ⵍⵣⵣⴰⵢⴻⵔ ⵜⴰⵎⴰⵏⴻⵯⵜ – ⵢⴻⴳⴳⴰ ⵡⴰⵎⵎⴰⵙ ⴰⵯⴻⵍⵏⴰⵡ ⴰⵣⵣⴰⵢⵔⵉ ⵏ ⵜⵎⵉⵍⴽⵉⵜ ⵜⴰⵎⴻⴳⵓⵔⴰⵏⵜ (INAPI), ⵙ ⵓⵎⵢⴻⵍⵍⴻⵍ ⴷ ⵡⴰⵙⵉⵔⴰ ⵏ ⵜⴷⵓⴽⴽⵍⵉ ⵜⴰⵎⴰⴹⵍⴰⵏⵜ ⵏ ⵜⵎⵉⵍⴽⵉⵜ ⵜⴰⴼⴻⴽⵔⴰⵏⵜ ⴷⴻⴳ ⵍⵣⵣⴰⵢⴻⵔ, ⴰⵙⵙ-ⴰ ⵏ ⵍⵃⴻⴷ, ⵢⵉⵡⴻⵜ ⵏ ⵜⵉⵎⵍⵉⵍⵉⵜ ⵖⴻⴼ ⵡⴰⵣⴰⵍ ⵏ ⵜⵎⴻⵟⵟⵓⵜ ⴷⴻⴳ ⵓⵙⵏⵓⵍⴼⵓ ⴷ ⵓⵙⵊⴻⵀⴻⴷ ⵏ ⵜⵎⴻⵙⵙⴻⵏⵜⵉⵜ ⴰⵢⴰ ⵢⴻⵍⵍⴰ-ⴷ ⴷ ⴰⵃⵢⵓ ⵏ ⵡⴰⵙⵙ ⴰⴳⵔⴰⵯⵍⴰⵏ ⵏ ⵜⵎⴻⵟⵟⵓⵜ.
ⵜⵉⵎⵍⵉⵍⵉⵜ-ⴰⴳⵉ ⵜⴻⴹⵔⴰ-ⴷ ⴷⴻⴳ ⵡⴰⵙⵉⵔⴰ ⵏ ⵜⴷⵓⴽⴽⵍⵉ ⵜⴰⵎⴰⴹⵍⴰⵏⵜ ⴷⴻⴳ ⵍⵣⵣⴰⵢⴻⵔ ⵜⴰⵎⴰⵏⴻⵯⵜ, ⵙ ⵓⵃⴰⴷⴰⵔ ⵏ ⵡⴰⵟⴰⵙ ⵏ ⵜⵍⴰⵡⵉⵏ ⵢⴻⵙⵄⴰⵏ ⵢⵉⵙⴻⵏⴼⴰⵔⴻⵏ ⴷ ⵜⵎⵓⵙⵏⴰⵡⵉⵏ ⵉ ⵢⴻⵙⵙⴰⵡⴹⴻⵏ ⴰⴷ ⵃⴰⴷⵔⴻⵏⵜ ⴰⵙⵏⵓⵍⴼⵓ-ⵏⵙⴻⵏⵜ ⵢⴻⵔⵏⴰ ⴰⴷ ⵜ-ⵔⵔⴻⵏⵜ ⴷ ⵢⵉⴼⴰⵔⵉⵙⴻⵏ ⵏ ⵓⵣⵏⵓⵣⵉ. ⵓⵏⴻⴱⴷⴰⴷ ⵏ ⵡⴰⵙⵉⵔⴰ ⵏ ⵜⴷⵓⴽⴽⵍⵉ ⵜⴰⵎⴰⴹⵍⴰⵏⵜ, ⵎⴰⵙⵙ ⵎⵓⵃⴰⵎⴻⴷ ⵚⴰⵍⴻⴽ ⴰⵃⵎⴻⴷ ⵄⵓⵜⵎⴰⵏ, ⵢⴻⵏⵏⴰ-ⴷ ⴱⴻⵍⵍⵉ ⵢⴻⵍⵀⴰ ⴰⴷ ⵢⵉⵏⵇⵉⵙ ⵓⵅⵍⴰⵍ ⴳⴰⵔ ⵜⵎⴻⵟⵟⵓⵜ ⴷ ⵓⵔⴳⴰⵣ ⴷⴻⴳ ⵓⵃⵔⵉⵛ ⵏ ⵓⵙⵏⵓⵍⴼⵓ, ⵢⴻⵔⵏⴰ ⵢⴻⵙⵙⴻⴽⵏ-ⴷ ⴱⴻⵍⵍⵉ ⵜⵎⴻⵟⵟⵓⵜ ⵜⴰⵣⵣⴰⵢⵔⵉⵜ ⵜⴻⵇⴷⴻⵛ ⴰⵟⴰⵙ ⴷⴻⴳ ⵜⵓⵙⵏⴰ ⴷ ⵜⵜⴻⴽⵏⵓⵍⵓⵊⵢⴰ.
ⵎⴰⵙⵙⴰ ⵃⴰⵏⴰⵏ ⵀⴰⵛⵎⵉ ⵙⴻⴳ ⵡⴰⵎⵎⴰⵙ ⴰⵯⴻⵍⵏⴰⵡ ⴷ ⴱⵔⵓⴼⵉⵙⵓⵔ ⵊⴰⵎⵉⵍⴰ ⵃⴰⵍⵍⵉⵛ ⵙⴻⴳ ⵡⴰⵙⵇⴰⵎⵓ ⵏ ⵓⵏⴰⴷⵉ ⵓⵙⵙⵏⴰⵏ, ⴼⴽⴰⵏⵜ ⴰⵣⴰⵍ ⵉ ⵜⵎⴻⵟⵟⵓⵜ ⵜⴰⵣⵣⴰⵢⵔⵉⵜ ⵉ ⵢⴻⵍⵍⴰⵏ ⴷ ⵜⴰⵔⵉⵛⵜ ⵏ ⵓⵙⵏⵓⵍⴼⵓ. ⵏⵏⴰⵏⵜ-ⴷ ⴱⴻⵍⵍⵉ ⵜⵉⵎⵍⵉⵍⵉⵜ-ⴰⴳⵉ ⴷ ⵜⴰⴳⵏⵉⵜ ⵉ ⵡⴰⴽⴽⴻⵏ ⴰⴷ ⵙⵙⴻⴼⵔⵓⵏⵜ ⵜⵉⵍⴰⵡⵉⵏ ⵖⴻⴼ ⵢⵉⴱⵔⵉⴷⴻⵏ ⵏ ⵡⴻⴼⵔⴰⵢ ⵏ ⵡⴻⴷⵔⵉⵎ ⴷ ⵓⵎⵢⴻⵍⵍⴻⵍ ⵉ ⵢⴻⵍⵍⴰⵏ ⵉ ⵡⴰⴽⴽⴻⵏ ⴰⴷ ⵃⴰⴷⵔⴻⵏⵜ ⵜⵉⴽⵜⵉⵡⵉⵏ-ⵏⵙⴻⵏⵜ ⵢⴻⵔⵏⴰ ⴰⴷ ⵜⴻⵏⵜ-ⵔⵔⴻⵏⵜ ⴷ ⵢⵉⵙⴻⵏⴼⴰⵔⴻⵏ ⵉⴷⴰⵎⵙⴰⵏⴻⵏ.
ⴷⴻⴳ ⵜⵉⵎⵍⵉⵍⵉⵜ-ⴰⴳⵉ, ⵙⵙⴻⴽⵏⴻⵏ-ⴷ ⵜⵉⵔⵎⵉⵜⵉⵏ ⵏ ⴽⵔⴰ ⵏ ⵜⵍⴰⵡⵉⵏ ⵢⵓⴼⵔⴰⵔⴻⵏ. ⴱⵔⵓⴼⵉⵙⵓⵔ ⵍⵓⵢⵣⴰ ⴱⵓⴷⵉⴱⴰ, ⵙⴻⴳ ⵜⵙⴻⴷⴷⴰⵡⵉⵜ ⵏ ⵜⴱⴻⵙⵙⴰ, ⵜⴻⵙⵙⴻⵔⵙ 11 ⵏ ⵜⵓⴽⴽⵉⵡⵉⵏ ⵏ ⵓⵙⵏⵓⵍⴼⵓ , ⴳⴰⵔ-ⴰⵙⴻⵏⵜ ⵢⵉⵡⴻⵏ ⵡⴰⵍⴰⵍ ⵉ ⵓⵙⴰⵣⵣⴻⴳ ⵏ ⵡⴰⵎⴰⵏ ⵏ ⵢⵉⴼⵍⴰⵏ ⵢⴻⵔⵣⴰⴳⴻⵏ ⴱⵍⴰ ⴰⵙⴻⵇⴷⴻⵛ ⵏ ⵜⵔⵉⴽⵉⵜ. ⵎⴰ ⴷ ⵜⴰⵎⵓⵙⵏⴰⵡⵜ ⵏⴰⵄⵉⵎⴰ ⴱⴻⵏ ⵙⴰⵍⴻⵎ, ⵜⴻⵙⵏⵓⵍⴼⴰ-ⴷ ⵢⵉⵡⴻⵜ ⵏ ⵜⵉⵙⵙⵉⵜ ⵢⴻⵚⴼⴰⵏ ⵢⴻⵔⵏⴰ ⵢⴻⵛⵛⵓⵔⴻⵏ ⴷ ⵍⴼⴰⵢⴷⴰ ⵙⴻⴳ ⵓⵣⴻⵎⵎⵓⵔ ⴷ ⵜⵢⵉⵏⵉ, ⵢⴻⵔⵏⴰ ⵢⴻⴱⴷⴰ ⵢⴰⴽⴰ ⵓⴼⴰⵔⵉⵙ-ⵉⵙ ⴷⴻⴳ ⵍⵣⵣⴰⵢⴻⵔ.
ⵜⴰⴳⴳⴰⵔⴰ, ⵜⵉⵎⵍⵉⵍⵉⵜ-ⴰⴳⵉ ⵜⴻⵙⴽⴰⵏⴰⵢ-ⴷ ⴱⴻⵍⵍⵉ ⵜⵎⴻⵟⵟⵓⵜ ⵜⴰⵣⵣⴰⵢⵔⵉⵜ ⵜⴻⵟⵟⴻⴼ ⴰⵎⴽⴰⵏ-ⵉⵙ ⵓⵏⵚⵉⴱ ⴷⴻⴳ ⵓⴱⵔⵉⴷ ⵏ ⵓⵏⴻⴳⵎⵓ ⴰⴷⴰⵎⵙⴰⵏ ⴷ ⵓⵙⵊⴻⵀⴻⴷ ⵏ ⵜⵎⵓⵙⵏⵉ ⴷ ⵓⵙⵏⵓⵍⴼⵓ ⴷⴻⴳ ⵜⵎⵓⵔⵜ-ⵏⵏⴻⵖ.
ⴰⵔⵏⵓ ⵖⴻⵔ
