ⵜⴻⴱⴷⴰ ⵜⴻⵔⴱⴰⵄⵜ ⵜⴰⵖⴻⵍⵏⴰⵡⵜ ⵜⴰⵣⵣⴰⵢⵔⵉⵜ ⵏ ⵜⴽⵓⵔⵜ ⵏ ⵓⴹⴰⵔ (ⵜⵉⵙⴻⴷⵏⴰⵏ), ⴰⵙⵙ-ⴰ ⵏ ⵜⵜⵍⴰⵜⴰ, ⵢⵉⵡⴻⵏ ⵏ ⵓⵎⵣⴰⵔⴰⴳ ⵏ ⵓⵀⴻⴳⴳⵉ ⴰⵎⴰⵢⵏⵓⵜ ⴷⴻⴳ ⵍⴻⵣⵣⴰⵢⴻⵔ ⵜⴰⵎⴰⵏⴰⵖⵜ, ⵉⵡⴰⴽⴽⴻⵏ ⴰⴷ ⴷ-ⵜⵀⴻⴳⴳⵉ ⵉ ⵙⵏⴰⵜ ⵏ ⵜⴻⵎⵍⵉⵍⵉⵢⵉⵏ ⵏ ⵜⴷⵓⴽⵍⵉ ⵎⴳⴰⵍ ⵜⴰⵔⴱⴰⵄⵜ ⵏ ⵜⴻⴼⵔⵉⵇⵜ ⵏ ⵓⵏⵥⵓⵍ ⴰⵔⴰ ⴷ-ⵢⵉⵍⵉⵏ ⴷⴻⴳ 14 ⴷ 17 ⵢⴻⴱⵔⵉⵔ ⵉ ⴷ-ⵉⵜⵜⴻⴷⴷⵓⵏ. ⴰⵢⴰⴳⵉ ⴷ ⴰⵃⵔⵉⵛ ⵏ ⵡⴰⵀⵉⵍ ⵏ ⵓⵀⴻⴳⴳⵉ ⵏ "ⵜⵉⵣⵉⵏⵣⴰⵡⵉⵏ" ⵉ ⵡⴰⴽⴽⴰⵢⴰⴷ ⵏ ⵜⴻⴳⵔⴰⵡⵜ ⵏ ⵜⴻⴼⵔⵉⵇⵜ 2026 ⴰⵔⴰ ⴷ-ⵢⵉⵍⵉⵏ ⴷⴻⴳ ⵡⴰⴳⴳⵓⵔ ⵏ ⵢⵓⵍⵢⵓ ⵉ ⴷ-ⵉⵜⵜⴻⴷⴷⵓⵏ, ⴰⴽⴽⴻⵏ ⵉ ⴷ-ⵜⴻⴼⴽⴰ ⵢⵉⵙⴰⵍⵍⴻⵏ ⵜⴰⴷⵓⴽⵍⴰ ⵜⴰⵣⵣⴰⵢⵔⵉⵜ ⵏ ⵜⴽⵓⵔⵜ ⵏ ⵓⴹⴰⵔ (ⴼⴰⴼ) ⴷⴻⴳ ⵓⵙⵎⴻⵍ-ⵉⵙ ⵓⵏⵚⵉⴱ.
ⵜⴰⴷⵓⴽⵍⴰ ⵜⴻⵙⵙⴻⴽⵏⴻⴷ-ⴷ ⴷⴻⴳ ⵓⵙⵉⵡⴹ-ⵉⵙ ⴱⴻⵍⵍⵉ ⴰⵏⴰⵅⴰⴱ ⴰⵖⴻⵍⵏⴰⵡ, ⵎⴰⵙⵙ ⴼⴰⵔⵉⴷ ⴱⴻⵏⵙⵜⵉⵜⵉ, ⵉⵙⵉⵡⴻⵍ-ⴷ ⵉ 26 ⵏ ⵜⵎⵓⵔⴰⵔⵉⵏ ⵉⵡⴰⴽⴽⴻⵏ ⴰⴷ ⴷ-ⵜⴻⴽⴽⵉⵢⴻⵏⵜ ⴷⴻⴳ ⵓⵎⵣⴰⵔⴰⴳ-ⴰⴳⵉ ⴰⵔⴰ ⵢⵉⴷⵓⵎⴻⵏ ⴰⵔⵎⵉ ⴷ 10 ⵢⴻⴱⵔⵉⵔ, ⴰⵙⵎⵉ ⴰⵔⴰ ⵔⵣⵓⵏⵜ "ⵜⵉⵣⵉⵏⵣⴰⵡⵉⵏ" ⵖⴻⵔ ⵊⵓⵀⴰⵏⵏⴻⵙⴱⵓⵔⴳ.
ⵙⵏⴰⵜ ⵏ ⵜⴻⵎⵍⵉⵍⵉⵢⵉⵏ-ⴰⴳⵉ ⵏ ⵜⴷⵓⴽⵍⵉ ⵜⴻⴷⴷⵓⵏⵜ ⴷⴻⴳ ⵓⴱⵔⵉⴷ ⵏ ⵓⵀⴻⴳⴳⵉ ⵏ ⵜⴻⵔⴱⴰⵄⵜ ⵜⴰⵣⵣⴰⵢⵔⵉⵜ ⵉ ⵜⴰⴳⴳⴰⵔⴰ ⵏ ⵡⴰⴽⴽⴰⵢⴰⴷ ⵏ ⵜⴻⴼⵔⵉⵇⵜ 2026, ⴰⵔⴰ ⴷ-ⵢⵉⵍⵉⵏ ⵙⴻⴳ 25 ⵢⵓⵍⵢⵓ ⵖⴻⵔ 16 ⵖⵓⵛⵜ ⵉ ⴷ-ⵉⵜⵜⴻⴷⴷⵓⵏ.
ⵜⴰⵔⴱⴰⵄⵜ ⵏ ⵜⵍⴰⵡⵉⵏ ⵜⵓⵔⴰⵔ ⵢⴰⴽⴰⵏ ⵙⵏⴰⵜ ⵏ ⵜⴻⵎⵍⵉⵍⵉⵢⵉⵏ ⵏ ⵜⴷⵓⴽⵍⵉ ⴷⴻⴳ ⵜⴰⵣⵡⴰⵔⴰ ⵏ ⵡⴰⴳⴳⵓⵔ ⵏ ⵎⴻⵖⵔⴻⵙ ⴷⴻⴳ ⵍⵇⴰⵀⵉⵔⴰ ⵣⴷⴰⵜ ⵏ ⵎⴰⵚⴻⵔ, ⴰⵏⵉⴷⴰ ⵉ ⵜⴻⵔⵏⴰ ⵙ (3-0) ⴷ (3-2).
ⵍⴻⵣⵣⴰⵢⴻⵔ ⴰⴷ ⴷ-ⵜⴻⴽⴽⵉ ⵉ ⵜⵉⴽⴽⴻⵍⵜ ⵜⵉⵙ ⵙⴰ (7) ⴷⴻⴳ ⵓⵎⴻⵣⵔⵓⵢ-ⵉⵙ ⴷⴻⴳ ⵜⴰⴳⴳⴰⵔⴰ ⵏ "ⵛⴰⵏ", ⴰⵏⵉⴷⴰ ⵜⴻⵜⵜⵡⴰⵕⴰⵙ ⴷⴻⴳ ⵜⴻⴳⵔⵓⵎⵎⴰ ⵜⴰⵎⴻⵏⵣⵡⵓⵜ ⵙ ⵜⴰⵎⴰ ⵏ ⵍⵎⴻⵔⵔⵓⴽ, ⵙⵉⵏⵉⴳⴰⵍ ⴷ ⴽⵉⵏⵢⴰ.
ⵜⴰⵔⴱⴰⵄⵜ ⵜⴰⵣⵣⴰⵢⵔⵉⵜ ⵜⴻⵡⵡⵉ ⴰⵎⴽⴰⵏ-ⵉⵙ ⴷⴻⴳ "ⵛⴰⵏ 2026" ⵙⴻⵍⴷ ⵎⵉ ⵜⴻⵔⵏⴰ ⴷⴻⴳ ⵓⵛⵍⴰⵜ (aller-retour) ⵜⴰⵔⴱⴰⵄⵜ ⵏ ⴽⴰⵎⵉⵔⵓⵏ (2-1 ⴷⴻⴳ ⵡⴰⵀⵔⴰⵏ ⴷ 1-0 ⴷⴻⴳ ⴷⵓⵓⴰⵍⴰ) ⴷⴻⴳ ⵜⵓⴱⴻⵔ 2025.
ⴰⵔⵏⵓ ⵖⴻⵔ
