ⵜⴻⵜⵜⵡⴻⴽⴻⵍⵍⴻⵍ ⵜⴻⵍⵖⵓⵖⵜ ⵜⵓⵍⴰⵎⵒⵉⵜ ⵜⴰⵣⵣⴰⵢⵔⵉⵜ ⴽⴰⵢⵍⵉⵢⴰ ⵏⴻⵎⵎⵓⵔ, ⴰⵙⵙ-ⴰ ⵏ ⵍⵃⴻⴷ, ⵙ ⵜⵎⵉⴷⴰⵍⵢⵉⵜ ⵏ ⵍⴼⴻⵟⵟⴰ ⴷⴻⴳ ⵓⵃⵔⵉⵛ ⵏ ⵓⴼⴻⵊⴰⵊ ⵏ ⵜⴻⴳⴷⵓⵜ, ⴳⴰⵔ ⵜⴻⵎⵣⵉⵣⵡⴰ ⵏ ⵓⵃⵔⵉⵛ ⵡⵉⵙ ⵙⵉⵏ ⵏ ⵜⴻⵇⴱⵓⵛⵜ ⵏ ⵓⵎⴰⴹⴰⵍ ⵏ ⵍⵊⵉⵎⴱⴰⵣ ⴰⵏⴰⵥⵓⵔ, ⵉ ⴷ-ⵢⴻⵍⵍⴰⵏ ⵜⵓⵔⴰ ⴷⴻⴳ ⵜⴻⵎⴷⵉⵏⵜ ⵏ ⴱⴰⴽⵓ ⴷⴻⴳ ⴰⵣⴻⵔⴱⴰⵢⴵⴰⵏ.
ⵜⴻⵡⵡⵉ-ⴷ ⵜⴰⵣⵣⴰⵢⵔⵉⵜ ⵜⵉⵛⵔⴻⵟ 13.800 ⴷⴻⴼⴼⵉⵔ ⵜⵢⴰⵒⴰⵏⵉⵜ ⵓⴽⴰⵎⵓⵔⴰ ⵎⴰⵏⴰ (14.133) ⵉ ⴷ-ⵢⴻⵡⵡⵉⵏ ⵜⴰⵎⵉⴷⴰⵍⵢⵉⵜ ⵏ ⵡⵓⵔⴻⵖ, ⵢⴻⵔⵏⴰ ⵜⴻⵣⵡⴰⵔ-ⴷ ⵜⴰⵢⴰⵒⴰⵏⵉⵜ-ⵏⵏⵉⴹⴻⵏ ⵎⵉⵢⴰⵜⴰ ⵛⵓⴽⵓ (13.533), ⵉ ⴷ-ⵢⴻⵡⵡⵉⵏ ⵜⴰⵎⵉⴷⴰⵍⵢⵉⵜ ⵏ ⵓⴱⵔⵓⵏⵣ.
ⵢⴰⴽⴰⵏ ⵏⴻⵎⵎⵓⵔ ⵜⴻⵡⵡⵉ-ⴷ ⵉⴹⴻⵍⵍⵉ ⵏ ⵙⵙⴻⴱⵜ ⵜⴰⵎⵉⴷⴰⵍⵢⵉⵜ ⵏ ⵡⵓⵔⴻⵖ, ⴷⴻⴳ ⵓⵃⵔⵉⵛ ⵏ ⵢⵉⴼⴻⵊⴰⵊⴻⵏ ⵉⵎⵙⴰⴷⴰⵖⴻⵏ ⵢⴻⵎⴳⴰⵔⴰⴷⴻⵏ ⴷⴻⴳ ⵜⴻⵖⵣⵉ, ⴷⴻⴼⴼⵉⵔ ⵎⵉ ⴷ-ⵜⴻⵡⵡⵉ ⵜⵉⵛⵔⴻⵟ 15.233, ⴷⴻⴳ ⵜⴰⴳⴰⵔⴰ, ⵙ ⵡⴻⵙⵡⵉⵔ ⵏ ⵜⴻⵡⵄⴻⵔⵜ ⵢⴻⵡⵡⴹⴻⵏ ⵖⴻⵔ 7.0, ⴷ ⵜⴻⵛⵔⴻⵟ ⵏ ⵓⵙⴻⵍⴽⴻⵎ ⵢⴻⵜⵜⵡⴰⵇⴻⴷⴷⵔⴻⵏ ⵙ 8.233.
ⵜⴻⵜⵜⵡⴰⵃⵙⴰⴱ ⵜⵜⴻⴽⴽⵉ-ⵢⴰ ⴷ ⴰⵎⴹⵉⵇ ⴰⵎⴰⵢⵏⵓⵜ ⵉ ⵜⴻⵎⵢⵓⵔⴰⵔⵜ ⵏ ⵍⵊⵉⵎⴱⴰⵣ ⵜⴰⵣⵣⴰⵢⵔⵉⵜ ⴷⴻⴳ ⵜⴻⵎⵣⵉⵣⵡⴰ ⵏ ⵜⴻⵇⴱⵓⵛⵜ ⵏ ⵓⵎⴰⴹⴰⵍ, ⴷⴻⴼⴼⵉⵔ ⵓⵃⵔⵉⵛ ⴰⵎⴻⵣⵡⴰⵔⵓ ⵉ ⴷ-ⵢⴻⵍⵍⴰⵏ ⴷⴻⴳ ⵜⴻⵎⴷⵉⵏⵜ ⵏ ⴽⵓⵜⴱⵓⵙ ⴷⴻⴳ ⵍⴰⵍⵎⴰⵏ ⴷⴻⴳ ⵡⴰⴳⴳⵓⵔ ⵏ ⴼⵓⵔⴰⵔ ⵢⴻⵣⵔⵉⵏ, ⴰⵏⴷⴰ ⵉ ⵜⴻⵙⵙⴰⵡⴻⴹ ⴰⴷ ⴷ-ⵜⴻⵡⵡⵉ ⵜⴰⵎⵉⴷⴰⵍⵢⵉⵜ ⵏ ⵍⴼⴻⵟⵟⴰ ⴷⴻⴳ ⵓⵃⵔⵉⵛ ⵏ ⵓⴼⴻⵊⴰⵊ ⵏ ⵜⴻⴳⴷⵓⵜ.
ⵜⴻⵜⵜⴻⴽⴽⵉ ⴷⴰⵖⴻⵏ ⴷⴻⴳ ⵓⵃⵔⵉⵛ-ⴰ ⵜⴻⵎⵢⵓⵔⴰⵔⵜ ⵏ ⵍⵊⵉⵎⴱⴰⵣ ⵜⴰⵣⵣⴰⵢⵔⵉⵜ ⵜⵉⵍⴻⵎⵥⵉⵜ ⵍⵓⵏⴰ ⵃⴻⵎⵎⴰⵎⴻⵙ, ⵢⴻⵙⵄⴰⵏ 19 ⵏ ⵢⵉⵙⴻⴳⴳⴰⵙⴻⵏ ⴷⴻⴳ ⵍⴻⵄⵎⴻⵔ-ⵉⵙ, ⵢⴻⵔⵏⴰ ⵜⵜⵓⵔⴰⵔ ⴷⴻⴳ ⵜⴰⵔⴱⴰⵄⵜ ⵏ ⵀⵉⵢⵉⵔ (Hyères) ⴷⴻⴳ ⴼⵔⴰⵏⵙⴰ, ⴷⴻⴳ ⵢⵉⵡⴻⵜ ⵏ ⵜⵉⵔⵎⵉⵜ ⵢⴻⵙⵄⴰⵏ ⵉⵙⵡⵉ ⴷ ⴰⵙⵏⴻⵔⵏⵉ ⵏ ⵜⵎⵓⵙⵏⵉ ⴷ ⵓⵙⴱⴻⴳⴳⴻⵏ ⵏ ⵓⵏⴻⵔⵏⵉ ⵏ ⵍⵊⵉⵎⴱⴰⵣ ⴰⵣⵣⴰⵢⵔⵉ ⴷⴻⴳ ⵓⵏⵏⴰⵔ ⴰⴳⵔⴰⵖⵍⴰⵏ.
ⴷⴻⴼⴼⵉⵔ ⵓⵃⵔⵉⵛ ⵡⵉⵙ ⵙⵉⵏ ⴷⴻⴳ ⴱⴰⴽⵓ, ⴰⴷ ⵜⴽⴻⵎⵎⴻⵍ ⵜⴻⵎⵣⵉⵣⵡⴻⵍⵜ ⴷⴻⴳ ⴰⵏⵟⴰⵍⵢⴰ ⴷⴻⴳ ⵜⵓⵔⴽⵉⵢⵢⴰ, ⵙⵢⵉⵏ ⴷⴻⴳ ⵍⵇⴰⵀⵉⵔⴰ ⴷⴻⴳ ⵎⴰⵚⴻⵔ, ⴰⴽⴽ ⴷ ⵓⵙⵉⵢⴻⴽ ⴷⴻⴳ ⴽⵔⵡⴰⵜⵉⵢⴰ, ⵓⵇⴱⴻⵍ ⴰⴷ ⵜⴻⴽⴼⵓ ⴷⴻⴳ ⴷⴷⵓⵃⴰ ⴷⴻⴳ ⵇⴰⵟⴰⵔ ⴳⴰⵔ 14 ⴷ 18 ⵢⴻⴱⵔⵉⵔ.
ⵖⴻⴼ ⵍⴻⵃⵙⴰⴱ ⵏ ⵜⵉⴷⴷⵓⴽⵍⴰ ⵜⴰⴳⵔⴰⵖⵍⴰⵏⵜ ⵏ ⵍⵊⵉⵎⴱⴰⵣ, ⵉⵍⵖⵓⵖⴻⵏ ⵢⵓⵍⴰⵎⵒⵉⵢⴻⵏ ⴰⵎ ⴽⴰⵢⵍⵉⵢⴰ ⵏⴻⵎⵎⵓⵔ, ⵔⵉⵙ ⵎⴰⴽⵍⵉⵏⴰⵖⴰⵏ (ⵉⵔⵍⴰⵏⴷⴰ) ⴷ ⵢⵉⵍⵉⴼⵜⵉⵔⵢⵓⵙ ⵒⵉⵜⵔⵓⵏⵢⴰⵙ (ⵍⴻⴳⵔⵉⴽ), ⵜⵜⵡⴰⵃⵙⴰⴱⴻⵏ ⴷ ⵡⵉⴷ ⵢⴻⵜⵜⴻⴽⴽⴰⵏ ⵉ ⵢⵓⴼⵔⴰⵔⴻⵏ ⴰⵟⴰⵙ ⴷⴻⴳ ⵓⵃⵔⵉⵛ ⵏ ⵜⴻⵇⴱⵓⵛⵜ ⵏ ⵓⵎⴰⴹⴰⵍ ⴷⴻⴳ ⴱⴰⴽⵓ ⵙ ⵜⵉⵍⵉⵏ ⵏ ⵜⴻⴳⵔⴰⵡⵜ ⵏ ⵢⵉⵜⵔⴰⵏ, ⴰⵢⴻⵏ ⴷ-ⵢⴻⵜⵜⴰⴽⴽⴻⵏ ⵜⵉⵎⵣⵉⵣⵡⴻⵍⵜ ⵏ ⵡⴻⵙⵡⵉⵔ ⵄⵍⴰⵢⴻⵏ.
ⴰⵔⵏⵓ ⵖⴻⵔ
