ⵍⵣⵣⴰⵢⴻⵔ ⵜⴰⵎⴰⵏⴻⵖⵜ – ⵢⴻⵙⵜⴻⵇⴱⴻⵍ ⵓⵏⵖⵍⴰⴼ ⵏ ⵜⵣⵎⴻⵔⵜ, ⵎⵓⵃⴰⵎⴻⴷ ⵚⴻⴷⴷⵉⵇ ⴰⵢⵜ ⵎⴻⵙⵄⵓⴷⴰⵏ, ⴰⵙⵙ-ⴰ ⵏ ⵜⵜⵍⴰⵜⴰ ⴷⴻⴳ ⵍⵣⵣⴰⵢⴻⵔ ⵜⴰⵎⴰⵏⴻⵖⵜ, ⴰⵏⵖⵍⴰⴼ ⵏ ⵜⵣⵎⴻⵔⵜ ⵏ ⵜⵓⵏⴻⵙ, ⵎⵓⵚⵟⴰⴼⴰ ⵍⴼⴻⵔⵊⴰⵏⵉ. ⴷⴻⴳ ⵜⵎⵍⵉⵍⵉⵜ-ⴰⴳⵉ, ⵙⵙⴰⵡⵍⴻⵏ ⵖⴻⴼ ⵢⵉⴱⵔⵉⴷⴻⵏ ⵏ ⵓⵙⵊⴻⵀⴻⴷ ⵏ ⵜⵎⴷⵓⴽⴽⵍⵉ ⴷ ⵓⵎⵢⴻⵍⵍⴻⵍ ⴳⴰⵔ ⵙⵏⴰⵜ ⵏ ⵜⵎⵓⵔⴰ ⴷⴻⴳ ⵓⵃⵔⵉⵛ ⵏ ⵜⵣⵎⴻⵔⵜ.
ⵜⵉⵎⵍⵉⵍⵉⵜ-ⴰⴳⵉ ⵜⴻⵍⵍⴰ-ⴷ ⴷ ⵜⴰⴳⵏⵉⵜ ⵉ ⵡⴰⴽⴽⴻⵏ ⴰⴷ ⴷ-ⴰⴷⵔⴻⵏ ⴰⵃⴰⴷⴰⵔ ⵏ ⵢⵉⵎⵓⴹⴰⵏ, ⴰⵙⴻⴳⴳⴻⵎ ⵏ ⵡⴰⵏⴰⴳⵔⴰⵡⴻⵏ ⵏ ⵜⵣⵎⴻⵔⵜ ⴷ ⵓⵙⵉⵍⴻⵖ ⵏ ⵢⵉⵅⴻⴷⴷⴰⵎⴻⵏ. ⵙⵙⴰⵡⵍⴻⵏ ⴷⴰⵖⴻⵏ ⵖⴻⴼ ⵓⵏⴰⴷⵉ ⵓⵙⵙⵏⴰⵏ, ⴰⵙⵏⵓⵍⴼⵓ ⴷ ⵡⴰⵎⴻⴽ ⴰⵔⴰ ⵇⴰⴱⵍⴻⵏ ⵢⵉⵖⵉⵍⵉⴼⴻⵏ ⵏ ⵜⵣⵎⴻⵔⵜ ⵏ ⵜⵓⵔⴰ ⴷ ⵡⵉⴷ ⵏ ⵢⵉⵎⴰⵍ.
ⵢⵉⵏⵖⵍⴰⴼⴻⵏ ⵡⴰⵍⴰⵏ ⴷⴰⵖⴻⵏ ⴰⵎⴻⴽ ⴰⵔⴰ ⵙⵙⴻⵎⵖⴻⵔⵏ ⴰⵎⵢⴻⵍⵍⴻⵍ-ⴰⴳⵉ ⵙ ⵡⴰⵀⵉⵍⴻⵏ ⵢⴻⴷⴷⵓⴽⴽⵍⴻⵏ ⴳⴰⵔ ⵜⵎⴻⵔⵙⴻⵍⵉⵏ ⵏ ⵜⵣⵎⴻⵔⵜ ⵏ ⵙⵏⴰⵜ ⵏ ⵜⵎⵓⵔⴰ ⵉ ⵡⴰⴽⴽⴻⵏ ⴰⴷ ⵢⴻⵍⵍⵉ ⵍⴻⵇⴷⵉⵛ ⴷ ⴰⵢⴻⵏ ⵢⴻⵍⵀⴰⵏ ⵉ ⵢⵉⵎⴻⵣⴷⴰⵖ.
ⴷⴻⴳ ⵢⵉⵡⴻⵏ ⵡⴰⵡⴰⵍ ⵉ ⵢⵉⵙⴰⵍⵍⴻⵏ, ⵎⴰⵙⵙ ⴰⵢⵜ ⵎⴻⵙⵄⵓⴷⴰⵏ ⵢⴻⵏⵏⴰ-ⴷ ⴱⴻⵍⵍⵉ ⵜⵓⵣⵣⵢⴰ-ⴰⴳⵉ ⵜⴻⵙⴽⴰⵏⴰⵢ-ⴷ ⵍⴻⴱⵖⵉ ⵏ ⵙⵏⴰⵜ ⵏ ⵜⵎⵓⵔⴰ ⴰⴽⴽⴻⵏ ⴰⴷ ⵙⵊⴻⵀⴷⴻⵏⵜ ⴰⵎⵢⴻⵍⵍⴻⵍ-ⴰⴳⵉ ⴷⴻⴳ ⵓⵃⵔⵉⵛ ⵏ ⵜⵣⵎⴻⵔⵜ, ⵉ ⵢⴻⵍⵍⴰ ⴷ ⵜⴰⵔⵉⵛⵜ ⵏ ⵓⵏⴻⴳⵎⵓ ⴷ ⵍⴰⵎⴰⵏ ⵏ ⵢⵉⵖⴻⵔⴼⴰⵏ ⵉⵎⴰⵣⵓⵣⴻⵏ. ⵢⴻⵏⵏⴰ-ⴷ ⴷⴰⵖⴻⵏ ⴱⴻⵍⵍⵉ ⵜⵉⵎⴷⵓⴽⴽⵍⵉ-ⴰⴳⵉ ⵜⴻⴱⵏⴰ ⵖⴻⴼ ⵍⴻⴱⵖⵉ ⵉⵊⴻⵀⴷⴻⵏ ⵏ ⵓⵙⴻⵍⵡⴰⵢ ⵄⴻⴱⴷⵓⵍⵎⴻⵊⵉⴷ ⵜⴻⴱⴱⵓⵏ ⴷ ⵓⵙⴻⵍⵡⴰⵢ ⵇⴰⵢⴻⵙ ⵙⴰⵄⵉⴷ.
ⵙⴻⴳ ⵍⵊⵉⵀⴰ-ⵙ, ⵎⴰⵙⵙ ⵍⴼⴻⵔⵊⴰⵏⵉ ⵢⴻⴼⴽⴰ ⴰⵣⴰⵍ ⵉ ⵜⵎⵍⵉⵍⵉⵜ-ⴰⴳⵉ ⵉ ⵢⴻⵙⴽⴰⵏⴰⵢⴻⵏ ⴰⵎⵢⴻⵍⵍⴻⵍ ⴰⵙⵜⵔⴰⵜⵉⵊⵉ. ⵢⴻⵏⵏⴰ-ⴷ ⴱⴻⵍⵍⵉ ⵢⴻⵍⵀⴰ ⴰⴷ ⴷⴷⵓⴽⴽⵍⴻⵏ ⵉ ⵡⴰⴽⴽⴻⵏ ⴰⴷ ⵇⴰⴱⵍⴻⵏ ⵢⵉⵖⵉⵍⵉⴼⴻⵏ ⵏ ⵜⵣⵎⴻⵔⵜ ⵢⴻⵔⵏⴰ ⴰⴷ ⵇⴻⵔⵔⴱⴻⵏ ⵍⴻⵇⴷⵉⵛ ⴰⵣⵎⴻⵔⴰⵏ ⵖⴻⵔ ⵢⵉⵎⴻⵣⴷⴰⵖ.
ⵜⴰⴳⴳⴰⵔⴰ, ⵢⵉⵏⵖⵍⴰⴼⴻⵏ ⵔⵣⴰⵏ ⵖⴻⵔ ⵡⴰⵎⵎⴰⵙ ⴰⵙⴳⵏⴰⴼ ⵜⴰⵙⴻⴷⴷⴰⵡⵉⵜ "ⵎⵓⵃⴰⵎⴻⴷ ⵍⵎⵉⵏ ⴷⴻⴱⴱⴰⵖⵉⵏ" ⴷⴻⴳ ⵜⴰⵎⴰⵏⴻⵖⵜ. ⵡⴰⵍⴰⵏ ⴰⵎⴻⴽ ⵉⵜⴻⴷⴷⵓ ⵍⴻⵇⴷⵉⵛ ⴷⴻⴳ ⵓⵃⵔⵉⵛ ⵏ ⴰⵟⵟⴰⵏ ⴰⵎⴻⵇⵇⵔⴰⵏ ⵏ ⵡⴰⵔⵔⴰⵡ, ⴰⵙⴻⴼⵔⴻⵯ ⵏ ⵢⵉⵖⴻⵙ, ⴷ ⵓⵃⴰⴷⴰⵔ ⵏ ⵓⵙⴻⴳⴳⴻⵏ ⴷ ⵓⵙⵉⴷⴷⴻⵔ. ⴼⴽⴰⵏ-ⴰⵙⴻⵏ ⵢⵉⵙⴻⴼⵔⴻⵯⵏ ⵖⴻⴼ ⵜⵎⵓⵙⵏⵉ ⵏ ⵍⵣⵣⴰⵢⴻⵔ ⴷⴻⴳ ⵓⵃⵔⵉⵛ-ⴰⴳⵉ.
ⴰⵔⵏⵓ ⵖⴻⵔ
