ⵍⵣⵣⴰⵢⴻⵔ ⵜⴰⵎⴰⵏⴻⵖⵜ – ⵢⴻⵙⵙⴻⵍⵡⴰⵢ ⵓⵏⵖⵍⴰⴼ ⵏ ⵓⵡⴰⵏⴰⴽ, ⴰⵏⵖⵍⴰⴼ ⵏ ⵓⵥⴰⵔⵓ ⴷ ⵜⵎⴰⴷⵏⵉⵡⵉⵏ, ⵎⵓⵃⴰⵎⴻⴷ ⴰⵔⴽⴰⴱ, ⴷ ⵓⵏⵖⵍⴰⴼ ⵏ ⵜⵣⵎⴻⵔⵜ ⴷ ⵜⵣⵎⴰⵔ ⵜⵉⵎⴰⵢⵏⵓⵜⵉⵏ, ⵎⵓⵔⴰⴷ ⵄⴻⵊⵊⴰⵍ, ⴰⵙⵙ-ⴰ ⵏ ⵜⵜⵍⴰⵜⴰ, ⵢⵉⵡⴻⵜ ⵏ ⵜⵎⵍⵉⵍⵉⵜ ⵏ ⵓⵎⵢⴻⵍⵍⴻⵍ ⵉ ⵡⴰⴽⴽⴻⵏ ⴰⴷ ⵄⴻⵙⵙⴻⵏ ⵢⴻⵔⵏⴰ ⴰⴷ ⵡⴰⵍⵉⵏ ⴰⵎⴻⴽ ⵉⵜⴻⴷⴷⵓ ⵍⴻⵇⴷⵉⵛ ⴷⴻⴳ ⵢⵉⵙⴻⵏⴼⴰⵔⴻⵏ ⵉⵎⴻⵇⵇⵔⴰⵏⴻⵏ ⵏ ⵜⵎⵓⵔⵜ, ⵍⴰⴷⵯⴰ ⴷⴻⴳ ⵡⴰⵢⴻⵏ ⵢⴻⵔⵣⴰⵏ ⴰⵙⴻⵇⵇⴻⵏ-ⵏⵙⴻⵏ ⵙ ⵜⵔⵉⴽⵉⵜ ⴷ ⵓⴳⴰⵣ.
ⴰⴽⴽⴻⵏ ⵉ ⴷ-ⵢⴻⵏⵏⴰ ⵡⴰⵍⵖⵓ ⵏ ⵜⵏⴻⵖⵍⴰⴼⵜ ⵏ ⵓⵥⴰⵔⵓ ⴷ ⵜⵎⴰⴷⵏⵉⵡⵉⵏ, ⵜⵉⵎⵍⵉⵍⵉⵜ-ⴰⴳⵉ ⵜⵓⵙⴰ-ⴷ ⵙ ⵢⵉⵏⴻⴹⴰⴼ ⵏ ⵓⵙⴻⵍⵡⴰⵢ ⵏ ⵜⴻⴳⴷⵓⴷⴰ, ⵎⴰⵙⵙ ⵄⴻⴱⴷⵓⵍⵎⴻⵊⵉⴷ ⵜⴻⴱⴱⵓⵏ, ⵉ ⵢⴻⴱⵯⴰⵏ ⴰⴷ ⵣⵣⴻⵔⴱⴻⵏ ⵍⴻⵇⴷⵉⵛ ⴷⴻⴳ ⵢⵉⵙⴻⵏⴼⴰⵔⴻⵏ ⵉⵊⴻⵀⴷⴻⵏ ⵏ ⵜⴷⴰⵎⵙⴰ ⵜⴰⵖⴻⵍⵏⴰⵡⵜ.
ⵜⵉⵎⵍⵉⵍⵉⵜ-ⴰⴳⵉ, ⵉ ⴷ-ⵢⴻⵍⵍⴰⵏ ⵙ ⵓⵃⴰⴷⴰⵔ ⵏ ⵜⵎⴰⵔⵉⵜ ⵏ ⵓⵏⵖⵍⴰⴼ ⵢⴻⵔⵣⴰⵏ ⵜⵉⵎⴰⴷⵏⵉⵡⵉⵏ, ⴽⴰⵔⵉⵎⴰ ⴱⴻⴽⵉⵔ ⵟⴰⴼⴻⵔ, ⴷ ⵢⵉⵎⴻⵇⵇⵔⴰⵏⴻⵏ ⵏ ⵙⵏⴰⵜ ⵜⵏⴻⵖⵍⴰⴼⵉⵏ, ⵜⴻⵔⵣⴰ ⴰⵏⴰⴷⵉ ⵏ ⵡⴰⵎⴻⴽ ⵉⵜⴻⴷⴷⵓ ⵓⵙⴻⵇⵇⴻⵏ ⵏ ⵜⵣⵎⴻⵔⵜ ⵉ ⵢⵉⵙⴻⵏⴼⴰⵔⴻⵏ-ⴰⴳⵉ: ⵓⵥⴰⵔⵓ ⵏ ⵓⵣⵉⵏⴽ ⵏ ⵜⴰⵍⴰ ⵃⴰⵎⵣⴰ, ⴰⵙⴻⵏⴼⴰⵔ ⵏ ⵍⴼⵓⵙⴼⴰⵟ ⴷⴻⴳ ⵜⴱⴻⵙⵙⴰ, ⵓⵥⴰⵔⵓ ⵏ ⵓⵣⵣⴰⵍ ⵏ ⴳⴰⵔⴰ ⵊⴱⵉⵍⴰⵜ (ⵜⵉⵏⴷⵓⴼ-ⴱⴻⵛⵛⴰⵔ), ⴷ ⵢⵉⵙⴻⵏⴼⴰⵔⴻⵏ ⵏ ⵡⴰⵎⵎⴰⵙⴻⵏ ⵏ ⵓⵙⴰⵣⵣⴻⴳ ⵏ ⵡⴰⵎⴰⵏ ⵏ ⵍⴻⴱⵃⴻⵔ.
ⴷⴻⴳ ⵜⵎⵍⵉⵍⵉⵜ-ⴰⴳⵉ, ⵡⴰⵍⴰⵏ ⵢⵉⵡⴻⵏ ⵓⵙⴻⴼⵔⴻⵯ ⵢⴻⵛⵛⵓⵔⴻⵏ ⵖⴻⴼ ⵡⴰⵎⴻⴽ ⵉⵜⴻⴷⴷⵓ ⵓⵎⴰⵀⵉⵍ ⴷⴻⴳ ⵢⵉⵙⴻⵏⴼⴰⵔⴻⵏ-ⴰⴳⵉ. ⵢⵉⵏⵖⵍⴰⴼⴻⵏ ⵙⵙⴻⴽⵏⴻⵏ-ⴷ ⴱⴻⵍⵍⵉ ⵢⴻⵍⵀⴰ ⴰⴷ ⵣⵣⴻⵔⴱⴻⵏ ⵢⴻⵔⵏⴰ ⴰⴷ ⵏⵇⴻⵙⴻⵏ ⵍⵡⴻⵇⵜ ⵏ ⵓⴼⵔⴰⵢ ⵏ ⵓⵎⴰⵀⵉⵍ. ⴼⴽⴰⵏ ⵜⵉⵏⴻⴹⴰⴼ ⵉ ⵡⴰⴽⴽⴻⵏ ⴰⴷ ⵢⵉⵍⵉ ⵓⵎⵢⴻⵍⵍⴻⵍ ⵉⵊⴻⵀⴷⴻⵏ ⴳⴰⵔ ⵢⵉⵅⴻⴷⴷⴰⵎⴻⵏ ⵏ ⵙⵏⴰⵜ ⵜⵏⴻⵖⵍⴰⴼⵉⵏ, ⵉ ⵡⴰⴽⴽⴻⵏ ⴰⴷ ⴼⴰⴽⴻⵏ ⵢⵉⵙⴻⵏⴼⴰⵔⴻⵏ-ⴰⴳⵉ ⴷⴻⴳ ⵍⵡⴻⵇⵜ ⵉ ⴷ-ⵢⴻⵜⵜⵓⵏⴻⴼⴽⴰⵏ ⵢⴻⵔⵏⴰ ⴰⴷ ⴼⴽⴻⵏ ⵜⴰⵣⵎⴻⵔⵜ ⵉ ⵜⴷⴰⵎⵙⴰ ⵜⴰⵖⴻⵍⵏⴰⵡⵜ.
ⴰⵔⵏⵓ ⵖⴻⵔ
