵏ ⵓⵙⵇⴰⵎⵓ ⵓⵏⵉⴳ ⵏ ⵜⵓⴽⴽⵉⵙⵜ ⵜⴰⵎⴰⵙⵙⴰⵏⵜ ⴷⴻⴳ ⴱⴻⵕⵕⴰ".
ⵉⵙⵙⴻⴽⵏⴻⴷ ⴱⴻⵍⵍⵉ "ⴰⵙⵔⴻⵚ ⵏ ⵓⵙⵇⴰⵎⵓ-ⴰⴳⵉ ⴰⵎⴰⵢⵏⵓⵜ ⵙ ⴷⴷⴰⵡ ⵏ ⵜⵎⵓⵖⵍⵉ ⵜⵓⵙⵔⵉⴷⵜ ⵏ ⵓⵙⴻⵍⵡⴰⵢ ⵏ ⵜⴻⴳⴷⵓⴷⴰ ⵉⵟⵟⴰⴽ-ⴰⵙ ⵢⵉⵡⴻⵏ ⵏ ⵓⵣⴰⵎⵓⵍ ⴰⵙⴻⵔⵜⵉ ⵉⴶⴻⵀⴷⴻⵏ ⵓ ⵢⴻⵙⵙⴻⵏⴽⴰⴷ ⴰⵎⴽⴰⵏ ⵉⵄⵍⴰⵢⴻⵏ ⵏ ⵢⵉⵎⵓⵙⵙⵏⴰⵡⴻⵏ ⵍⴻⵣⵣⴰⵢⵔⵉⵢⴻⵏ ⵢⴻⵍⵍⴰⵏ ⴷⴻⴳ ⵓⵎⴰⴹⴰⵍ ⵎⴻⵕⵕⴰ".
ⵙⴻⴳ ⵜⴰⵎⴰ-ⵙ, ⴰⵎⵙⴰⵙⴻⵏ ⵏ ⵜⵙⴻⵇⴰⵎⵓⵜ ⵏ ⵓⵙⴱⴻⴷⴷⵉ, ⴰⴱⵕⵓⴼⵉⵙⵓⵔ ⴻⵍⵉⴰⵙ ⵣⴻⵔⵀⵓⵓⵏⵉ, ⵉⵀⴻⴷⴷⴻⵔ-ⴷ ⵖⴻⴼ ⵡⴰⵣⴰⵍ ⵏ ⵓⵙⴱⴻⴷⴷⵉ ⵏ ⵓⵙⵇⴰⵎⵓ-ⴰⴳⵉ ⵉ ⵢⴻⵍⵍⴰⵏ ⴷ "ⴰⵙⵏⴻⴽⵏⴻⴷ ⵏ ⵍⴻⴱⵖⵉ ⴰⵙⴻⵔⵜⵉ ⵉⵕⴻⵙⵙⴰⵏ ⵉ ⵓⵇⵇⴰⵏ ⵏ ⵜⵣⴻⵎⵎⴰⵔ ⵏ ⵍⴻⵣⵣⴰⵢⴻⵔ ⴷⴻⴳ ⴱⴻⵕⵕⴰ ⴷ ⵜⵎⵓⵔⵜ-ⵏⵙⴻⵏ ⵜⴰⵚⵍⵉⵜ ⵓ ⴰⴷ ⴷⴷⵓⴽⴽⵍⴻⵏ ⵍⵎⴻⴶⵀⵓⴷⴰⵜ ⵉ ⵓⵙⵏⴻⴼⵍⵉ ⵏ ⵓⵙⴻⵍⵎⴻⴷ ⵓⵏⵉⴳ ⴷ ⵓⵏⴰⴷⵉ ⴰⵎⴰⵙⵙⴰⵏ".
ⵉⵍⴰⵇ ⴰⴷ ⵏⵣⴻⵔ ⴱⴻⵍⵍⵉ ⴰⵙⵇⴰⵎⵓ ⵏ ⵢⵉⵏⴻⵖⵍⴰⴼⴻⵏ ⵢⴻⵇⴱⴻⵍ ⴷⴻⴳ ⵜⴻⵎⵍⵉⵍⵉⵜ-ⵉⵙ ⵜⴰⵏⴻⴳⴳⴰⵔⵓⵜ ⴰⵙⴱⴻⴷⴷⵉ ⵏ ⵓⵙⵇⴰⵎⵓ ⵓⵏⵉⴳ ⵏ ⵜⵓⴽⴽⵉⵙⵜ ⵜⴰⵎⴰⵙⵙⴰⵏⵜ ⵜⴰⵖⴻⵍⵏⴰⵡⵜ ⴷⴻⴳ ⴱⴻⵕⵕⴰ ⴰⵎ ⵜⴰⵙⴻⴽⴽⴰ ⵜⴰⵎⴻⵛⵛⴰⵡⴻⵔⵜ ⵉ ⵢⴻⵟⵟⴰⴼⴰⵔⴻⵏ ⵜⵉⵙⴻⵍⵡⵉⵜ ⵏ ⵜⴻⴳⴷⵓⴷⴰ, ⵢⴻⵔⵏⴰ ⵜⴻⵜⵜⴰⵡⵉ ⴰⵣⴰⵔⵓⴳ ⵏ ⵜⴻⴷⵔⵉⵎⵜ ⴷ ⵓⴷⴱⴻⵍ.
ⴷⴻⴳ ⵓⵏⵏⴰⵔ-ⴰⴳⵉ, ⴰⵙⴻⵍⵡⴰⵢ ⵏ ⵜⴻⴳⴷⵓⴷⴰ ⵉⵙⵙⵉⵡⴻⵍ ⵉ ⵢⴰⴽⴽ ⴰⵔⵔⴰⵡ ⵏ ⵍⴻⵣⵣⴰⵢⴻⵔ ⴳⴰⵔ ⵢⵉⵜⵔⵉⵢⴻⵏ ⵏ ⵜⵓⵙⵙⵏⴰ ⴷⴻⴳ ⵓⵎⴰⴹⴰⵍ ⵉⵡⴰⴽⴽⴻⵏ ⴰⴷ ⴷ-ⵜⴻⴽⴽⵉⵏ ⴷⴻⴳ ⵓⵙⴻⵏⴼⴰⵔ ⵏ ⵓⵙⴰⵍⵉ ⵏ ⵜⵎⵓⵔⵜ ⵖⴻⵔ ⵓⵙⵡⵉⵔ ⵏ ⵜⵎⵓⵔⴰ ⵉⴶⴻⵀⴷⴻⵏ.
ⴰⵔⵏⵓ ⵖⴻⵔ
