ⴰⴷⵉⵙ ⴰⴱⴰⴱⴰ (ⵉⵜⵢⵓⴱⵢⴰ) – ⵢⴻⵇⴷⴻⵛ ⵓⵏⵖⵍⴰⴼ ⵏ ⵜⴷⴰⵎⵙⴰ ⵏ ⵜⵎⵓⵙⵏⵉ, ⵜⵉⵎⴻⵔⵙⴻⵍⵉⵏ ⵜⵉⵎⴰⵢⵏⵓⵜⵉⵏ ⴷ ⵜⵉⵎⴻⵔⵙⴻⵍⵉⵏ ⵜⵉⵎⴻⵥⵢⴰⵏⵉⵏ, ⵎⴰⵙⵙ ⵏⵓⵔⴻⴷⴷⵉⵏ ⵡⴰⴹⴻⵃ, ⴷⴻⴳ ⵜⵉⵎⵍⵉⵍⵉⵜ ⵜⵓⵏⵏⵉⴳⵜ ⵏ ⵓⴳⵔⴰⵡ ⴰⴼⵔⵉⵇⵉ ⵏ ⵢⵉⵎⴻⵙⴽⴰⵔⴻⵏ ⵏ ⵜⴷⴰⵎⵙⴰ (2026 ABF) ⵉ ⴷ-ⵜⴻⴳⴳⴰ ⵜⵙⴻⵇⵇⴰⵎⵓⵜ ⵜⴰⴷⴰⵎⵙⴰⵏⵜ ⵏ ⵢⵉⵖⵍⴰⵏⴻⵏ ⵢⴻⴷⴷⵓⴽⵍⴻⵏ ⵉ ⵜⴼⵔⵉⵇⵜ. ⴰⵢⴰ ⵉ ⴷ-ⵢⴻⵏⵏⴰ ⵡⴰⵍⵖⵓ ⵏ ⵜⵏⴻⵖⵍⴰⴼⵜ ⴰⵙⵙ-ⴰ ⵏ ⵜⵜⵍⴰⵜⴰ.
ⴷⴻⴳ ⵜⵉⴳⵏⵉⵜ-ⴰⴳⵉ, ⴰⵏⵖⵍⴰⴼ ⵢⴻⵙⵙⴻⵊⴷⴻⴷ ⴱⴻⵍⵍⵉ ⵢⴻⵍⵀⴰ ⵉ ⵜⵎⴻⵏⵣⵓⵜ ⵏ ⵜⴼⵔⵉⵇⵜ ⴰⴷ ⵜⴻⴼⴼⴻⵯ ⵙⴻⴳ ⵓⵣⴻⵏⵣⵉ ⵏ ⵜⵔⴻⵣⵡⴰ ⵜⴰⵎⴻⵣⵡⴰⵔⵓⵜ ⵖⴻⵔ ⵓⵅⴻⵍⵍⴰⵇ ⵏ ⵡⴰⵜⵉⴳ ⵓⵏⵏⵉⴳ. ⵢⴻⵏⵏⴰ-ⴷ ⴱⴻⵍⵍⵉ ⴰⵢⴰ ⴰⴷ ⵢⵉⵍⵉ ⵙ ⵓⵙⵊⴻⵀⴻⴷ ⵏ ⵓⵙⵓⵎⴻⵔ, ⴰⵙⵏⵓⵍⴼⵓ ⴷ ⵓⵙⴻⴽⵛⴻⵎ ⵏ ⵜⵜⴻⴽⵏⵓⵍⵓⵊⵢⴰ ⵜⴰⵎⴰⵢⵏⵓⵜ ⴷⴻⴳ ⵎⴰⵕⵕⴰ ⵢⵉⵃⵔⵉⵛⴻⵏ ⵏ ⵜⴷⴰⵎⵙⴰ.
ⵎⴰⵙⵙ ⵡⴰⴹⴻⵃ ⵢⴻⵙⴼⴻⵔⵔⴻⵯ-ⴷ ⴱⴻⵍⵍⵉ ⵢⵉⵍⵎⴻⵣⵢⴻⵏ ⴷ ⵏⵉⵜⵏⵉ ⵉ ⵢⴻⵍⵍⴰⵏ ⴷ ⵜⵔⴻⵣⵡⴰ ⵜⴰⵎⴻⵇⵇⵔⴰⵏⵜ ⵏ ⵜⴼⵔⵉⵇⵜ. ⵢⴻⵙⵙⵓⵜⵓⵔ ⴰⵙⵊⴻⵀⴻⴷ ⵏ ⵓⵎⵢⴻⵍⵍⴻⵍ ⴳⴰⵔ ⵜⵎⵓⵔⴰ ⵏ ⵜⴼⵔⵉⵇⵜ ⵙ ⵓⵙⴻⵇⴷⴻⵛ ⵏ ⵡⴰⵍⴰⵜⴻⵏ ⴷ ⵜⵉⴼⵔⴰⵜⵉⵏ ⵉ ⴷ-ⵢⴻⴼⴼⵖⴻⵏ ⵙⴻⴳ ⴽⵓⵣ (04) ⵏ ⵜⵙⵓⵜⵍⵉⵏ ⵢⴻⵣⵔⵉⵏ ⵏ ⵓⴳⵔⴰⵡ ⴰⴼⵔⵉⵇⵉ ⵏ ⵜⵎⴻⵔⵙⴻⵍⵉⵏ ⵜⵉⵎⴰⵢⵏⵓⵜⵉⵏ (African Startup Conference).
ⴰⵏⵖⵍⴰⴼ ⵢⴻⵙⵙⵉⵡⴻⵍ-ⴷ ⴷⴰⵯⴻⵏ ⵖⴻⴼ ⵡⴰⵣⴰⵍ ⵏ ⵓⵙⵊⴻⵀⴻⴷ ⵏ ⵓⵥⴻⵟⵟⴰ ⵏ ⵓⵙⴻⵎⴹⴻⵏ. ⵢⴻⵏⵏⴰ-ⴷ ⴱⴻⵍⵍⵉ ⵢⴻⵍⵀⴰ ⴰⴷ ⵜⴻⵔⵔ ⵜⴼⵔⵉⵇⵜ ⵜⴰⵢⵏⵉⵜ ⵜⴰⵎⴻⵇⵇⵔⴰⵏⵜ ⵉ ⵜⴰⵎⵓⵙⵏⵉ ⵜⵓⵙⵏⵉⵍⴼⵜ (AI) ⴷ ⵜⵜⴻⴽⵏⵓⵍⵓⵊⵢⴰ ⵏ ⵜⴼⵍⴰⵃⵜ, ⴰⵢⴰ ⵉ ⵡⴰⴽⴽⴻⵏ ⴰⴷ ⵜⴻⴹⵎⴻⵏ ⵜⵎⵓⵔⵜ ⵍⴰⵎⴰⵏ ⵏ ⵓⵜⵛⵉⵜ ⵢⴻⵔⵏⴰ ⴰⴷ ⴷ-ⵢⵉⵍⵉ ⵓⵏⴻⴳⵎⵓ ⵓⵔⴰⵙⵡⴰⵢ ⴷⴻⴳ ⵜⵎⴻⵏⵣⵓⵜ.
ⵜⴰⴳⴳⴰⵔⴰ, ⵜⵉⵎⵍⵉⵍⵉⵜ-ⴰⴳⵉ ⵜⴻⵍⵍⴰ-ⴷ ⴷ ⵜⴰⴳⵏⵉⵜ ⵉ ⵡⴰⴽⴽⴻⵏ ⴰⴷ ⵢⴻⵙⵙⴻⴽⵏ ⵓⵏⵖⵍⴰⴼ ⵜⴰⵔⵎⵉⵜ ⵏ ⵍⵣⵣⴰⵢⴻⵔ ⴷⴻⴳ ⵓⵙⵊⴻⵀⴻⴷ ⵏ ⵜⵎⴻⵔⵙⴻⵍⵉⵏ ⵜⵉⵎⴰⵢⵏⵓⵜⵉⵏ ⴷ ⵓⵙⵏⵓⵍⴼⵓ. ⵢⴻⵙⴱⴻⵢⵢⴻⵏ-ⴷ ⴰⵎⴻⴽ ⵜⴻⴱⴷⴻⵍ ⵍⵣⵣⴰⵢⴻⵔ ⵜⴰⵖⴻⵔⵜ-ⵉⵙ ⵙⴻⴳ ⵜⴷⴰⵎⵙⴰ ⵢⴻⴱⵏⴰⵏ ⵖⴻⴼ ⵓⵥⴰⵔⵓ ⵏ ⵍⴱⴻⵟⵔⵓⵍ ⵖⴻⵔ ⵜⴷⴰⵎⵙⴰ ⵢⴻⴱⵏⴰⵏ ⵖⴻⴼ ⵜⵎⵓⵙⵏⵉ ⴷ ⵓⵙⵏⵓⵍⴼⵓ ⴰⵜⴻⴽⵏⵓⵍⵓⵊⵉ.
ⴰⵔⵏⵓ ⵖⴻⵔ
