ⵍⵣⵣⴰⵢⴻⵔ ⵜⴰⵎⴰⵏⴻⵖⵜ – ⵢⴻⵙⵙⴻⵊⴷⴻⴷ ⵓⵏⵖⵍⴰⴼ ⵏ ⵜⵣⵎⴻⵔⵜ, ⵎⴰⵙⵙ ⵎⵓⵃⴰⵎⴻⴷ ⵚⴻⴷⴷⵉⵇ ⴰⵢⵜ ⵎⴻⵙⵄⵓⴷⴰⵏ, ⴱⴻⵍⵍⵉ ⴰⵃⵔⵉⵛ ⵏ ⵜⵣⵎⴻⵔⵜ ⵢⴻⵔⵔⴰ ⴰⴱⴻⴷⴷⴻⵍ ⵖⴻⵔ ⵓⵎⴹⴰⵏ ⴷ ⵜⴰⵣⵡⴰⵔⴰ ⵜⴰⵙⵜⵔⴰⵜⵉⵊⵉⵜ ⵉ ⵓⵔ ⵏⴻⵣⵎⵉⵔ ⴰⴷ ⵏⴻⵏⴽⴻⵔ. ⴰⵢⴰ ⵢⴻⵍⵍⴰ-ⴷ ⵉ ⵡⴰⴽⴽⴻⵏ ⴰⴷ ⵙⵏⴻⴼⵍⴰⵢⴻⵏ ⵍⴻⵇⴷⵉⵛ ⴰⵣⵎⴻⵔⴰⵏ, ⴰⴷ ⵢⵉⵍⵉ ⵍⵃⴻⵇⵇ ⴷ ⵜⴼⴰⵡⵜ ⴳⴰⵔ ⵢⵉⵖⴻⵔⴼⴰⵏ ⴷⴻⴳ ⵓⴷⴰⵡⵉ, ⵢⴻⵔⵏⴰ ⴰⴷ ⵜⵊⴻⵀⴻⴷ ⵜⵏⴻⵊⵊⴰⵃⵜ ⵏ ⵜⵎⴻⵔⵙⴻⵍⵉⵏ ⵏ ⵓⵡⴰⵏⴰⴽ.
ⴷⴻⴳ ⵢⵉⵡⴻⵏ ⵡⴰⵡⴰⵍ ⵉ ⴷ-ⵢⴻⵖⵔⴰ ⵓⵎⵙⴻⵍⵡⴰⵢ ⵏ ⵡⴰⵙⵉⵔⴰ ⵏ ⵜⵏⴻⵖⵍⴰⴼⵜ ⴷⴻⴳ ⵜⵉⵎⵍⵉⵍⵉⵜ ⵜⴰⵖⴻⵍⵏⴰⵡⵜ ⵖⴻⴼ ⵓⵙⵏⵓⵍⴼⵓ ⴷ ⵓⵙⴻⵎⴹⴻⵏ, ⴰⵏⵖⵍⴰⴼ ⵢⴻⵏⵏⴰ-ⴷ ⴱⴻⵍⵍⵉ ⵍⴻⵇⴷⵉⵛ ⴰⵣⵎⴻⵔⴰⵏ ⴰⴳⴷⵓⴷⴰⵏ ⵢⴻⵟⵟⴻⴼ ⴰⵎⴽⴰⵏ ⴰⵎⴻⵇⵇⵔⴰⵏ ⴷⴻⴳ ⵓⴱⵔⵉⴷ-ⴰⴳⵉ ⵏ ⵓⴱⴻⴷⴷⴻⵍ. ⵢⴻⵏⵏⴰ-ⴷ ⴱⴻⵍⵍⵉ ⵉⵖⵉⵍⵉⴼⴻⵏ ⵏ ⵜⵓⵔⴰ ⵙⵙⵓⵜⵓⵔⴻⵏ ⴰⵙⴻⵇⴷⴻⵛ ⵏ ⵓⵙⵏⵓⵍⴼⵓ ⴷ ⵓⵣⵣⴻⵔⴱ ⴷⴻⴳ ⵓⵙⴻⵎⴹⴻⵏ ⵉ ⵡⴰⴽⴽⴻⵏ ⴰⴷ ⵜⵊⴻⵀⴻⴷ ⵜⴻⴼⵍⴻⵙⵜ ⵏ ⵓⵎⴻⵣⴷⴰⵖ ⴷⴻⴳ ⵜⵎⴻⵔⵙⴻⵍⵉⵏ-ⵉⵙ.
ⵎⴰⵙⵙ ⴰⵢⵜ ⵎⴻⵙⵄⵓⴷⴰⵏ ⵢⴻⵙⴼⴻⵔⵔⴻⵯ-ⴷ ⴱⴻⵍⵍⵉ ⵜⴰⵏⴻⵖⵍⴰⴼⵜ ⵜⴻⵇⴷⴻⵛ ⵉ ⵡⴰⴽⴽⴻⵏ ⴰⴷ ⵜⴻⴱⵏⵓ ⵢⵉⵡⴻⵜ ⵏ ⵜⵎⵓⵖⵍⵉ ⵢⴻⴷⴷⵓⴽⴽⵍⴻⵏ ⵏ ⵜⵣⵎⴻⵔⵜ ⵜⴰⵎⴹⴰⵏⵜ. ⴰⵢⴰ ⵢⴻⴱⵏⴰ ⵖⴻⴼ ⵓⵇⵇⴻⵏ ⵏ ⵜⵎⴻⵔⵙⴻⵍⵉⵏ ⵏ ⵜⵣⵎⴻⵔⵜ ⵖⴻⵔ ⵓⵥⴻⵟⵟⴰ ⴰⵖⴻⵍⵏⴰⵡ ⵙ ⵜⵎⵓⵙⵏⵉ ⵏ ⵜⴼⴰⵡⵜ, ⵙ ⵓⵎⵢⴻⵍⵍⴻⵍ ⴷ "ⵜⴻⵢⵡⴰⵍⵉⵏ ⵏ ⵍⵣⵣⴰⵢⴻⵔ". ⴰⴷ ⴷ-ⵢⵉⵍⵉ ⴷⴰⵖⴻⵏ ⵓⵙⵏⴻⴼⵍⴰⵢ ⵏ ⵜⴱⵓⵔⵜⵉⵏ ⵜⵉⵎⴹⴰⵏⵉⵏ ⵉ ⵡⴰⴽⴽⴻⵏ ⴰⴷ ⵙⵙⵉⵙⵀⴻⵍⴻⵏ ⵍⴻⵇⴷⵉⵛ ⴷ ⵓⵎⵢⴻⵍⵍⴻⵍ ⵙ ⵜⴼⴰⵡⵜ ⴷ ⵜⵏⴻⵊⵊⴰⵃⵜ.
ⵢⴻⵔⵏⴰ-ⴷ ⵓⵏⵖⵍⴰⴼ ⴱⴻⵍⵍⵉ ⵢⵉⴼⴰⵢⵍ ⴰⵣⵎⴻⵔⴰⵏ ⴰⵎⴹⴰⵏ ⴷ ⵜⴰⵔⵉⵛⵜ ⵉⵊⴻⵀⴷⴻⵏ ⵏ ⵡⴰⵏⴰⴳⵔⴰⵡ-ⴰⴳⵉ. ⴰⴷ ⵢⴻⵊⵊ ⴰⵃⴰⴷⴰⵔ ⵏ ⵢⵉⵙⴰⵍⵍⴻⵏ ⵏ ⵢⵉⵎⵓⴹⴰⵏ ⴷⴻⴳ ⵢⵉⵡⴻⵏ ⵡⴰⵎⵎⴰⵙ ⵏ ⵢⵉⵙⴰⵍⵍⴻⵏ ⵢⴻⴹⵎⵏⴻⵏ, ⵉ ⵡⴰⴽⴽⴻⵏ ⴰⴷ ⵅⴹⵓⵏ ⵉ ⵓⵄⴰⵡⴻⴷ ⵏ ⵓⵏⴰⴷⵉ ⴷ ⵓⵙⴻⴼⵔⴻⵯ ⵏ ⵢⵉⴷⴰⵎⵎⴻⵏ ⵢⴻⵔⵏⴰ ⴰⴷ ⵙⵙⵉⵙⵀⴻⵍⴻⵏ ⴰⴹⴰⴼⴻⵔ ⵏ ⵜⵣⵎⴻⵔⵜ ⵏ ⵓⵎⵓⴹⴰⵏ ⴷ ⵓⵟⵟⴼⵓ ⵏ ⵡⴰⴽⵓⴷ ⵏ ⵓⴷⴰⵡⵉ ⵙ ⵜⵖⴰⵡⵍⴰ.
ⴰⵎ ⵢⴻⴽⴽⴰ ⵍⵇⴰⴷ, ⴰⴷ ⴷ-ⵢⵉⵍⵉ ⵓⵙⴻⵇⴷⴻⵛ ⵏ ⵓⵥⴻⵟⵟⴰ ⴰⵖⴻⵍⵏⴰⵡ ⵏ ⵜⴱⵓⵔⵜⵉⵏ ⵜⵉⵎⴹⴰⵏⵉⵏ ⵉ ⵡⴰⴽⴽⴻⵏ ⴰⴷ ⵡⴰⵍⵉⵏ ⴰⴼⵔⴰⵢ ⵏ ⵢⵉⵙⴰⴼⴰⵔⴻⵏ, ⴰⵙⴻⴳⴳⴻⵎ ⵏ ⵡⴰⵍⴰⵜⴻⵏ ⵏ ⵓⴷⴰⵡⵉ ⴷ ⵓⵃⴰⴷⴰⵔ ⵏ ⵢⵉⵎⵓⴹⴰⵏ ⵙ ⵓⵙⴻⴼⵔⴻⵯ ⵏ ⵢⵉⵖⴻⵙ. ⴰⵏⵖⵍⴰⴼ ⵢⴻⵏⵏⴰ-ⴷ ⴱⴻⵍⵍⵉ ⴰⴷ ⴷ-ⵙⵙⵓⴼⵖⴻⵏ ⵡⴰⵍⴰⵜⴻⵏ ⵏ ⵓⵎⴹⴰⵏ ⵉ ⵡⴰⴽⴽⴻⵏ ⴰⵎⴻⵣⴷⴰⵖ ⴰⴷ ⵢⴻⵥⴻⵔ ⵢⵉⴼⴰⵢⵍ-ⵉⵙ ⵢⴻⵔⵏⴰ ⴰⴷ ⵢⴻⵟⵟⴻⴼ ⴰⵣⵎⴻⵣ ⵏ ⵓⴷⴰⵡⵉ ⵙⴻⴳ ⵡⴰⴳⴳⵓⴳ , ⵍⴰⴷⵯⴰ ⵉ ⵢⵉⵎⴻⵣⴷⴰⵖ ⵏ ⵜⴻⵎⵏⴰⴹⵉⵏ ⵢⴻⴱⵄⴻⴷⴻⵏ.
ⴷⴻⴳ ⵓⵃⵔⵉⵛ-ⴰⴳⵉ ⴷⴰⵖⴻⵏ, ⵡⴻⵊⵊⴷⴻⵏ ⴰⴷ ⵍⴷⵉⵏ ⵜⵉⴱⵓⵔⵜⵉⵏ ⵏ ⵓⴷⴰⵡⵉ ⵙⴻⴳ ⵡⴰⴳⴳⵓⴳ ⴷ ⵓⵙⴻⴼⵔⴻⵯ ⵏ ⵢⵉⵖⴻⵙ ⵙ ⵜⴰⵎⵓⵙⵏⵉ ⵜⵓⵙⵏⵉⵍⴼⵜ. ⴰⵢⴰ ⴰⴷ ⵢⴻⵙⵏⴻⵇⴻⵙ ⵍⴱⴰⵟⴻⵍ ⴷ ⵓⵄⵔⴰⵇ ⴷⴻⴳ ⵓⴷⴰⵡⵉ ⵢⴻⵔⵏⴰ ⴰⴷ ⵢⴻⴼⴽ ⵜⴰⵣⵎⴻⵔⵜ ⵉ ⵓⵃⴰⴷⴰⵔ ⵢⴻⵍⵀⴰⵏ ⵏ ⵢⵉⵎⵓⴹⴰⵏ.
ⵜⴰⴳⴳⴰⵔⴰ, ⴰⵏⵖⵍⴰⴼ ⵢⴻⵛⴽⴻⵔ ⵜⴰⵍⵍⴻⵍⵜ ⵉ ⴷ-ⵜⴻⴼⴽⴰ ⵜⵏⴻⴱⴷⴰⴷⵜ ⵜⵓⵏⵏⵉⵖⵜ ⵏ ⵓⵙⴻⵎⴹⴻⵏ. ⵢⴻⵏⵏⴰ-ⴷ ⴱⴻⵍⵍⵉ ⵊⴻⵔⴷⴻⵏ ⵜⴰⵎⴰⵖⵓⵏⵜ ⵉ ⵓⵙⴻⵇⵇⴻⵏ ⵏ 2599 ⵏ ⵜⵎⴻⵔⵙⴻⵍⵉⵏ ⵏ ⵜⵣⵎⴻⵔⵜ ⵙ ⵓⵥⴻⵟⵟⴰ ⵏ ⵜⴼⴰⵡⵜ. ⵉⵙⵡⵉ ⴰⵎⴻⵇⵇⵔⴰⵏ ⴷ ⴰⵙⴱⴻⴷⴷ ⵏ ⵢⵉⵡⴻⵏ ⵡⴰⵏⴰⴳⵔⴰⵡ ⴰⵣⵎⴻⵔⴰⵏ ⴰⵎⵓⵙⵏⴰⵡ (smart) ⵢⴻⴱⵏⴰⵏ ⵖⴻⴼ ⵓⵙⴻⵇⴷⴻⵛ ⵏ ⵢⵉⵙⴰⵍⵍⴻⵏ ⴷⴻⴳ ⵓⵏⴰⴷⵉ ⵓⵙⵙⵏⴰⵏ ⴷ ⵓⵃⴰⴷⴰⵔ ⵎⴳⴰⵍ ⵡⴰⵟⵟⴰⵏⴻⵏ ⵢⴻⵜⵜⴳⴻⵎⵎⵉⵏ.
ⴰⵔⵏⵓ ⵖⴻⵔ
